Thursday, February 23, 2012

ጾማችን ተሐድሶ ያስፈልገዋል - - - Read PDF

ጾም መጽሐፍ ቅዱሳዊ አምልኮ ሲሆን፣ ክርስቲያን የሆነ ሁሉ በግልም ሆነ በማኅበር እግዚአብሔርን በእውነትና በመንፈስ ለማምለክና ወደ እርሱ ለመጸለይ፣ ስለ ኀጢአቱ ስርየትንና ይቅርታን ለመለመን፣ ስለ ተለያዩ ችግሮችና የልብ መሻቶች የእግዚአብሔርን ርዳታና ምላሽ ለማግኘት እግረ ልቡናውን ወደ እግዚአብሔር የሚያቀናበት መንገድ ነው፡፡ እግዚአብሔር የሚፈልገው በትሕትና የተሰበረውንና የተዋረደውን ልብ በመሆኑ፣ ክርስቲያን በጾሙ ራሱን ከኀያሉ እግዚአብሔር እጅ በታች ስለሚያዋርድእንዲህ በእውነት ተዋርዶ ለእግዚአብሔር የሚያቀርበውን አምልኮትና ጸሎትም እግዚአብሔር ስለሚቀበለው ችግሩ ይቃለላል፤ ጥያቄውም ይመለሳል (መዝ. 51፡17፤ 1ጴጥ. 5፡6)፡፡

በመጽሐፍ ቅዱስ የጾሙ ምእመናን ይህን የጾም ዐላማ ተከትለው በመጾማቸው የሚፈልጉትን አግኝተዋል (መሳ. 20፡26-28፤ 1ሳሙ. 7፡6-11፤ ዕዝ. 8፡21-23፤ ነህ. 1፡4፤ 9፡1-2፤ አስ. 4፡3፡16)፡፡ የገዛ ምኞታቸውን ተከትለውና ለታይታ የጾሙት ግን ከእግዚአብሔር ያገኙት አንዳች ነገር የለም (2ሳሙ. 12፡22፤ ኢሳ. 58፡3-5፤ ኤር. 14፡10-12፤ ማቴ. 6፡16)፡፡

ጾም ከጸሎት ተለይቶ ሊከናወን አይችልም፤ ምክንያቱም የሚጾመው የረኃብ አድማን የመሰለ ትዕይንትን ለማሳየት ሳይሆን ለመጸለይ ነውና፡፡ በመጽሐፍ ቅዱስ መዝገበ ቃላት (1972፣ 257) እንደ ተገለጸው ጾም፣ “በሃይማኖት ምክንያት ያለ ምግብና ያለ መጠጥ መዋል ነው፡፡ ይሁን እንጂ የጾም ዐላማ፣ ከምግብና መጠጥ መከልከል ብቻ ሳይሆን በተዋረደ ልብ ሆኖ የእግዚአብሔርን ፊት መፈለግ ነውና፣ የሚጾሙ ሁሉ ይጸልዩ ዘንድ ተገቢያቸው ነው፡፡ በመጽሐፍ ቅዱስ ውስጥ የምናገኛቸው የጾሙ ሰዎች ጸልየዋል (ሉቃ. 2፡37፤ የሐዋ. 13፡3፤ 14፡23፤ ማቴ. 7፡21፤ የላይኞቹንም ጥቅሶች ይመለከቷል)፡፡ ከሞላ ጐደል የጾም ምንነትና ትክክለኛ ዐላማው ይህን ይመስላል፡፡

ዛሬ በቤተ ክርስቲያናችን የሚታየውን ጾም ከዚህ አንጻር ብንገመግመው በርካታ ችግሮች ይስተዋሉበታል፡፡ ሃይማኖታዊ ሥርዐትና ልምድ ሆኖ ቀርቷል ማለት ይቻላል፡፡ አብዛኞቹ ምእመናን የሚጾሙትም ይህንኑ ጸሎት አልባና ከተወሰነ ምግብ መታቀብ የሆነውን የስም ብቻ ጾም ነው፡፡
 በቤተ ክርስቲያናችን በቊጥር ከሌሎቹ አብያተ ክርስቲያናት የበለጠ የጾም ወቅት መኖሩ ይታወቃል፡፡ አፈጻጸሙ ሲታይ ግን ከስሙ በቀር መንፈሳዊ ዐላማውና ይዘቱ ተዛብቶ፣ በሥርዐት በተደነገገ የተወሰነ ወቅትና የተወሰኑ ምግቦችን (ጥሉላትን) በመተው ላይ ብቻ ተመሥርቶ፣

ጾም በምእመናን ዘንድ የሚታየው እንደ ሕግ ነው፡፡ ለአዳም የተሰጠውን ትእዛዝ (ዘፍ. 2፡17) ከጾም ጋር በማያያዝ፣ ጾም ለአዳም የተሰጠ የመጀመሪያው ትእዛዝ አድርገው የሚቈጥሩና የሚያስተምሩም እንዳሉ ይታወቃል (መርሐ ጽድቅ ባህለ ሃይማኖት 1988፣ 65)፡፡ በመሆኑም የጾመ ሕጉን እንደ ጠበቀ፣ በጾም ወቅት ከተከለከሉት ምግቦች በስሕተትም ይሁን በአስገዳጅ ሁኔታ የበላ /የቀመሰ/ ግን ኀጢአት እንደ ሠራ ይታሰባልና፣ ወደ ንስሓ አባቱ ሄዶ፡- ጾም፣ ስግደት፣ ምጽዋትና የመሳሰለውን ተግባር በመፈጸም ለኀጢአቱ መቀጮ ይከፍላል፤ ሆኖም ይህ መጽሐፍ ቅዱሳዊ መሠረት የለውም፡፡ ከላይ እንደ ተገለጠው ጾም ለርዳታ  የእግዚአብሔርን ፊት የምንፈልግበት የትሕትና መንገድ እንጂ፣ የሚጠበቅ ሕግ፣ ሕግነቱ ሲጣስ ደግሞ የኀጢአት መቀጮ የሚከፈልበት ዋጋ አይደለም፡፡ ያልጾመ ሰው በችግሩ ጊዜ የእግዚአብሔር ርዳታና ባርኮት ይቀርበታል እንጂ ይኰነናል የሚል አንቀጽ በእግዚአብሔር ቃል ውስጥ አልሰፈረም፡፡ ስለ ሆነም በዚህ መንገድ የሚጾሙ ወገኖቻችንትክክለኛውን የጾም ዐላማ ተከትለው ሳይሆን ሥርዐትነቱን ለመፈጸም ሲሉ ነውና የሚጾሙት ጾማችን ለውጥ ያስፈልገዋል፡፡

በቤተ ክርስቲያናችን የአጿጿም ሥርዐት መሠረት በጾም ወቅት ጥሉላት ምግቦችን /ሥጋን፣ እንቊላልን፣ ወተትንና የወተት ተዋፅኦዎችን ወዘተ./ መመገብ ተከልክሏል፡፡ ለዚህም መነሻ ተደርጎ የሚወሰደው፣ በመጽሐፍ ቅዱስ የተጠቀሰ የአንዳንድ የእግዚአብሔር ሰዎች አርኣያነት እንደ ሆነ ይታወቃል (መዝ. 109፡24፤ ዳን. 10፡2-3)፡፡ ነገር ግን እነዚህ የእግዚአብሔር ሰዎች፣ በተለይም ነቢዩ ዳንኤል ያዝን በነበረባቸው ሦስት ሳምንታት ውስጥ ካልተመገባቸው ምግቦችና መጠጦች መካከል እኛ የማንወስደው ከፊሉን ብቻ መሆኑ፣ ቃሉን ለጾማችን መጽሐፍ ቅዱሳዊ መሠረት ለመስጠት ብለን ሳይሆን ለሽፋን የምንጠቅሰው ያስመስለናል፡፡ ነቢዩ፣ማለፊያ እንጀራ አልበላሁም፤ ሥጋና ጠጅም በአፌ አልገባም፤ ... ዘይትም አልተቀባሁም፣ በማለት ከተዘረዘሩት ምግቦች እንደ ታቀበ ብቻ ሳይሆን፣ ራሱን በእግዚአብሔር ፊት እንዴት እንዳዋረደም ገልጿል፡፡ እኛ ግን በአንድ በኩል አጿጿማችን የዳንኤልን የአጿጿም ሥርዐት የተከተለ ነው ስንል፣ በሌላ በኩል ደግሞ እርሱ ሲጾም ካልወሰዳቸው ምግቦችና መጠጦች ውስጥ የተውነው ቢኖር ሥጋን ብቻ ነው፡፡ ከጥሉላቱ ውጪ ከሚገኙት የምግብ ዐይነቶች መካከል ግን ያገኘነውን ጥሩ ጥሩ ምግብ እንመገባለን /እዚህ ላይ ጥራጥሬ እየበሉና ውሃ እየጠጡ የሚጾሙም እንዳሉ አይካድም/፡፡ ምናልባትም ከነዚህ ምግቦች የጥሉላቱ ምግቦች ለሰውነታችን ሊሰጡ የሚችሉትን ጥቅም በተዘዋዋሪ እናገኛለን፡፡ በመሆኑም የራቅነው /የሸሸነው/ ከጥሉላቱ ምግቦች እንጂ፣ ከእነርሱ ከሚገኘው ጥቅም ባለመሆኑ አሁንም ራሳችንን እያታለልን እንደ ሆነ ሊሰማን ይገባል፡፡

ይህም ብቻ አይደለም፤ ቤተ ክርስቲያናችን ከዓመት እስከ ዓመት በሰንበቴ፣ በማኅበር፣ በዝክርና በተዝካር ስም በሚደገሰው ድግስ ውስጥ፡- ጠላ፣ አረቄ፣ ጠጅና የመሳሰለው አልኮል ነክ መጠጥ አይቀርም፡፡ ከጥቂቶች በቀር ሁሉም ለማለት በሚያስደፍር ሁኔታ የመጠጡ ተቋዳሽ ነው፡፡ ስለ ሆነም በጾም ወቅት እንኳ እንደ ዳንኤል የመጠጥን ጾምነት አይቀበልም፡፡ በአንዳንዶች ዘንድ እንዲያውም መጠጥ ጠጪነት የኦርቶዶክስነት መለያ ምልክት ተደርጎ እስከ መወሰድ የደረሰበትም ሁኔታ እንዳለ ይታወቃል፡፡ ከዚህ አንጻር በአጿጿማችን የነዳንኤልን አርኣያነት ተከትለናል ማለት እንችላለን? አንዱን ጥሎ፣ አንዱን አንጠልጥሎስ ይሆናልን?

ስለ ጾም ምንነት ትክክለኛ መጽሐፍ ቅዱሳዊ ግንዛቤ በሌለበት ሁኔታ፣ ከምግብ ጋር ለተያያዘው ነገር ካልሆነ በቀር በጾም ወቅት መከናወን ላለበት መንፈሳዊው ጒዳይ ትኲረት ይሰጣል ብሎ መጠበቁ ሞኝነት ነው፡፡ የብዙ የልማድ ጿሚዎች ዋና ትኲረት በመብል ላይ ያነጣጠረ ነው፡፡ ስለ ሆነም ለጾሙ የሚደረገው ትልቁ ዝግጅታቸው፣ ጾሙ እንደ ነገ ሊጀመር እንደ ዛሬ በቅበላ /ጾሙን የመቀበያ ቀን ወይም ዋዜማ/ የልኳንዳ ቤቶችን ደጃፍ በማጨናነቅ ሥጋ ላይ መራኰት ነው፡፡ በጾሙ ወራት ሊያደርጉ ስለሚገባቸው የጽድቅ ሥራ የሚያስቡ ጥቂቶች ይኖሩ እንደ ሆነ አይታወቅም፡፡ በጣም የሚገርመው ደግሞ በቅበላውና በፍስኩ ጊዜ የጥሉላቱን ምግቦች አላስይዝ አላስቀምስ የሚሉት፣ ያንኑ የሥርዐት ጾም በአግባቡ የማይጾሙት ወገኖች መሆናቸው ነው፡፡ በአግባቡ አለመጾማቸው ሳያንስበሆነ አጋጣሚ ስሕተት ቢፈጠር እንኳ የጾሙ ሥርዐት ተበላሸ፤ ተጓደለ ባዮችም እነዚሁ ባዶ ቀናተኞች ናቸው፡፡ በመሠረቱ መብል ወደ እግዚአብሔር አያቀርበንም፤ ብንበላም የሚተርፈን ባንበላም የሚጐድለን አይኖርምና (1ቆሮ. 8፡8) ጾምን በተመለከተ ከአመጋገባችን ይልቅ ለጾም ዐላማ ትኲረት መስጠቱ መንፈሳዊነት ነው፡፡  

የጾም ነገር ሲነሣ፣ የማንን ጾም ነው የምንጾመው? የሚለው ሌላው አነጋጋሪ ጒዳይ ነው፡፡ በቤተ ክርስቲያናችን በዐዋጅ የተደነገጉትና ምእመናን በየዓመቱ እንዲጾሟቸው ከታዘዙት አጽዋማት ብዙዎቹየእኛ ሳይሆኑ ሌሎች በተለያየ ምክንያት የጾሟቸው ናቸው፡፡ በቤተ ክርስቲያን፣ በአገርና በወገን ላይ ችግር ቢደርስም ባይደርስምበዓመት ውስጥ የተወሰነላቸውን ወቅት ጠብቀው የቀድሞ  ታሪክን /ምናልባትም ከእኛ ጋር ትስስር የሌለውን ታሪክ ጭምር/ በማሰብ የሚጾሙት አጽዋማት ሰባት ናቸው፤ (የኢትዮጵያ ኦርቶዶክስ ተዋሕዶ ቤተ ክርስቲያን  ታሪክ ከልደተ ክርስቶስ እስከ ፳፻ ዓ.ም. 2000፣ 32) እነርሱም፡-

1.   ጾመ ነቢያት /ነቢያት በተለያየ ጊዜ ጾሙት የሚባል/፣
2.  ጾመ ነነዌ /በትንቢተ ዮናስ እንደ ተጻፈው የነነዌ ሰዎች የጾሙት/፣
3.  ጾመ አርብዓ /ዐቢይ ጾም ወይም ጌታ  የጾመው/፣
4.  ጾመ ሐዋርያት /ሐዋርያት መቼ እንደ ጾሙት ባይታወቅም ጾመውታል የሚባለው/፣
5.  ጾመ ፍልሰታ /ሐዋርያት በድንግል ማርያም ሞትና ትንሣኤ ምክንያት ጾመውታል የሚባለው/፣
6.  ጾመ ገሃድ /የክርስቶስ ልደትና ጥምቀት በዓል ረቡዕና ዐርብ ቀን የሚውል ከሆነ ለዚያ ለውጥ በዋዜማቸው የሚጾም/ እና
7.  ጾመ ድኅነት /ከበዓለ ኀምሳ በቀር ዘወትር ረቡዕና ዐርብ የሚጾመው/
ናቸው፡፡

ከሰባቱ አጽዋማት አብዛኞቹን ስንመለከት፣ ሰዎቹ የጾሙት እግዚአብሔር ችግራቸውን እንዲያቃልል፣ ፍላጎታቸውን እንዲያሟላና ጥያቄያቸውን እንዲመልስ ነው፡፡ በምሳሌነት እንኳ መጽሐፍ ቅዱሳዊ የሆነውን የነነዌን ሰዎች ጾም ብንመለከት፣ ከእግዚአብሔር ዘንድ በጥፋታቸው ላይ የነደደው ቊጣ እንዲበርድ፣ እግዚአብሔርን በጸሎትና በምሕላ ለመለመን ሲሉ ነው የጾሙት፡፡ በመሆኑም እግዚአብሔር ጸሎታቸውን ተቀብሎ ምሕረት አድርጎላቸዋል (ዮና. 3፡5-10)፡፡ እንግዲህ የእኛየነነዌን ሰዎች ጾም በየዓመቱ መጾማችን ከምን የተነሣ ይሆን? በመታሰቢያነት መጾም ቢያስፈልግ እንኳ ጾመ ነነዌ ከእኛ ይልቅ ትርጒም የሚሰጠው ከዚያው ትውልድ ለቀጠሉት ለነነዌ ነዋሪዎች ነው፡፡ ለእኛ ምናልባት ጾማቸው ትልቅ ትምህርት ሊያስተምረን ከመቻሉ በቀር ሌላ የሚተርፈን ነገር አይኖርም፡፡ በወቅቱ በእግዚአብሔር ፊት ለቀረበው የምሕረት አቤቱታ ምላሽ ተሰጥቶበት የተዘጋውን ፋይል /የነነዌን ሰዎች ጾም/ ዳግም ከፍተን የእኛ ያልሆነውን ታሪክ በየዓመቱ ከምንዘክር ይልቅ፣ ለእኛዎቹ አንገብጋቢ ችግሮች ጾም-ጸሎት ይዘን የእግዚአብሔርን ምሕረት ብንለምን እንጠቀማለን፡፡ የተለየ  ታሪክ የምንዘክርበት ጾም ቢኖር እንኳ ከእኛ ሕይወት ጋር ጥብቅ ትስስር ያለውና ትርጒም የሚሰጠን ጾም ሊሆን ይገባል፡፡ ለምሳሌ፡- ዐቢይ ጾም ጌታችን ኢየሱስ ክርስቶስ እኛን ለማዳን ሰው ሆኖ የጾመውና ስለ እኛ የተቀበላቸው ሕማማት የሚዘከሩበት ጾም በመሆኑ ከእኛ ሕይወት ጋር ትስስር አለው ማለት እንችላለን፡፡ ስለ ሆነም ይህን እያሰብንና የጾምን ዐላማ ተከትለን ብንጾመው ትልቅ በረከት እናገኝበታለን፡፡

እነዚህ የተጠቀሱት ነጥቦች በጾማችን ውስጥ የሚታዩትን ጒድለቶች በመጠኑም ቢሆን ሊያመለክቱን ይችላሉ፡፡ እነዚህንና ሌሎች ያልተጠቀሱትን ከጾም ጋር የተያያዙትን መጽሐፍ ቅዱሳዊ ያልሆኑ ትምህርቶችንና ሥርዐቶችንቤተ ክርስቲያናችን በእግዚአብሔር ቃል መሠረት እያረመችና እያስተካከለች፣ ምእመኗን  የእግዚአብሔር ቃል የሚደግፈውን ጾም እንዲጾሙ ልታበረታታቸው ይገባል፡፡

ምንጭ፡-  የለውጥ ያለህ!!! ገጽ 215

7 comments:

  1. ጽሑፉ ጠቃሚ እገሮች ያሉት ቢሆንም ችግሮችም አሉበት:: ለምሳሌ ካላይ ፎቶአቸውን ከለጠፋችኋቸው አባቶች አንዱ አቡነ ጎርጎርዮስ የኢትዮጵያ ቤ ክርስቲያን ታሪክ በሚለው መጽሐፋቸው ውስጥ ስለ ሰባቱ አጽዋማት ጽፈዋል:: ስሕተት ነው ለማለት ይቻላል?

    ReplyDelete
  2. ይድረስ ለየዋሁ የቤተ ክርስቲያናችን ተከታይ ወገኔ በሙሉ!!!

    ያ ትሁት ልብ የነበረውና ጽድቅ ፍለጋ ወደ ኢየሩሳሌም የተጓዘው ኢትዮጵያዊ ጃንደረባ 'የምታነበው ይገባሃልን?' ተብሎ በፊልጶስ ለቀረበለት ጥያቄ የሰጠው መልስ እጅግ ልቤን ይነካኛል:: 'የሚያስረዳኝ ሳይኖር እንዴት ይገባኛል?' እኛ ከዚህ እውነተኛና ትሁት ሰው ደም ምንድነው የወረስነው? ከራሳችን ሰዎች እንዳንማር ተረግመን ይሆንን? ''በታሪካችን ውስጥ አንዳንድ ፋና ወጊ ወገኖቻችን ሃገርን የሚጠቅም እውነት ይዘው ብቅ ሲሉ ማጥፋቱን ተክነንበታል::(ምሳሌ እነ እስጢፋኖስ) ለዚህ ነው በስልጣኔ በር ላይ ቀድመን ደርሰን በመገተራችን ሌሎች ከኋላ እየመጡ ቀድመውን የገቡት'' በማለት ፕሮፌሰር መስፍን በሕግ አምላክ ደቂቀ እስጢፋኖስ በሚለው የፕ/ር ጌታቸው መጽሐፍ ላይ የተናገሩት::

    መቼም ለሚያስተውል ሰው የእኛ ታሪክ የሌሎች (አገሮች/ሕዝቦች) ታሪክ እንጂ የራሳችን እንዳልሆነ መገንዘብ ይቻላል:: ለምንድነው ይህ ዓይነቱ ነገር የተጠናወተን? በእውነት የራሳችን የሆነ ታሪክ ሳይኖረን ቀርቶ ነውን? ነው ወይስ የራሳችንን ታሪክ እንደሚገባ ባለማወቃችንና ባለማክበራችን ይሆን?

    ጾማችን የሌሎች ሕዝቦች ጾም, ታቦታችንና የመቀደሱ አምልኮአችን የአይሁዶች, ሥራ አላሠራ ያሉን ቁጥር ስፍር የሌላቸው በአላቶቻችን የግብጾች, የደመራ ሥራአታችን የንግሥተ እሌኒ ታሪክ, የተጫነብን የምንኩስና ሥርዓት ተሳቱ (9ኙ) 'ቅዱሳን' በሚባሉ ነጮች የተጫነብን, ቅዱሳን ብለን ታቦት እያባዛን የምናመልካቸው ሰዎች እንግሊዛዊ (ጊዮርጊስ)ግብጻዊ (አቦ) አባ ሰላማ (ግብጻዊ) አቡነ አረጋዊና ሌሎች 8 ጓደኞቻቸው ከኤሺያ የመጡ ወዘተ ናቸው አያሳፍርም???

    ይህን ሁሉ ጉድ የተሸክመን ሕዝቦች ነን እንግዲህ የራሳችን ታሪክ እንደሌለን የሆነውና በእነዚህ ባእዳን ታሪኮች ፋንታ ወደሚያኮራን የራሳችን የቀደመ ታሪካችን እንመለስ(እንታደስ) ሲባል አንዳንዶች የዛር መንፈስ እንደያዘው የሚያጓሩት::

    እረ እባካችሁ የሚያኮራ የወንጌል ክርስትና ጅማሬ የነበረን ሕዝቦች ነና የቤተ ክርስቲያናችንን የቀደመ ታሪክ አውቀን በሕይወት እንኑረው?? ይህን የሚሉትን ወገኖች ማሳደዱ ምን ይጠቅማል? ለውጡ እንደሆነ የማይቀር መሆኑ ተረጋግጧልና የወንጌል ጠላት የሆነውን ክፉውን መንፈስ ማገልገላችሁ ያብቃ!! እናንተም ቆም ብላችሁ ለራሳችሁ ነፍስ አስቡላት:: ጥላችሁ ከሥጋ ለባሽ ጋር ሳይሆን የሚባላ እሳት ከሆነው አምላካችን ጭምር ጋር እንደሆነ አስተውሉ:: ደግሞም የክርስቶስን ተከታዮች አሳዳጅ ከነበረው የደማስቆው መንገደኛ ተማሩ ለጥቅማችን ተጽፎልናልና በርቱ ሁለንተናዊ ታሪካችንን አበላሽቶ እራሳችንን እንዳንሆን የተጫኑብንን ቡቱቶዎች ሁሉ በጋራ በመሆን ሙልጭ አድርገን እናስወግድና በራሳችን ታሪክና ማንነት ላይ አብረን ሰማያዊ መዝሙራችንን በከበሮና በጸናጽል እንዘምር???????
    ምነው ክርስትና ኢትዮጵያ ተወልዶ ኢትዮጵያ ነው ያደገው በሚል ስሜት ሌሎችን 'መጤ' በማለት ስንሳደብ የኖርን ሰዎች ይህን ሁሉ መጤ ነገር የተሸከምን መሆናችንን እንዴት ማስተዋል አቃተን?? ለነገሩ እውነተኛው ክርስትና በመጀመሪያ ከሰማይ ወደ እስራኤል(ዮሐ 1:12) ከዚያም ወደ ሌሎች አገሮችና ኢትዮጵያ የመጣ እንደሆነ ያስተውሏል (ማቴ 28:19-20)

    ጌታ ወደ ትክክለኛ ልባችን ይመልሰን:: አሜን::

    ሰላም ሁኑልኝ

    በጽዮን አገራችን ላያችሁ የምናፍቀው

    አክባሪ እህታችሁ

    ሰላም ነኝ

    ReplyDelete
  3. የኢኦተቤክ ከሌሎች የሃይማኖት ድርጅቶች ልዩ ሆና የተገኘችበትና እምነትና ሥርዓቷ ዕድሳት እንደሚያስፈልገው የሚመከርባት ምክንያቱ አልገባህ ይለኛል ፡፡
    - እስላም ወንድሞች ከነቢዩ መሃመድ ጀምሮ የወጣ የጾም ሥርዓትን ተከትለው እያከበሩ ስለሆነ ፣ የርዕስ ጾም እንዲጀምሩ እስቲ እነሱንም ምከራቸው ፤
    - ካቶሊኮችም (ከዓለም ትልቁ የክርስትና ድርጅት) እንደዚሁ በየጊዜው የሚቀያየር የጾም ደንብ የላቸውም ፤ እንዲያውም ይኸ የዓቢይ ጾም ወቅት ከኛ ጋር በአብዛኛው ቀናት ይገጣጠማልና አቤቱታ ያለህ ወደዛም ሰፊ የሃይማኖት ድርጅት ማመልከቻህን አስገባ ፡፡
    - ሌሎች እህት ኦርቶዶክስ ማኀበራትም የሚጾሙት ጾም ፡ በእንደዚሁ በኛው ዓይነት ሥርዓት የተዘረጋ እንጅ የሳምንትና የዓመት ፣ የጾም ርዕስና ደንብ እያወጁ ዘወትር አዲስ ዓይነት ጾም የላቸውምና ጥቆማህን ጀባ በላቸው ፡፡

    ታድያ የናንተ ከየት የመጣ ፣ ማንን የተከተለ ነው ይባላል? ትግላችሁ አዲስ የሃይማኖት ሥርዓት ለመዘርጋት ወይስ የኘሮቴስታንት ትምህርትን ወደ ቤተ ክርስቲያናችን ለማስገባት ይሆን? የትናንቱ ወቀሳ ከሌሎች በተለየንበት ጉዳይ ነበር ፤ ዛሬ ደግሞ ሌሎችን በምንመስልበትና የክርስትናችን መሠረታዊ ሥርዓት በሆነው ሁሉ ላይ መጣ ፡፡ ከሶስት ቀን በፊት ለማስተማሪያ ያወጣችሁትን ዛሬ ከለጠፋችሁት ጋር ጎን ለጎን ቁጭ አድርጋችሁ አስተያዩት ፤ እጅግ ልዩነት አለው ፡፡

    የምግብ ለውጥ የሚሆንለትና የሚሆንበት ሰው አለ ፤ ነገር ግን ወንድሜን የምመክርህ ፣ ዓይንህንም እንዲገልጥልህ ፣ ብቅ ብለህ በሳምንት አንድ እፍኝ እየበሉ የሚጾሙትን ባለጸጐች እንድትመለከት ነው ፡፡ ይኸን የናንተ ሰፈር የሻይ ጓደኞችህን እያየህ ፣ ክርስቲያን የሆነውን ወገን ያለ እውቀት አትጉዳው ፡፡ የእናንተን የመኪያቶ ክፈል አትክፈል ጸብን ፣ በቤተ ክርስቲያኗ ሥርዓት ላይ አታምጣው ፤ ጦር ሜዳችሁን እልፍ አድርጉልን ፡፡

    እንዲህ ክርስቲያንነቱ ካስቸገረህ ደግሞ ፣ በአገራችን በሚገኙት ሁሉም የእምነት ዘርፎች የሚያካሂዱት የስህተት ጾም መሆኑን ስበክና አስተምር ፡፡ ያ ነው ክርስቲያንነት ፣ ወገን አይለይም ፤ ዮሐንስ ሲያስተምርና ሲሰብክ ከሊቅ እስከ ደቂቅ ነው የወቀሰው ፤ እናንተ የእፉኝት ልጆች ያለው ታላቅ የሚባሉትንና እጅግ የሚፈሩትን ሁሉ ነው ፡፡

    ጉዳይ አለኝ ከሆነ ነገሩ
    ጉዳይህን በውል አስጨብጥ
    ለእኛ ስውር ነገር አይገባንም ፡፡

    እንዲህ የሚሰማችሁ ሰዎች ደግሞ ቁጥራችሁ በርከት ያለ ከሆነ ፣ ምሳሌ ለመሆን አርአያነቱን ጀምሩና የጾሙን ዓይነት በተግባር አሳዩን ፡፡ ጫማ የሚከልል ከርስ ተሸክሞ ስለ ጾም ቢያወራ ፣ ፊኛ ነው ወይ ከፊትለፊት ተሸክመህ የምትዞረው ያስብላል ፡፡
    አስተያየቱ በደግ ተጀምሮ ሳለ የመጨረሻ ማሳረጊያው የቤተ ክርስቲያናችን ሥርዓትና ደንብ ላይ መሆኑ በጣም ገርሞኛል ፤ ሁሉን አፍርሱ ፣ ሁሉን ደምስሱ ተብሎ የተገዛ ይመስል ፡፡
    ምናልባት ይህችን ከሁለት ሺህ ዓመት በላይ አልፈርስ ያለች ቤተ ክርስቲያንና እምነት እንድታፈርሱ ተከፍሏችሁ ይሆን !!! ያን ሁሉ አስባለሁ ፡፡ ስህተት ነው የማትሉት አንድም ነገር የላትማ ፡፡ አንድ ሥርዓት የለማ ፡፡ ስሟን ብቻ ነው የያዛችሁት ፣ ያም ቢሆን ለማወናበጃና ሽፋን ተኩስ ለመተኮሻ ስለማያገለግል፡፡

    መልስ ይፈልጋል ***** በሉተር ከተጀመረው ኘሮቴስታንት ሃይማኖት የምትለዩበትን አንድ አምስት ነጥቦች ፤ ከሌሎች እህት ኦርቶዶክስ ቤተ ክርስቲያናት ደግሞ የምትመሳሰሉበትንና የምትለዩበትን አምስት አምስት ነጥቦች አቅርቡልንና በደንብ እንወቃችሁ ፡፡ አንድ ሰው ተሃድሶ ለመሆን እምነቱ በምን በምን ላይ የተመሠረተ መሆን አለበት? ዶግማችሁን ማለቴ ነው ፡፡

    ReplyDelete
  4. ይቺ ጨዋታ እየደመቀች መጣች ፡፡
    ኢትዮጵያዊ ወንጌል የሚባልም የለም እኮ ፤ ታድያ ምን ለማለት ፈልገን ነው ከውጭ መጥቶ ተጫነብን የምንለው ፡፡
    ከግሪክና ከዕብራውያነ የመጣውን መጽሐፍ ቅዱስ እኮ ነው የምንደግመው ፡፡ ኢትዮጵያዊ ደራሲ አድርገናቸው ይሆን ወንጌላውያኑን ፡፡ ይሄ የነደደ የአገር ፍቅር በሌላ መንገድ ቢገለጥ ይጠቅማል እንጅ እዚህ ብዙ ስለተሠራበት አታምታቱን ፡፡ እንጀራና ዳቦ የሆነላችሁ ሰዎች ካላችሁ ፣ ነቄ ብለናል በምላስ አትጠቡን ፣ የታጠብነው ገና አልደረቀም ፡፡

    የእኛ የሆነው የዛፍ ፣ የፀሃይና የጨረቃ አምልኮ ነው እንጅ ክርስትና የሚባለውም አገር በቀል ሃይማኖት አይደለም ፡፡ ስለዚህ ይኸኛው አስተያየት ፍጹም ተገቢ አይደለም ፡፡ በውስጡ አብረው የማይረዱን ልማዶች ገብተዋልና እናስተካክል ከሆነ ለማለት የተፈለገው ፣ አሁኑኑ ይስተካከልልንና እናንብበው ፡፡ አለበለዚያ ግን ከውጭ መጣ የሚለው ለየትኛውም ነገር መግቢያ የለውም እንኳንስ መውጫ ፡፡
    ክርስትናውን ያመኑና የኖሩ ክርስቲያን አባቶች ፣ ትምህርታቸውን መቀበል ፣ ኑሮአቸውን መካፈል ምንም ክፋትና ጥፋት ስለሌለው መለማመዱ ሥጋችንን ያሰለጥነዋል እንጅ አይጐዳንም ፡፡
    የማይሆንልን ሰዎች ካለን ምንም ችግር የለውም ፤ እምነታችሁ ይበቃል ፡፡ ይኸኛው ካቦርት ቢቀርባችሁ አትሞቱም ፡፡

    ReplyDelete
  5. ደግሞ ብላችሁ ብላችሁ የውጭ አገርና የአገር ውስጥ እያላችሁ መከፋፈል ጀመራችሁ አዎ እውነታችሁን ነው ሃሳባችሁ ሁሉ ምድራዊ ስለሆነ ካለው ጋር ማምለጥ ይሏችኋል እንደዚህ ነው ምክንያቱም ምድራዊው ገዥ በጐሳ በብሔር በዘር በሃይማኖት እየከፋፈለ ለስሆነ የሚገዛን እናንተም ከእርሱ ጋር የሚመሳሰል ሃይማኖት ለመፍጠር እየተፍጨረጨራችሁ መሆኑ ይታወቃል ለነገሩ ከእናንተ ምን ይጠበቃል ከፍሬአቸው ታውቋቸው አላችሁ አይደል የሚለው ስለዚህ የእናንተ ነገር ለአብዛኞቻችን ግልጽ ነው ምን አልባት የአምልኮ መልክ አላቸው ኃይሉን ግን ክደዋል እንደተባለው ሳያውቁ ትክክለኛ የሃይማኖት ሰዎች መስላችሁ ስትታዩ የሚሰሳት ሰው ሊኖር ስለሚችል እንደዚች አሁን እንደፃፋችኋት አይነት ስህተት እየፃፋችሁ ወገኖቻችን በአጠመዳችሁት ወጥመድ እንዳይገቡ እና ትክክለኛ ማንነታችሁ እንዲታወቅ እግዚአብሔር ይርዳን "አሜን" ስለዚህ የእስከዛሬው የማሰሳቻ መንግድ አሁን ማለትም ይህችን በፃፋችሁኋት ስህተት ስለተበላሸና ወጥመዳችሁ ስለከሸፈሌላ ማሳሳቻ ፈልጉ፡፡ እስኪ አሁን ቤታችሁን ዘግታችሁ ብቻችሁን ቁጭ ብላችሁ አስቡት እስኪ እግዚአብሔር አዳምን ሲፈጥረው የአገር ውስጥና የአገር ውጭ ብሎ ከፋፍሎ ነው የፈጠረው? ጌታችንና አምላካችን ኢየሱስ ክርስቶስስ ለሰው ልጅ ሲል እራሱን ለሞት አሳልፎ የሰጡው በምን መልኩ ነው? ለግብፃዊ፣ ለግሪካዊ፣ ለኢትዩጵያዊ እያለ ነው? እንዴት ነው የምታስቡት ከዚህ በላይ የምለው ስለሌለኝ እዚህ ላይ ላብቃ ለማንኛውም እግዚአብሔር መልካም ልቡና ይስጣችሁ፡፡ "አሜን"

    ReplyDelete
  6. እስኪ ንገሩኝ፣ በየዋህነት የጾመው የኢትዮጵያ ህዝብ ምኑ ሲጎዳና ሲጎድልበት አያችሁ፡ እስኪ እናንት የኦርቶዶክስ ተዋህዶ ጾሞችዋ ይታደስ (ተሃድሶ ያስፈልጋታል)የምትሉ ሰዎች ከየትኞቹ ቅዱሳን በልጣችሁ ነው ለማደስ የተነሳችሁ፡ የናንት እናትና አባቶች አልጾሙትም እንዴ? የቀደመችውን ስርአት ማሰቡ ላይ ልብ አላላችሁም? ነው ወይስ ሰው በህገ ልቦና(በየዋህነት)ሲጾም አይዋጥላችሁም / ቅር ይላችኃል እንዴ? ለመሆኑ እራሳችሁን አይታችኃል? የጾመ ምን ተጎዳ? እስኪ ቀን ይምጣ ለሁላችንም የስራችን ይከፈለናል፤ በተለይ ለእናንት የህዝቡን ቀልብ የሳባችሁ ደግሞም የማስ ሚድያው ጥበብ በጃችሁ የሆናችሁ ለሰው መውደቂያም ማስተማሪያም (መነሻም) ስለሆናችሁ ተጠንቀቁ ከፍርድም ቀላልና ከባድ አለውና ወደልብ መመለሱ ጥሩ ሳይሆን አይቀርም።
    ቸር ይግጠመን፤
    አንድ ሃሳብ አንድ ልብ ያድርገን!
    ይልቅስ መቃወም ወንድም ወንድሙን ለፍርድ አቁሞ ሲከሰውና የአህዛብ መሳቂያ መሳለቂያ ስንሆን ነው መቃወም።

    ReplyDelete
  7. እስኪ ንገሩኝ፣ ከግሪክና ከዕብራውያነ የመጣውን መጽሐፍ ቅዱስ አይደል እንዴ የምንጠቀመው ፡፡ ኢትዮጵያዊ ደራሲ አድርገናቸው ይሆን ነብያትና ወንጌላውያኑንን ? ረሳችሁት እንጂ ቅዱሳን ወንጌላውያን፡ ነብያት፡ሃዋርያት፡ አርድእት፡ ሰማእታት ቅዱሳት አንስት በሙሉ ኢትዮጵያዊ አይደሉም። ደግሞስ በየዋህነት የጾመው የኢትዮጵያ ህዝብ ምኑ ሲጎዳና ሲጎድልበት አያችሁ፡ እስኪ እናንት የኦርቶዶክስ ተዋህዶ ጾሞችዋ ይታደስ (ተሃድሶ ያስፈልጋታል)የምትሉ ሰዎች ከየትኞቹ ቅዱሳን በልጣችሁ ነው ለማደስ የተነሳችሁ፡ የናንት እናትና አባቶች አልጾሙትም እንዴ? የቀደመችውን ስርአት ማሰቡ ላይ ልብ አላላችሁም? ነው ወይስ ሰው በህገ ልቦና(በየዋህነት)ሲጾም አይዋጥላችሁም / ቅር ይላችኃል እንዴ? ለመሆኑ እራሳችሁን አይታችኃል? የጾመ ምን ተጎዳ? እስኪ ቀን ይምጣ ለሁላችንም የስራችን ይከፈለናል፤ በተለይ ለእናንት የህዝቡን ቀልብ የሳባችሁ ደግሞም የማስ ሚድያው ጥበብ በጃችሁ የሆናችሁ ለሰው መውደቂያም ማስተማሪያም (መነሻም) ስለሆናችሁ ተጠንቀቁ ከፍርድም ቀላልና ከባድ አለውና ወደልብ መመለሱ ጥሩ ሳይሆን አይቀርም።
    ቸር ይግጠመን፤
    አንድ ሃሳብ አንድ ልብ ያድርገን!
    ይልቅስ መቃወም ወንድም ወንድሙን ለፍርድ አቁሞ ሲከሰውና የአህዛብ መሳቂያ መሳለቂያ ስንሆን ነው መቃወም።

    ReplyDelete