Saturday, July 21, 2012

እግዚአብሔር አለን . . . ወይስ . . .? ካለስ ምን እየሰራ ነው. . .!?

       ‹‹Love is the Answer no matter what the Question! ለየትኛውም፣ ለማንኛውም ጥያቄዎቻችን ፍቅር መልስ ነው!!››
በፍቅር ለይኩን፡፡
አፄ ቴዎድሮስ ብዙ ከተባለለትና ከተጻፈለት አፍሪካዊው ‹‹ታላቁ ናፖሊዮን›› ካሰኛቸው ከጀግንነታቸው፣ ከጭካኔያቸው፣ ከፍርድ አዋቂነታቸውና ኢትዮጵያን ለማዘመን ከነበራቸው ታላቅ ራእይ ባሻገር በተለያዩ ጊዜያት ስለ ፈጣሪ ህልውና ከቤተ ክህነቱ ተጠሪዎች ነን ባዮች ደብተራዎችና ካሕናት ጋር ያደረጓቸው እንደ አንዳንድ የዋኃን አገላለጽ ‹‹ፈጣሪን መፈታተን›› ዓይነት ጥያቄዎችን እያነሱ ካሕናቱንና የቤተ ክርስቲያኒቱን ሊቃውንቶች በጥያቄ በማጣደፍ ያስጨንቁ ነበር ይባላል፡፡ እናም በአንድ ወቅት ንጉሥ አፄ ቴዎድሮስ በዙፋናቸው በተሰየሙበት ግብር ገብቶ መኳንንቱና መሳፍንቱ፣ ሊቃውንተ ቤተ ክርሰቲያን፣ ካሕናት በታደሙበት ግብዣ ላይ ንጉሡ አንድ ጥያቄ አነሱ እንዲህ ሲሉ፡-
‹‹ለመሆኑ እግዚአብሔር አለን… ካለስ ምን እየሰራ ነው…!? በማለት ጥያቄያቸውን ወርወር አድረገው የሊቃውንቱንና የካሕናቱን መልሳቸውን ለመስማት ጓጉተው መይሳው ካሳ ከዙፋናቸው ላይ ተመቻቹ፡፡ ሊቃውንቱና ካሕናቱ ሁሉ የመሰላቸውንና የንጉሥን ልብ ያሳርፋል ያሉትን መልስ ሁሉ ወደ አፄ ቴዎድሮስ መወርወር ጀመሩ፤ ይሁን እንጂ ከእነዚህ የእግዚአብሔር አገልጋዮች ነን ከሚሉ ሊቃውንትና ካሕናት ዘንድ ንጉሡ ቴዎድሮስ ልባቸውን የሚያሳርፍ በቂ ምላሽ አላገኙም፡፡ እናም በቁጣ ሆነው ሊቃውንቱንና ካሕናቱን በመገላመጥ ከግብር ቤቱ በራፍ ላይ ደበሎውን ለብሶ አኩፋዳውን ይዞ ከንጉሥ ገበታ የሚተራርፈውን እንጀራ የሚጠብቀውን አንድ ምስኪን የቆሎ ተማሪ ወደ ዙፋናቸው አስጠርተው ተሜ፡- ‹‹እግዚአብሔር አለን… ካለስ ለመሆኑ ምን እየሰራ ነው!? አሉት፡፡
ተሜም ለጥ ብሎ እጅ ከነሳ በኋላ ‹‹ንጉሥ ሆይ ሺህ ዓመት ይንገሱ! እግዚአብሔር መንግሥትዎን  ያስፋ፣ ጠላትዎን ያጥፋ! ጃንሆይ እግዚአብሔርማ አለ እንጂ…! የቀን ተሌት ሥራውም ለእያንዳንዳችን መልካም ሆነ ክፉ ስራችን ምላሽ/ብድር ሰፍሮ የሚመልስበትን ቁና ይሰፋል!›› በማለት መለሰ፡፡ ንጉሥም በተሜ መልስ እጅግ ተደንቀው ትክክል ብለሃል በማለት ያን ተማሪ እንደመረቁትና እንደሸለሙት በአፈ ታሪክ ይነገራል፡፡ እግዚአብሔር አለ ወይስ የለም፣ ካለስ ምን እየሰራ ነው!? የሚሉ ጥልቅ የሆኑ በእግዚአብሔር ህልውና፣ የእጆቹ ሥራዎች ላይ የሚያሟግቱ ፍልስፍናዊ ጥያቄዎች ትናንት ተጠይቀዋል፣ ዛሬም ይጠይቃሉ፣ ምናልባት ወደፊትም እስከ ፍጻሜ ዓለም ይኸው ጥያቄው ይቀጥል ይሆናል የሚል ተስፋ አለኝ፤ በዚህ ምድር ላይ እንደ ሰው ያለ ነፍሱ በጥያቄ መአት የተሞላች ጠያቂ ፍጥረት የለምና!
ለመሆኑ በዓለማችን ታሪክ ውስጥ እንደ እኛው ንጉሥ አፄ ቴዎድሮስ ‹‹እግዚአብሔር አለን ካለስ ምን እየሰራ ነው?!›› በማለት የጠየቁ ግለሰቦች ወይም ፈላስፋዎች ነበሩ ይሆን? ከነበሩስ እንዲህ ዓይነቱን በፈጣሪ ህልውና ላይ የሚገዳደር ጥያቄ እንዲያጭሩና ባስ ሲል ደግሞ እንደ ኛው መቶ ክ/ዘመን ጀርመናዊው እውቅ ፈላስፋ ኒቼ ‹‹God is Dead!›› ወይም ‹‹እግዚአብሔር የለም፣ ሞቷል!›› የሚል አብዮት በእግዚአብሔር ህልውና እና በአማኞቹ ልብ ላይ እንዲያፋፍሙ ምክንያቱ/ምክንያታቸው ምን ይሆን በሚል በዚህ በፈጣሪ ህልውና ርዕሰ ጉዳይ ዙሪያ ጥቂት ቁምነገሮችን ለማነሳሳት ወደድሁ፡፡
ለመሆኑ በምድራችን ታሪክ የሰው ልጆች የፈጣሪን ህልውና/መኖር ለመጠራጠር እንዲገደዱ የሚያደርጋቸው ምክንያቱ ምን ይሆን በማለት ራሴን ለመጠየቅ ተገደድሁ፡፡ በቅርቡ ‹‹ፍልስምና›› በሚል በጋዜጠኛ ቴዎድሮስ ተ/አረጋይ የተዘጋጀ በተለያየ እውቀት ደረጃ፣ የሥራ ኃላፊነት፣ ሃይማኖት፣ አመለካከትና የሕይወት ፍልስፍና ውስጥ ያሉ ጥቂት የሀገራችንን ታዋቂ ሰዎችን ቃለ መጠይቅ ያደረገበትን መጽሐፍ እያነበብኩ ነበር፡፡ በዚህ መጽሐፍ ውስጥ ስለ ሃይማኖት እና ስለ ፈጣሪ በተነሱ አከራካሪ እሳቤዎችና ፍልስፍናዎች ላይ መልስ ከሰጡ ምሁራን መካከል በአዲስ አበባ ዩኒቨርስቲ አስተማሪ የሆኑት የፍልስፍናው ምሁር ዶ/ር ዳኛቸው በዚህ መጽሐፍ ውስጥ እንደገለጹት በሰው ልጆች ታሪክ ውስጥ ስለ እግዚአብሔር መኖር ጥርጣሬ ካስነሱ ምክንያቶች መካከል ሲጠቅሱ፡-
በምድራችን ላይ ስለነገሰው መከራና ግፍ፣ ምድሪቷ ባለቤት የሌላለት እስኪመስል የሰቆቃ፣ የእዬዬ፣ የእሮሮና የስቃይ አውድማ ያደረጋትን አሰቃቂ ክስተት የታዘቡ በተለያዩ ጊዜያት የተነሱ ፈላስፋዎችና የስነ መለኮት ምሁራን በመጥቀስ ‹‹በእርግጥ የሰው ልጅ ሕይወትና ድኅንነት የሚገደው አምላክ ቢኖር እንዲህ አይሆንም በማለት እግዚአብሔር በምድሪቱ ዕጣ ፈንታም ሆነ በሰው ልጆች ሕይወት ታሪክ ውስጥ ምንም ድርሻ የሌለው አንዳንዴም ጨካኝ እና ስሜት አልባ›› ተደርጎ እንዲሳል ሆኗል በማለት ያብራራሉ፡፡ እግዚአብሔር አለን? ካለስ ይህ ሁሉ ክፋት፣ አመጻና ቀውስ ሲነግስ በንጹኃን ደም ምድሪቱ ስትጨቀይ ፍቅር! ነው ተብሎ የተነገረለት አምላክ ለመሆኑ ምን እያደረገ ነው…!?
ዶ/ር ዳኛቸው እንደገለጹት በዚህ በምድራችን ትራጀዲ ዙሪያ የ19ኛው መቶ ክ/ዘመን እውቅ ደራሲና ጸሐፊ የነበረው ሩሲያዊው ፊዮዶር ዶስቶቮስኪ ‹‹የኮን ማዞቭ ወንድማማቾች›› በሚለው መጽሐፉ ላይ ሁለቱን ወንድማማቾች ኢቫንና ኢሊዮቫ ሲያወያይ ፈላስፋው ኢቫን ለሃይማኖተኛው ኢሊዮቫ የሚከተለውን ፈታኝ ጥያቄ አንስቶለታል፡-
‹‹ኃጢአተኞች፣ ክፉዎችና አዋቂ ሰዎች ስቃይ ቢቀበሉ ይገባኛል፡፡ በዚህ ምድር ላይ ስለምናየው የንጹኃን መገፋት፣ ጉስቁልና የሞላበት ትራጄዲ የሆነ ሕይወት፣ እልፍ የሚሆኑ ሕጻናት በከንቱ ስለሚያልቁበት ኢ-ፍትሀዊ ፍርድ ምንም ዓይነት ምክንያት ሊቀርብ አይችልም፡፡ ንጹኃንን በሚመለከት እግዚአብሔር ያሻውን ለማድረግ የመግቢያ ትኬት የለውም፡፡›› በማለት በፈጣሪ መኖር ላይ ያለውን ጥርጣሬ ግልጽ አድርጓል፡፡ ይህ ክስተት ለሃይማኖተኛው ለዲዮስቶቮስኪም ፈታኝ ጥያቄና መልስ ያጣበት የዘመናት እንቆቅልሽ እንደሆነ በሕይወት ዘመኑ በማስታወሻው ውስጥ አስፍሯል፡፡ ይኸው ብዙዎችን የዓለማችንን ሊቃውንቶችና ፈላስፋዎች ያመራመረ እንቆቅልሽ በሀገራችን ገጣሚ ሙሉጌታ ተስፋዬ ‹‹እውነት ከመንበርህ የለህማ!›› በሚል ቅኔው እንዲህ ተገልጧል፡-
‹‹ . . . ግን . . . ግን . . . ብላቴኖቹ ምን በደሉ
የማንን አደራ በልተው . . . የማንን አማን አጎደሉ
እምብርታቸው ያላረረ . . . አጥንታቸው ያልከረረ
ሰማይ በቀል እንደ ቋጠረ . . . ዕጣቸውን እየመነጠረ
መንገዳቸውን እያጠረ
እንደ ደራሽ ውኃ አግተልትሎ
በራብ አኮርማጅ ተልትሎ
ከእናት እቅፍ በግፍ ነጥቆ
ምሱን ሊቃመስ ተናጥቆ
ሲሰለፍብን በአጭር ታጥቆ
እያየህማ ዝም ካልክማ
እውነት . . . እውነት . . . ከመንበርህ የለህማ . . .!››
ምድራችን ስለተራበቸው ፍቅር፣ ምሕረትና ፍትህ እንዲሁም በሰው ልጆች መካከል ስለነገሰው መከራ፣ ዋይታና ሰቆቃ ነፍሳችን በእጅጉ እያነባች በዚሁ ሁሉ ምስቅልቅልና ቀውስ ውስጥ ‹‹እግዚአብሔር የት እንዳለና ምን እየሰራ እንደሆነ›› ግራ በመጋባት ፈጣሪን የምንጠይቅ ሰዎች በተለይ ራብ፣ ችጋር፣ የከፋ የእርስ በርስ ጦርነትና መከራ ዕጣ ፈንታችን እስኪመስል መገለጫችን ለሆንን ለእኛ ኢትዮጵያን ሕዝቦች ግን ለምን… ለምን? በማለት ለዘመናት መልስ ያጣንበት እንቆቅልሻችን እንደሆነ ይሰማኛል፡፡
ሰው የሰውን ሥጋ እስከመብላት የተደረሰበትን፣ ጣእረ ሞት የከበባቸው የሚመስሉ ሕጻናት በሞት የተነጠቁ እናቶቻቸውን ጡት ሲጠቡ የታየበትና ዓለምን በእንባ ያራጨ ዘግናኝ የራብ ታሪክ ውስጥ ደጋግመን ስለማለፋችን፣ እርስ በርስ ስለተላለቅንበት ጦርነት፣ ሕዝባችን በተለያየ ጊዜ በሞት ስለተቀጠፈበት ወረርሽኝ፣ እርዛት፣ መከራና ሀገራችን ስለምትዳክርበት የከፋ ድህነት በተለያዩ የሙያ ዘርፎች ጥናት የሚያደርጉ ምሁራን ደካማ የሥራ ባሕል፣ ስንፍና፣ ነጻ አስተሳሰብንና የአሳብ ልዩነትን በሰላም የማስተናገድ ዲሞክራሲያዊና በቅንነት የመቀባበል  ባሕል አለማዳበራችን፣ ሀገራችንን ያስተዳደሩ ነገሥታቱም ሆኑ መንግሥታት አምባ ገነንትና የፍትህና የመልካም አስተዳደር እጦት…ወዘተ ስላለፍንበት ዘግኛኝ ጉስቁልናችን፣ መከራችንና አሁንም ላለንበት ዝቅጠትና የከፋ ድህነት እንደ ዋንኛ ምክንያት ተደርገው ቢገለጹም በአንጻሩ ደግሞ በሌላ በኩል፡-
ሀገረ-እግዚአብሔር ተብላ በምትጠራ ምድር፣ ሕዝቦቿ በእጅጉ ሃይማኖተኛ ናቸው ተብለው ለሚነገርላት ኢትዮጵያ ይሄ ሀገሪቱ በዓለም መድረክ የጦርነትና የራብ ምድር ተደርጋ የመገለጹ እውነት ብዙዎችን እያሳቀቃቸው ዓይናቸውን ወደ ጸባዖት በማንሳት ጠዋት ማታ አንተን የምትማጠን ኢትዮጵያንና ሕዝብህን እንዲህ ለአሰቃቂ ሞትና ለቅጥ የለሽ መከራ የዳረግበህት ምክንያቱ ምን ይሆን… በማለት ፈጣሪን የሚሞግቱና የሚጠይቁ በርካታ ሰዎች ዛሬም ድረስ በመቅደሱ አሉ፡፡
በታሪክ፣ በፖለቲካ፣ በኢኮኖሚና በማኅበረሰብ ሳይንስ ምሁራን ዘንድ ሀገሪቱ ስላለፈችበት ውጣ ውረድና አሁንም ስላለችበት ውሉ የጠፋ ስለሚመስል ችግር የሚቀርቡትን ጥናቶችና ትንታኔዎች ለማብራራት የጹሑፌ ዓላማ አይደለምና ብዙም ሳልርቅ በጹሑፌ መግቢያ ወዳነሳሁት ጭብጥ ልመለስ፡-በምድራችን ላይ ስለነገሰው ይህ ሁሉ ግፍ፣ መከራና ጉስቁልና፣ ስለ ሰው ልጆች ስቃይ፣ ስለ ንጹኃን እልቂት፣ ስለ ድኆች ጩኸትና ዋይታ የሚገደው እግዚአብሔር አለን ካለስ ይህን ሁሉ ግፍ እያየ ለመሆኑ ምን እየሰራ ይሆን? ከላይ እንደገለጽኩት ሃይማኖተኝነት በሚጎላበት ሕዝባችን መካከል ክስተቶችን ከእግዚአብሔር ምሕረትና መዓት ጋር ማገናኘት በረጅም ዘመን ታሪካችን ውስጥ የምንታዘበው ሐቅ ነው፡፡
ለዚህ ይመስለኛል ፋሽስቱ ቢኒቶ ሞሶሎኒ ይሄንን የሀገራችንን ሕዝብ ሃይማኖተኝነት በሩቅ በዝና ሰምቶ ለኢጣሊያን ሕዝብና ለጦር ሠራዊቱ በሮም አደባባይ ባደረገው ንግግር፡- ‹‹ኢትዮጵያን አምላኬ የምትለው እግዚአብሔር ከኃያሉ ክንዴና ከብርቱ መዳፌ ያድነኛል ብላ ከሆነ ተስፋ ያደረገችው የእኔንም እግዚአብሔር ልጨምርላት እችላለሁ!›› በማለት በኢትዮጵያ አምላክ ላይ በናቡከደነጾራዊ ትእቢትና ትምክህት በምስኪኑ ሕዝባችን ላይ በማላገጥ ዲስኩር ማድረጉን የታሪክ መዛግብት ይጠቁማሉ፡፡
እስቲ በጦርነትና በራብ ታሪካችን ውስጥ ‹‹ፈጣሪ የተሞገተበትን›› እውነት የሚያጎሉ ሀገራዊ ክስተቶችን በጥቂቱ ልጥቀስ፡- እ.ኤ.አ በ1930ዎቹ ሀገራችን ኢትዮጵያ በፋሽስት ጣሊያን በተወረረችበት ዘመን የጣሊያን ጦር በሀገራችን ሰማይ ላይ ያሰማራቸውን የጦር አውሮፕላን የታዘበ የሀገሬ ሰው እነዛ በሰማይ ላይ እየተምዘገዘጉ የእሳት አሎሎ በሚተፉና የመርዝ ቦምብ እያዘነቡ የኢትዮጵያን ሕዝብ ሕጻን፣ ወጣት፣ አረጋዊ ሳይል እጅግ በሚዘገንን ሁኔታ እንደ መኸር እህል እያጨደ የከመረውን፣ በእነዚህ ሞትን በሚተፉ እንግዳ ፍጡሮች ግራ በመጋባቱና አውሮፕላኖች በሕዝባችን ላይ እንደ መአት ያፈሰሱትን የመከራ ውርጅብኝ የተመለከቱ አንዲት የሸዋ መነኩሲት በሀለዎተ እግዚአብሔር/በፈጣሪ መኖር ላይ ጥርጣሬ ያጫረባቸውንና ይህ ሁሉ መዓት በምስኪን ሕዝቡ ላይ ሲደርስ እግዚአብሔር ዝም ብሎ ያያልን!? በሚል የሀገራቸውን አሰቃቂ የታሪክ ክስተትና እልቂት በቅኔያቸው ‹‹ፈጣሪን ወዴት ይሆን ያለህ!?›› በሚል እንዲህ በድፍረት ሞግተውት ነበር፡-
የለህም እንዳልል ይመሻል ይነጋል፣
አለህም እንዳልል እንዲህ ይደረጋል፡፡
አምላክ ለአንተው ፍራ፣
በቤትህ አግድመት ጎዳና ተሠራ፡፡ በማለት እነዚህ በሰማይ የሚምዘገዘጉ የፋሽስት ጣሊያን ሠራዊት የሞት አበጋዞች በእውነት አንድዬ በዙፋንህ ካለህማ ግዛትህን እየተዳፈሩና የአንተንም ህልውናን ጭምር እየተፈታተኑ እንደሆነ ተመልከት ሲሉ ያሳሰቡበት ነው፡፡ ሌላው የደብረ ሊባኖስ ባለ ቅኔም ይህን ድፍን ኢትዮጵያን ጉድ ያሰኝ እነዚህ የጣሊያን ጦር የሰማይ በራሪ አካላት በሀገራችን ሕዝብ ላይ ሴት ወንድ፣ ሕጻን ሽማግሌ ሳይሉ የሚያዘንቡትን የሞት የእሳት ላንቃ ታዝበው እንዲህ ተቀኝተው ነበር፡-
ከኢትዮጵያ ጸሎት ጣሊያኖች በለጡ
በአርባ ዘመናቸው ክንፍ አውጥተው መጡ
ፈጣሪ ተጠንቀቅ ወዳንተም እንዳይመጡ፡፡
የዚህ ቅኔ መነሻው ለሰባት ዓመታት በአንድ እግራቸው የጸለዩት በዚህ በረጅም ጸሎታቸው፣ ተጋድሎአቸውና ትሩፋታቸውም የተነሳ ከፈጣሪ ዘንድ ክንፍ ተሰጥቶአቸዋል ተብሎ የሚተረክላቸው አቡነ ተክለ ሃይማኖት ናቸው፡፡ ባለ ቅኔው በዘመናቸው ሃይማኖተኛ ነኝ ብሎ የሚመጻደቀው ሕዝባቸውና ኢትዮጵያውያን በጾምና በጸሎታቸው ያልታደሉትን ክንፍ ጣሊያን በአእምሮ ብልጠትና ስልጠት ከአድዋው ጦርነት አሳፋሪ ሽንፈት በኋላ በአርባ ዘመናቸው በረቀቀ ቴክኖሎጂ በሰማይ በሚበር ባለ ክንፍ አውሮፕላን መጥተው ሕዝቡን እንደፈጁና ሀገሪቱን ለመያዝ እንደበቁ ያመሰጠሩበት፣ የራሳቸውንና የሕዝባቸውን ሃይማኖተኛነትና ለሺህ ዘመናት ሀገረ-እግዚአብሔር ተብላ የምትጠራውን ሀገራቸውን ኢትዮጵያን በጥያቄ ምልክት ውስጥ ያስገቡበትና የተቹበት ድንቅ ቅኔ ነው፡፡
1977 ክፉ የድርቅ ዘመንም በተለይ የሰሜኑ የሀገራችን ሕዝብ ባጋጠመው አሰቃቂና መላውን ዓለም ዕንባ ያራጨ ራብ ጉልበቱ የበረታ የሀገሬ ጎበዝ እራሱንና ቤተሰቡን ከሞት መንጋጋ ለመታደግ እህል ፍለጋ ወደ ሸዋ ግዛት በስደት መጥተው ነበር፡፡ በዛም ድርቁና ራቡ ብዙም ያለጠቃው የሸዋ ሕዝብ በሰሜነኞቹ ላይ ባሳየው ያልተገባ ባሕርይና ኢ-ሰብአዊነት ሞራሉ የተነካበት የሰሜኑ ሕዝባችን እንደ ጀርመናዊው ፈላስፋው ኒቼ ሁሉ ‹‹ፈጣሪ ሞቶብን!›› እንዲህ ጊዜ ጥሎን እናንተም እንደ እግዚሔር ፊታችሁን ታዞሩብን፣ እንዲህ ትዘባነኑብን ሲል ምሬቱንና ብሶትን በግጥም እንዲህ ገልጧል፡-
እነዚህ ተጉለቶች
የእኛ እግዜር ሞቶብን!
የእኛ እግዜር ምንኖ፣ የእነሱ ቆመና
ውሻ ‹‹ችስ!›› እያሉ አሽበላለጡብን አንኮላና ቁና፡፡
ሀገራችን ስላለፈችበት ክፉ የራብ ዘመናትና የእርስ በርስ ጦርነትና እልቂት አሁንም እያለፈችበት ስላለው ጉስቁልና እና የከፋ ድህነት ምክንያት እግዚሔሩ ስለሚጠየቅበት ሁኔታ አሳማኝ የሆነ መረጃና ትንታኔ ለማቅረብ በዚህ አጭር ገጽ የማይታሰብ ቢሆንም ወደ መነሻ አሳባችን ስንመለስ የሰው ልጆች በኃጢአታቸውና በበደላቸው የተነሳ ከሚመጣ ቁጣ፣ መከራና ጉስቁልና ባሻገር ‹‹ለኃጥአን የመጣ ለጻድቃን ይተርፋል!›› እንደሚባለው የሀገራችን ብሂል እግዚአብሔር በንጹኃን ላይ ስለሚደርሰው ግፍና በደል በተመለከተ ግን ለመሆኑ እግዜሩ ምን ምላሽ አለው?
ፈላስፋዎቹ እንዳሉትስ ይህን ሁሉ ግፍ፣ መከራና ኢ-ፍትሀዊነት ታግሶ ዝም ብሎ የሚያይ ‹‹ፈጣሪ/አምላክ አለ ቢባል እንኳን እንዳለ አይቆጠርም ወይም እግዚአብሔር ጭራሹኑ የለም!›› የሚለውን መደምደሚያ እስቲ ከታላቁ ቅዱስ መጽሐፍ እውነት አንጻር እንመልከተው፡፡ በመጽሐፍ ቅዱስ ውስጥ የፈጣሪን ህልውና ከመካድ ባለፈ እንዲህ ዓይነቱን ፍርደ- ገምድል እግዚአብሔር ከሆነ አምላክ ብለን ስናመልክና ስንገዛለት የኖርነው በእውነት ተሳስተናል እናም ይህን እግዚአብሔርን ስደበውና ሙት በማለት በምሬትና በብስጭት የተናገረች ሴትን ታሪክ እናገኛለን፡፡
በብሉይ ኪዳን መጻሕፍት ውስጥ እጅግ ቅን፣ ጻድቅ፣ እግዚአብሔርን የሚፈራ ተብሎ የተነገረለት ኢዮብ የተባለ ሰው ነበር፡፡ ይህ ሰው እጅግ ተመችቶት በሀብትና በዝና ዙፋን ላይ ተንደላቆ ከቤተሰቡና ከወገኑ ጋር እጅግ ደስ ብሎት የሚኖር ሰው ነበር፡፡ ግና ይህ በሀብትና በዝና ምንጣፍ ላይ ሲራመድና ሲንቀባረር የነበረ በእግዚአብሔር አንደበት ‹‹ጻድቅና ቅን!›› ተብሎ የተመሰከረለት ሰው በአንድ ጀምበር ሀብት ንብረቱን፣ ቤተሰቡንና ጤናውን አጣ፡፡ በአንድ ጊዜ ሰማይ ምድሩ ተደፋበት፡፡ የልጆቹ እልቂት የሀብት ንብረቱ መውደም፣ ከራስ ጠጉሩ እስከ እግር ጥፍሩ በቁስል ንዳድ በመመታት በትል መወረሱ፣ በመርዶ ላይ መርዶ፣ በሐዘን ላይ ሐዘን የተከታተለበት ኢዮብ ሐዘኑ ቅጥ አጣ፣ በታላቅ ድምጽም ጮኾ አለቀሰ፣ ከክብር ሰገነቱ ወርዶ በአመድ ላይ ተቀምጦ በራሱ ላይ ትቢያን ነስንሶ የተወለደበትን ቀን በምሬት እንደረገመ ታሪኩ በመጽሐፍ ኢዮብ በሰፊው ተጽፎለታል፡፡
ጻድቅ ኢዮብ የመከራውና የዚህ ሁሉ መዓት ውርጅብኝ መንስዔ ምን እንደሆነ ለማወቅ ብዙ ጥሯል፣ ደክሟልም፡፡ ምነው ቃሌ በአለት ላይ ቢጻፍ ብሎም ተመኝቷል፣ እንደውም ምናለ በእኔና በአምላክ ፊት የሚቆምና ክርክራችን የሚዳኛ ዳኛ በተገኘ ሲልም ተማጽኗል፡፡ ኢዮብ አንቱ በተባለበት ምድር የከበሬታ ስፍራ ያገኘ ፍርድንና ፍትህን ለማድረግ የሚሟገት ሰው፣ መልካሙን ስጠብቅ ክፉን አገኘሁ፤ በእውን ድኃውን ገፍቼ፣ ፍርድ አጉድዬ ነበር እንዴ፣ ለችግረኛውና ለምስኪኑስ አባትና ጠበቃ አልነበርኩ በማለት ስለ እራሱ ተሟገተ፡፡ በዚህ ሁሉ ውስጥ ደግሞ የአካሉ ክፋይ ረዳቱ የምትሆነው ይህን በቃላት ሊገለጽ የማይችል የመከራ ዶፍና ውርጅብኝ የታዘበችው ሚስቱ የአካሉ ክፋይ እንዲህ አለችው፡-
‹‹አሁንም በታማኝነትህ እንደጸናህ ነውን… እግዚአብሔርን ስደብና ሙት!›› ስትል ልብን በሌላ የሐዘን ሰይፍ የሚመትር፣ አጥንቱ ድረስ ዘልቆ ነፍሱን የሚበረብር ንግግር ተናግራው ከእንግዲህ አልተገናኘንም ወዳጄ በማለት እንደ ዋዛ በዛ የመከራና የጭንቅ ቀውጢ ዘመን ሚስቱ የአካሉ ክፋይ እንኳን ጥላው እብስ አለች፡፡ ኢዮብ ይህን አሰቃቂ ክስተት፡- ‹‹ሚስቴም እስትንፋሴን ጠላች፣ የእናቴም ማኅጸን ልጆች ልመናዬን ጠሉ፡፡ ቤተሰቦቼ፣ ወዳጆቼና የሴት ባሪያዎቼ እንደመጻተኛ ቆጠሩኝ፣ በዓይናቸውም ፊት እንደ እንግዳ ሰው ሆንሁ፡፡›› (ኢዮ ፲፱፣፲፯) ሲል በምሬትና በሐዘን ስሜት ይገልጸዋል፡፡
ኢዮብን ለማጽናናት ከሩቅ የመጡ ወዳጆቹም መጽናኛ ቃል ሳይሆን በቁስሉ ላይ ጥዝጣዜን የሚጨምር የምላስ ጅራፋቸውንና የቃላት ውርጅብኛቸውን በየተራ እየተቀባበሉ ያወርዱበት ጀመር፡፡ አንድ የሰራኸው ኃጢአትና በደል ቢኖር እንጂ መከራ እንዲሁ ከሰማይ አይወርድም ሲሉ በሐዘን የደከመችና ተስፋ የቆረጠች ነፍሱን በእጅጉ አጎሳቆሏት፣ አሳቀቋትም፡፡ ኢዮብ ግን በዚህ ሁሉ ስቃይና መከራና ሰቆቃ ውስጥ ሆኖ ‹‹ብሞትም እንኳን እርሱን በትእግስት እጠባበቃለሁ፣ ነገር ግን መንገዴን በፊቱ አጸናለሁ!›› (ኢዮ ፲፫፣፲፭) ሲል ለነፍሱ ተናገራት፡፡
ኢዮብ በታላቅ የጥያቄና የእንቆቅልሽ ማእበል ውስጥ ነፍሱ ከወዲህና ከወዲያ እየተላጋችም ቢሆን በታማኝነቱ ጸና፡፡ ኢዮብ ምንም ‹‹ጻድቅና ቅን›› ተብሎ በአምላኩ የተመሰከረለት ሰው ቢሆንም በመከራው ዘመን ‹‹እግዚአብሔር የት ነህ ያለኸው?›› ሲል በምሬት ጠይቋል፡፡ የሚደንቀው ነገር በስተመጨረሻ የኢዮብን ጥያቄ እግዚአብሔር በጥያቄ ነበር የመለሰለት እንዲህ ሲል፡-
‹‹…እንግዲህ እንደ ወንድ ወገብህን ታጠቅ እጠይቅሃለሁ አንተም ተናገረኝ፤ በውኑ ፍርዴን ታፈርሳለህን? አንተስ ጻድቅ ትሆን ዘንድ በእኔ ትፈርዳለህን? እንደ እግዚአብሔር ክንድ ያለ ክንድ አለህን ወይስ እንደ እርሱ ባለ ድምፅ ታንጎደጉዳለህን? በታላቅነት ተላበስ በክብርና በግርማም ተጎናጸፍ፡፡ የቁጣህን ፈሳሽ አፍስስ፣ ትዕቢተኛውንም ሁሉ ተመልክተህ አዋርደው፡፡ ትዕቢተኛውንም ዝቅ ዝቅ አድርገው፣ በደለኞችንም ወዲያውኑ እርገጣቸው፡፡ በአፈር ውስጥም በአንድነት ሰውራቸው፣ በተሸሸገም ስፍራ ፊታቸውን ሸፍን፡፡ በዚያን ጊዜም ቀኝ እጅህ ታድንህ ዘንድ እንድትችል እኔ ደግሞ እመሰክርልሃለሁ…፡፡›› (ኢዮብ ፵፣፮-፲፬)
እናም በፍጻሜው ኢዮብ ያለው ነገር ቢኖር ‹‹እጄን በአፌ ላይ እጭናለሁ፤ ሁሉን ታደርግ ዘንድ ቻይ እንደሆንክ አሳብህንም የሚከለክለው እንደሌለ አውቅሁ፡፡›› በማለት በአምላኩ ፊት ተጸጸተ፡፡ በመከራው ፍጻሜ እግዚአብሔር በምሕረትና በበረከት ኢዮብን እንደጎበኘውና በደስታና በሐሴት ዕድሜን ጠግቦ እንደሞተ ይኸው የኢዮብ መጽሐፍ ይነግረናል፡፡
እንደ ኢዮብ ሁሉ በራሳችን/በግል ሕይወታችንም ሆነ በቤተሰብ ይሁን በሀገር ደረጃ መልስ ስላጣንበት ምድራችን ስለተራበቸው ፍቅር፣ ምሕረትና ፍትህ ኃጢአተኞችና ክፉዎች ስለሰለጠኑበት ሁኔታ እንዲሁም በሰው ልጆች መካከል ስለነገሰው መከራ፣ ዋይታና ሰቆቃ ነፍሳችን በእጅጉ እያነባች በዚሁ ሁሉ ምስቅልቅልና ቀውስ ውስጥ እግዚአብሔር የት እንዳለና ምን እየሰራ እንደሆነ ግራ በመጋባት ፈጣሪን የምንጠይቅ ሰዎች በኢዮብ ሕይወት እንደታየው እግዚአብሔር መልሶ እኛኑ ስለ ኃይሉ ፍጹምነት፣ ስለ ታላላቅ የእጆቹ ሥራዎች፣ ስለማይመረመር ፍርዱና ምሕረቱ በመጠየቅ አፋችንን በመገረም አስይዞን ካለ እርሱ ከሰዎች ሁሉ ይልቅ ምንኛ ምስኪንና ጎስቋላ መሆናችን በመግለጽ በፍቅር ኃይል፣ በእምነት ዓይን፣ በማስተዋል ልቦና ስራውን በአንክሮ እንድናስተውል ያሳስበናል፡፡
ሐዋርያው ቅዱስ ጳውሎስ በሮሜ መልእክቱ እግዚአብሔር በሰው ልጆች ሕይወት ታሪክ ጉዞ ውስጥ በግለሰብ፣ በሀገርና በዓለም አቀፍ ደረጃ ስለሚያከናውናቸው ክስተቶች ብንጠይቅም ብንመራመርም ልንደርስበት ስለማንችለው የእውቀቱ፣ የጥበቡ፣ የማስተዋሉና የፍርዱ ነገር ሲናገር፡-
‹‹የእግዚአብሔርን ባለጠግነት ጥበብ እውቀቱም እንዴት ጥልቅ ነው፣ ፍርዱ የማይመረመር ነው፣ ለመንገዱም ፍለጋ የለውም፡፡ የጌታን ልብ ያወቀው ማን ነበር? ወይስ ብድራቱን ይመልስ ዘንድ ለእርሱ አስቀድሞ የሰጠው ማን ነው?›› በማለት በአድናቆት ተናግሯል፡፡ የሁሉን ቻዩን የፈጣሪን አሰራር ወደማወቅ ፍጹም የከበረ እውቀት፣ ማስተዋልና ጥበብ ለመድረስና ለጥያቄዎቻችን ሁሉ ምላሽ ለማግኘት በፍቅር ሰረገላ መሳፈር እንዳለብንና በዚህ መለኮታዊ ፍቅር ውስጥም እምነታችንን ፍጹም ለማድረግ የሚያስችል ተስፋ፣ ጸጋ፣ ኃይልና ብርታት እንዳለ መጽሐፍ ቅዱስ ይነግረናል፡፡
በዚህ መለኮታዊ ፍጹም ፍቅር ውስጥ ለጥያቄዎቻችን ሁሉ መልስ እንዳለና ወደ እግዚአብሔር ፍጹም እውቀት፣ ጥበብና ማስተዋል የምንደርስበት ብቸኛ መንገድም ፍቅር መሆኑን እግዚአብሔር ራሱ በፍቅር ስለ ፍቅር እኛን ሆኖ ከኃጢአት በስተቀር በነገር ሁሉ እንደ እኛ ተፍትኖ ሰው ሆኖ መንገዱን አሳይቶናል፣ የማያዳግም መልስም ሰጥቶናል፡፡ ክርስትናም የዚሁ የአምላክ ፍጹም ፍቅር፡- ውበት፣ ኃይል፣ ጸጋና የሰው ልጆች ሁሉ እንቆቅልሽና ምስጢር የሚገለጽበትና መልስ የሚገኝበት ሕይወት ሆኗል!
 ‹‹Love is the Answer no matter what the question! ለማንኛውም ሆነ ለየትኛውም ጥያቄዎቻችን ፍቅር ምላሽ ነው! ፍቅር ደግሞ እግዚአብሔር ነው!›› መጽሐፍ እምነት፣ ተስፋ፣ ፍቅር እነዚህ ሦስቱ ጸንተው ይኖራሉ ከእነዚህም የሚበልጠው ግን ፍቅር ነው እንዲል፡፡ ስለዚህም በፍቅር ውስጥ ለሁሉም ጥያቄዎቻችን መልስ፣ ለሕይወት እንቆቅልሽም ነፍስንና መንፈስን የሚያሳርፍ ፍቺ አለ፡፡
ፈላስፋዎቻችን እንደሚሉት ሳይሆን ፍቅር የሆነው የዓለማት ፈጣሪና ገዢ እግዚአብሔር ስለ ሰው ልጆች መከራና ግፍ አጥብቆ ይገደዋል፣ በክፉዎችና በኃጢአተኞችም ላይ በጽድቅና በእውነት የሚፈርድ አምላክ በሰማይ በዙፋኑ ላይ አለ፡፡ የሀገራችን የቆሎ ተማሪ እንደገለጸውም እግዚአብሔር በእውነት አለ እንጂ! ለእያንዳንዳችን እንደ ሥራችን መጠን ዋጋችንን ይከፍል ዘንድ ለብድራታችን ምላሽ የሚሆን የእያንዳንዳችንን ቁና በመስፋት ላይ ነው፡፡ በእውነትም በጥበቡ በእውቀቱና በማስተዋሉ አቻ የሌለው ፍቅር የሆነ እግዚአብሔር ሁሉን በጽድቅና በእውነት የሚዳኝበትን ቁና እያዘጋጀ፣ እየሰፋ ነው፡፡
የእግዚአብሔር ቅዱስና ሕያው ልጅ ኢየሱስ ክርስቶስ ለእያንዳንዳችን እንደ ሥራችን መጠን ሊከፍለን፣ ዕንባችንን ከዓይኖቻችን ሊያብስ፣ ምድሪቱን የተራበችውን ፍትህን፣ ፍርድንና ምሕረትን ሊያሰፍን በቅዱሳን መላእክቱ ታጅቦ በአባቱ ክብር ይመጣል፡፡ ወንጌላዊው ቅዱስ ዮሐንስም በራእዩ፡-
ታላቅም ድምፅ ከሰማይ፡- እነሆ የእግዚአብሔር ድንኳኖች በሰዎች መካከል ነው፣ ከእነርሱም ጋር ያድራል፣ እነርሱም ሕዝቡ ይሆናሉ፡፡ እግዚአብሔርም እርሱ ራሱ ከእነርሱ ጋር ሆኖ አምላካቸው ይሆናል፡፡ እንባዎችንም ሁሉ ከዓይናቸው ያብሳል፣ ሞትም ከእንግዲህ ወዲህ አይሆንም፣ ሐዘንም ቢሆን ወይንም ጩኸት ወይም ስቃይ ከእንግዲህ ወዲህ አይሆንም፡፡ የቀደመው ስርዓት አልፏልና ብሎ ሲናገር ሰማሁ፡፡ በዙፋኑም የተቀመጠው ሁሉን አዲስ አደርጋለሁ አለ፡፡ አዎን በቶሎ እመጣለሁ ይላል፡፡
አሜን ጌታ ኢየሱስ ሆይ ቶሎ ና! ማራናታ!
ሰላም! ሻሎም!

10 comments:

  1. Well, I thaught commentator Fikir could have his own views in answering the question he rasied as his topic sentence ," Does God really exist? If so,what is he doing?" What is he doing about the untold sufferings people ,especially innocent people continue to experience?? Does it really make sense to 'punish " the majority of the innocent creatures in order to show the consquences of committing sin ? There is no doubt this planet earth was created or came into being so that humanbeing live on it and work hard ,and enjoy his life . Unfortunately enough, although the level of dislike or hatred various from one era to another, the history of misery and suffering is as old as human history iteslf. If God has created this planet as suitable place to live ,not as the another place of misery or hell, I do not understand the reason to punish the people all together( the good and the bad - the sinful and the non-sinful).

    The writer of this article went back to the usually bibicilac citations as if htese citations are new findings. I do not thnik the ansewrs for a very paradoxical phenomenon is as simple as that. Any way, the question and very doubt about the answers for this and many other issues remain part of our nature aand lives.

    ReplyDelete
  2. ጥሩ ትንተና ነው:: ሆኖም ግን የችግራችን ዋና ምንጩ ምን እንደሆነ ቢጠቆም መፍትሄውን ለመጠቆም ያመች ነበር:: ችግር ያለብን መሆናችንን ራሱ ችግሩ ይናገራል:: በፓለቲካው በኩል መልካም አስተዳድር ማጣት: በኢኮኖሚው ረገድ ደግሞ አይደለም ለእድገት የሚያበቃ ደረጃ ላይ መድረስ ይቅርና የእለት ምግብ እስከማጣትና ተመጽዋች መሆንን: በማህበራዊ ኑሯችንም ቢሆን በትቢትና በራስ ወዳድነት በሺታ በመለከፋችን ምክናያት ተማምነንና ተመካክረን ቁም ነገር መሥራት
    ያቃተን ስንሆን የክርስትና ደሴት እያልን በምንኮፈስበት 'ክርስትናችንም' ፍቅር ሳይሆን ጥላቻን: መልካም ነገርን ሳይሆን ክፋትን ጥንቆላንን አስማተኛነትን ሰላቢነትን የተለማመድን ከመሆናችንም በላይ በጌታ ኢየሱስ ወንጌል ፋንታ ልዩ ወንጌል በመስበክ በመርገም ውስጥ የምንገኝና ታሪካችን የተበላሸብን ነን::

    ስለዚህ ወንድሜ ፍቅር ይህ የጠለቀና ሰፊ ትንተና እንዳለ ሆኖ ይህን የተበላሸን ታሪክ ሕይወት ለመስጠትና እውነተኛ ፈውስ እንዲመጣ በመጀመሪያ የሁሉም ነገር ዋና ቁልፍ በሆነው መንፈሳዊ ሕይወታችን ላይ አፋጣኝ እርምጃ ተባብረን መውሰድ ይኖርብናልና በዚህ ላይ ብዙ ለመሥራት በቅንነት ብንነሳ???

    ሰላም ይዛልህ

    ሰላም ነኝ

    ReplyDelete
  3. Thank you for the good things you shared. Howerver, why do you hate the Shoan Teguletoch? When was that the northerners came to Tegulet seeking bread to only be denied by the Shoan Teguletoch? Is there any such culture of greed among Shoan Teguletoch? To deny bread to people? Oh! The writer has the utmost hate for Shoans and all his good words are contaminated by this hateful attitude.

    I have been to Tegulet and other provinces and did not see such kind of greed that could warrant this kind of outrageous statement. Overall, what I know is that sharing is very natural in the overall Amhara culture. The writer is not honest; he is simply a hater.

    ReplyDelete
  4. ወይ ፍቅር አናተም መናፍቅ ሆንክ አጻጻፍክ ሁሉ እኮ ኦርቶዶክሳዊ ላሕይ አጥቷል። ምን ሆነህ ነው ግን? ምን አስነኩህ እነዚህ መናፍቃን?

    ReplyDelete
  5. ante sew menefke ende? bemenafekan belog lay Yemetesefew? ene deje selam ene yebeserat eyeta yet hedew new ezhe yemetenegodagodew.

    ReplyDelete
  6. የባሕር ማዶዋ የብዕር ወዳጄ ሰላም የባለፈው ወቀሳሽን አልዘነጋሁትም ‹‹ከታሪክ እውቀትህ አኳያ በማንኪያ ያህል እንኳን አላቃመስከንም…›› ያልሽው ወቀሳሽ ይኸው ጊዜና ዕድሉን አግኝቼ ‹‹በሀለዎተ እግዚአብሔርና በፈጣሪ ስለማመን›› በዓለማችን እውቅ ፈላስፋዎች እሳቤና በሀገራችን አሰቃቂ ታሪክ ውስጥ ያለውን አንድምታ በተመለከተ በዚህ ለዘመናትና አሁንም በእኛ ዘመን ምናልባትም እስከ ዓለም ፍፃሜ ድረስ ‹‹እግዚአብሔር አለ ወይስ የለም ካለስ ሥራው ምንድን ነው›› በሚል ዙሪያ ይህቺን አጠር ያለ ጹሑፍ አዘጋጀሁ፡፡ ባለፈው ሳምንት በሀገር ቤት በሚታተመው አዲስ አድማስ ጋዜጣ ላይ ዶ/ር ፈቃደ የተባሉ ጸሐፊ ‹‹ድምፂቱ… ለእነ እንዴት እንመን ለሚሉ ወገኖች›› በሚል ያስነበቡት ጠንከር ያለ የመከራከሪያ አሳብ የተንሸራሸረበት መጣጥፋቸው ለዚህ መጣጥፍ ጥሩ ወኔና መነቃቃት ሆኖኛል፡፡

    ምናልባት የአዲስ አድማስ ጋዜጣ በድረ ገጽ ስላለ ጹሑፋቸውን ማግኘት ትችያለሽ፡፡ ለወቀሳሽ ብዘገይም Late is better than Never እንደሚባለው ነውና አንቺም ሆኑ ሌሎች በታሪክ እውቀት ላይ ፍቅር ያላቸውን ወገኖቼንና ክቡራን አንባቢዎቼን ፍላጎት ለመመለስ እጅግ በጥቂቱ የአቅሜን ያህል ሞክሬያለሁ ለማለት እደፍራለሁ፡፡ መልካም ንባብ የባሕር ማዶዋ የብዕር ወዳጄ ሰላምና የአባ ሰላማ አንባቢዎች!

    ReplyDelete
  7. የዚህ ድረ ገጽ አዘጋጆች ጥሩ የተወጣላችሁ መርጌቶች ናችሁ (ገፋ ቢል ከጳውሎስ የተመረቃችሁ ትሆናላችሁ።) እውነት ነው ገድላትና ድርሳናትን በማበጠር ረገድ ደህና አቅም እንዳላችሁ በጥቂት ፈገግ የሚያሰኙ ስራዎቻችሁ ለማየት ችለናን። በአንጻሩ ግን ከነገረ መለኮት ጋር በተያያዙ የምታወጥዋቸው ጽሑፎች ግን የትምህርታችሁ ልክ ከአንድምታ (ከሽምደዳ) ያልዘለለ ለመሆኑ በቂ ማስረጃዎች ናቸው። በመጽሐፍ ቅዱሳዊ ነገረ መለኮት (biblical theology)፣ ታሪካዊ (Historical theology) እንዲሁም የተለያዩ አስተምህረዎችን (systematic theology) ዙሪያ በእጅጉ ትንፋሽ ሲያጥርባችሁ ለማየት ተችለዋል።

    የጽሑፉ ተፋለሶች
    1. ሰው/ምድር በምንም ዓይነት የከፋና የከረፋ ህይወት ቢሆንም በቅድሳት መጻሕፍት ራሱን የገለጠ እግዚአብሔር አይለኩትም። እግዚአብሔር እርሱ አምላክ ፈጣሪም እንደሆነ ለማወቅ ደግሞ ቅድሳት መጻህፍትን ቁጭ ብለህ በሚገባ ማንበብ፣ ማጥናት፣ መመርመርና መማርን ይጠይቃል። ዘፍ. 1፣1, ኢሳ. 40፣ 28, 43፣13, ኤር. 51፣ 15
    2. ፀሐፊው እንደ ማንኛውም አንድ ምእመን የሚመስላቸውን አስተያት ሰጡ እንጂ መጽሐፍ ቅዱሳዊ ጭብጥ ላይ ተመርኩዘው የፃፉት ላለመሆኑ። "ሀገረ-እግዚአብሔር ተብላ በምትጠራ ምድር፣ ሕዝቦቿ በእጅጉ ሃይማኖተኛ ናቸው ተብለው ለሚነገርላት ኢትዮጵያ ይሄ ሀገሪቱ በዓለም መድረክ የጦርነትና የራብ ምድር ተደርጋ የመገለጹ እውነት ብዙዎችን እያሳቀቃቸው ዓይናቸውን ወደ ጸባዖት በማንሳት ጠዋት ማታ አንተን የምትማጠን ኢትዮጵያንና ሕዝብህን እንዲህ ለአሰቃቂ ሞትና ለቅጥ የለሽ መከራ የዳረግበህት ምክንያቱ ምን ይሆን… በማለት ፈጣሪን የሚሞግቱና የሚጠይቁ በርካታ ሰዎች ዛሬም ድረስ በመቅደሱ አሉ፡፡" ሰው ለሚገኝበት ሕይወት የቆመበት መንገድ ከመመርመር ይልቅ ዛሬም "ለምን?” በማለት በእግዚአብሔር ላይ ጥያቄ ያለው ሰው ካለ መልሱ መጽሐፈ ዕንባቆም በማንበብ ያገኙታል። ለአማኞች የተጻፈ መጽሐፍ ቅዱስ ሰዎችን ከስህተት ለመጠበቅና ከሰዎች ስህተት ለመማር መሆኑንም ሳይዘንጉ።
    3. ፀሀፊው ለራሱ በስሙ ያልታጠበ፣ በመንፈሱ ያልተቀደሰ፣ ያልተለወጠ፣ ያልዳነና ህይወት ያልቀመሰ ከነ አሮጌ ማንነቱ የሚመላለስ የአፍአ ለመሆናቸው የጽሑፉን መንፈስ ማሽተት በቂ ነው። "ምድራችን ስለተራበቸው ፍቅር፣ ምሕረትና ፍትህ እንዲሁም በሰው ልጆች መካከል ስለነገሰው መከራ፣ ዋይታና ሰቆቃ ነፍሳችን በእጅጉ እያነባች በዚሁ ሁሉ ምስቅልቅልና ቀውስ ውስጥ ‹‹እግዚአብሔር የት እንዳለና ምን እየሰራ እንደሆነ›› ግራ በመጋባት ፈጣሪን የምንጠይቅ ሰዎች በተለይ ራብ፣ ችጋር፣ የከፋ የእርስ በርስ ጦርነትና መከራ ዕጣ ፈንታችን እስኪመስል መገለጫችን ለሆንን ለእኛ ኢትዮጵያን ሕዝቦች ግን ለምን… ለምን? በማለት ለዘመናት መልስ ያጣንበት እንቆቅልሻችን እንደሆነ ይሰማኛል፡፡" መሬት መሬት የሚመለከት ሰው ድንጋዩ ማን ያንከባልልኛል በማለት በእንቆቅልሽ መመላለሱ አይቀርም። ከእንቆቅልሽየ የቀን ቅዠት ሕይወት ለመውጣት ወደ ላይ ቀና ብለህ ማለት ነው መድሃኒቱ።
    4. "በጹሑፌ መግቢያ ወዳነሳሁት ጭብጥ ልመለስ፡-በምድራችን ላይ ስለነገሰው ይህ ሁሉ ግፍ፣ መከራና ጉስቁልና፣ ስለ ሰው ልጆች ስቃይ፣ ስለ ንጹኃን እልቂት፣ ስለ ድኆች ጩኸትና ዋይታ የሚገደው እግዚአብሔር አለን ካለስ ይህን ሁሉ ግፍ እያየ ለመሆኑ ምን እየሰራ ይሆን? ከላይ እንደገለጽኩት ሃይማኖተኝነት በሚጎላበት ሕዝባችን መካከል ክስተቶችን ከእግዚአብሔር ምሕረትና መዓት ጋር ማገናኘት በረጅም ዘመን ታሪካችን ውስጥ የምንታዘበው ሐቅ ነው፡፡" ጸሐፊው ከሁለት መሰረታዊ የነገረ መለኮች ጭብጦች ካለመተዋወቃቸው የተነሳ ዓለም በላያቸው ላይ እንደተደፋባቸው አልደበቁንም። አንደኛ. መጽሐፍ ቅዱስ ማዕከል ያደረገ የመጽሐፍ ቅዱስ ሊቃውንት ስለ ሃጢአትና አመጻን (doctrine of sin and doctrine of evil) በተመለከተ ሰፊ ሐተታ ሰጥተውበት አልፈዋል። ከመጻህፍት ዓለም ካለመተዋወቅ የተነሳም የእግዚአብሔር ህልውናን ከሌሎች ከፍ ሲሉ ካነስዋቸው ነጥቦች መለየት አቅቶአቸው የሌለ ነገር ለመታዘብ በሽታ ተዳርገዋል። መስሉ መጽሐፍ ቅዱስ ስለ ግፍ፣ መከራና ጉስቁልና፣ ስለ ሰው ልጆች ስቃይ፣ ስለ ንጹኃን እልቂት፣ ስለ ድኆች ጩኸትና ዋይታ ምን ይላል? መነሻውስ ምንድን ነው? በማለት ቁጭ ብለው ያጠኑና የመረመሩ እንደሆነ መልሱ በቀላሉ ያገኙታል። የእርስዎን (ጸሐፊውን) አለመማርና አለማውቅም እግዚአብሔር ጥያቄ ውስጥ አይከተውም።

    በመፅሐፈ ኢዮብ ዙሪያ

    "እንደ ኢዮብ ሁሉ በራሳችን/በግል ሕይወታችንም ሆነ በቤተሰብ ይሁን በሀገር ደረጃ መልስ ስላጣንበት ምድራችን ስለተራበቸው ፍቅር፣ ምሕረትና ፍትህ ኃጢአተኞችና ክፉዎች ስለሰለጠኑበት ሁኔታ እንዲሁም በሰው ልጆች መካከል ስለነገሰው መከራ፣ ዋይታና ሰቆቃ ነፍሳችን በእጅጉ እያነባች በዚሁ ሁሉ ምስቅልቅልና ቀውስ ውስጥ እግዚአብሔር የት እንዳለና ምን እየሰራ እንደሆነ ግራ በመጋባት ፈጣሪን የምንጠይቅ ሰዎች በኢዮብ ሕይወት እንደታየው እግዚአብሔር መልሶ እኛኑ ስለ ኃይሉ ፍጹምነት፣ ስለ ታላላቅ የእጆቹ ሥራዎች፣ ስለማይመረመር ፍርዱና ምሕረቱ በመጠየቅ አፋችንን በመገረም አስይዞን ካለ እርሱ ከሰዎች ሁሉ ይልቅ ምንኛ ምስኪንና ጎስቋላ መሆናችን በመግለጽ በፍቅር ኃይል፣ በእምነት ዓይን፣ በማስተዋል ልቦና ስራውን በአንክሮ እንድናስተውል ያሳስበናል፡፡" በኢዮብ መጽሐፍ እግዚአብሔር አመጣ ደግሞም እግዚአብሔር መልሶ ሰጠ! ይህ ሊሆበት የቻለም ኢዮብ ባያውቀም ሰይጣን ኢዮብ ሲከስ ጠበቃው እግዚአብሔር ነበር። የኢዮብ ፍጻሜም ባሳየው ጽናትና ትዕግስትም ነው እንበል። የኢትዮጵያ ሕዝብ ነባራዊ የህይወት ገጽታስ እግዚአብሔር አመጣው እግዚአብሄር ደግሞ መልሶ ይክሰናል ነው አንድምታው? ወደው አያለቅሱ! ወዳጄ እንዲህ ያለ ትላቀት ያላቸው ስለመንፈሳዊ ነገር ለመጻፍ ከመነሳትዎ በፊት ኪዳንዎትን ለይተው ይወቁ ዘንድ ይመከራሉ።

    በመጨረሻ ያስጻፎት የወገንዎ መንፈሳዊ ኪሳራና ስጋዊ ስብራት ከሆነ Love is the Answer no matter what the question! ያሉትን Jesus is the Answer no matter what the question! በሚለውን ይስተካከል። ልጅ ለአባት ስም እንደማያወጣለት ሁሉ ፍቅርም እንዲሁ በኢየሱስ የተለወጠ ማንነት የሚወጣ ፍሬ ነው።
    ይልቁንስ ተግተው ይጸልዩ! (ለጸሐፊው ) ማቴ. 26፣ 41

    ReplyDelete
  8. በፍቅር ለይኩን ለጹሑፎችህ ኮፒ ራይት የለህም እንዴ… እነዚህ በነጋ ጠባ በስድብ፣ አባቶቻችንን በማዋረድና ማኅበረ ቅዱሳንን በማጥላላት ሥራ ላይ የተጠመዱ ብሎጎች ለመሆኑ ጹሑፎችህን ከጋዜጣና ከመጽሔቶች ላይ እያደኑ ለማውጣት የአንተን ፈቃደኝነት ይጠይቃሉ፤ ወይስ እንደው አገኘን እያሉ ነው እንዲህ ዓይነቱን ድንቅና አስተማሪ ጹሑፎችን በመዝረፍ ስድብንና ማጥላላትን ለተሞላው ብሎጋቸው ማድመቂያ የሚያደርጉት፡፡ ለእንዲህ ዓይነቶቹ ብሎጎች ይህ ጹሑፍ በጭራሽ አይመጥንም እነርሱ እንደለመዱት ስድብን፣ ጥላቻን፣ ማጥላላትን በወንድሞች መካከል መለያየትን ይዝሩ እንጂ እንደ ጌታችንና መድኃኒታችን ኢየሱስ ክርስቶስ ወንጌል ቃል የመንፈስ አንድነትን፣ ፍቅርን፣ ሰላምንና ይቅርታን ለመስበክ መች ታደሉና…!? እንዴት በቤተ ክርስቲያን ስም ብሎግ ከፍቶ ቤተ ክርስቲያንን መከፋፈልና ወንድሞችን መለያየት እኩይ ሥራ ውስጥ ይገባል? የአባቶቻችን አምላክ ልዑል እግዚአብሔር ለሁላችን ፍቅርንና አንድነትን ይስጠን፣ ቤተ ክርስቲያንንም በሰላምና በመንፈስ አንድነት ይጠብቅልን!
    ከታዛቢዎች አንዱ ነኝ!

    ReplyDelete
  9. ሰመንተኛው አስተያየት አቅራቢ( ኢዮብ ተከሳሽ ሰይጣን ከሳሽ እግዜር ጠበቃ)ብሏል ለመሆኑ ከፍተኛው
    ፍርድ ሰጭሽ ማን ይሆን መጻፍ ያነበቡ ይመስላል፤ ዳሩ ግን ፈጣሪን ጠበቃ ካሉ ክፍያ ያስፈልጋል፤
    መጽሓፉንም ከእግር እስከራስ እንደገና ይመለከቷል፤ እግዚአብሔርም ፈራጅ እንጂ ነገረ ፈጅ(የነገር አባት)
    አለመሆኑን ይገነዘቧል

    ReplyDelete