Wednesday, August 27, 2014

ማርያም ቤዛዊተ ኩሉ ዓለም ብትባል ችግሩ ምንድነው?

Read in PDF

ማኅበረ ቅዱሳን የተባለው ስብስብ ለኦርቶዶክሳዊት ትምህርት ዋና ጠበቃ ነኝ በማለት ከእኔ በላይ ለአሳር የሚል የግብዞች ስብስብ መሆኑ ይታወቃል፡፡ ኦርቶዶክሳዊ ትምህርት የሚለውም ምርቱና ግርዱ ያለየውን አሰስ ገሰሱን ሁሉ ነው እንጂ በመጽሐፍ ቅዱስ ላይ የተመሰረተውንና ከእርሱ ጋር የማይጣላውን ትውፊታዊ ትምህርት ብቻ አይደለም፡፡ ለማቅ መጽሐፍ ቅዱስ ከቤተክርስቲያን መጻሕፍት አንዱ እንጂ ዋናው አይደለም፡፡ ይህን አስተያየት ከዚህ ቀደም የማቅ አንዱ አውራ የሆነው ዳንኤል ክብረት ለዕንቁ መጽሔት በሰጠው አስተያየት መናገሩ ይታወሳል፡፡ እርሱ እንዲህ ነበር ያለው “የብዙ መጻሕፍት ባለቤት የሆነችውን የኢትዮጵያ ኦርቶዶክስ ቤተክርስቲያንን እንዴት በአንድ መጽሐፍ ቅዱስ ተሳስተሻል ትባላለች?” ይህ የአላዋቂ አስተያየት ነው፡፡ ለዳንኤልና ለመሰሎቹ መጽሐፍ ቅዱስ የክርስትና ትምህርት ሁሉ ምንጭ ሳይሆን ከቤተክርስቲያን መጻሕፍት አንዱ ነው፡፡ ያሳዝናል!! እንዲህ ከሚያምንና ከሚያስተምር ስብስብ የጠራ የክርስትና ትምህርት ማግኘት ዘበት ነው፡፡ ታዲያ ማርያም ቤዛዊተ ዓለም ብትባል ምን ችግር አለው ቢሉ ምን ይደንቃል፡፡
የማህበረ ቅዱሳን ሰዎች ያላቸውን የዘመናዊው ትምህርት ዕውቀት መጽሐፍ ቅዱስን ለማጣመምና እንደ አሰስ ገሰስ ለሚቆጠረው የስህተት ትምህርታቸው ቃሉን እየጠመዘዙና እያጣመሙ ሽፋን ለማድረግ ነው የሚጠቀሙበት፡፡ ማርያም ቤዛዊተ ኩሉ ዓለም ትባላለች የሚለውን ዓይን ያወጣ የስሕተት ትምህርት ከማውገዝ ይልቅ ሊስማማው ቀርቶ አብሮት ሊሄድ የማይችለውን ጥቅስ በግድ እየለጠፉበት ድጋፍ ይሁነን ይላሉ፡፡  

Saturday, August 23, 2014

በጾመ ፍልሰታ ሲመለክ የሠነበተው ማነው?



የኢትዮጵያ ኦርቶዶክስ ተዋሕዶ ቤተ ክርስቲያን ድንግል ማርያምን አከብራታለሁ እንጂ አላመልካትም ስትል በተደጋጋሚ ተደምጣለች፡፡ ይህ አባባል ትክክል ነው፡፡ በዚህ በኩል ሁሉም አብያተ ክርስቲያናት የሚስማሙ ይመስለናል፡፡ ድንግል ማርያምን የማያከብር ክርስቲያን ሊኖር አይችልምና፡፡ ሆኖም ልዩነት የሚፈጠረው አክብሮት የሚባለው ጉዳይ አምልኮት ሆኖ ሲገኝ ነው፡፡ ድንግል ማርያም ጌታ ለእናትነት የመረጣት ብትሆንም ከቅዱሳን አንዷ ናት እንጂ ወደአምላክነት ደረጃ ከፍ ያለች ሌላ አካል አይደለችም፡፡


 በኦርቶዶክስና በካቶሊክ አብያተ ክርስቲያናት ዘንድ ግን እርሷን በማክበር ስም ድንግል ማርያም እየተመለከች ትገኛለች፡፡ በዚህ ሐሣብ ብዙዎች እንደማይስማሙ ይታወቃል፡፡ የማይስማሙትም የድንግል ማርያም ክብር የተነካና እርሷ የተዋረደች ስለሚመስላቸው ነው፡፡ እውነታው ግን እነርሱ እንደሚያስቡት አይደለም፡፡ ድንግል ማርያም በአክብሮት ስም እየተመለከች ነው ማለት እየታየ ያለውን እውነታ መግለጽ እንጂ እርሷን ማዋረድ ሊሆን በፍጹም በፍጹም አይችልም፡፡ ይህ ከቶም የማይታሰብ ነውና፡፡
በተጠናቀቀው በጾመ ፍልሰታ በርካታ ኦርቶዶክሳውያን በየገዳማቱና አድባራቱ ሱበኤ ገብተው እንደሰነበቱ ይታወቃል፡፡ በእግዚአብሔር ፊት ሱባኤ ገብቶ መጸለይ መልካም ነው፡፡ ችግሩ በሱባኤ ስም በእግዚአብሔር ፊት ሳይሆን በማርያም ስም መገኘቱ ነው፡፡ እስኪ እውነቱን እንነጋገር! ሰዉ በዚህ የጾም ወቅት ሱባኤ የገባው ወደማን ለመጸለይ ነው? ወደእግዚአብሔር ወይስ ወደ ማርያም? በሱባኤው ሲመለክና ሲወደስ የሰነበተው ማነው? እግዚአብሔር ወይስ ማርያም? በሱባኤው ውዳሴው ቅዳሴው ሲተረጎምለት ሲቀደስለት የነበረው ማነው? እግዚአብሔር ወይስ ማርያም? መልሱ ቀላል ነው፡፡ ማርያም ናት፡፡ 

Monday, August 18, 2014

እስከ መቼ?

Read in PDF

ምንጭ፡- ጮራ ብሎግ
የሰው ልጅ በኑሮው ውስጥ እውነተኛ ፍርድን ይፈልጋል፡፡ የክፉዎች ተራ ሲያበቃና እውነት ስፍራዋን ስትይዝ ማየት ይናፍቃል፡፡ እውነትን ሁሉም ጥቁር ካባ ሲያለብሳት፥ እውነተኞች ጥላሸት ሲቀቡ ማየት ለእውነተኞች ሕመም አለው፡፡ እውነት በሌለበት ፍርድ የለምና እውነትና ፍርድ በጠፋበት ዓለም ላይ እውነተኞች ፍርድን ከሰማይ ይናፍቃሉ፡፡ የሰማዩ ፍርድ የዘገየ ሲመስልም እስከ መቼ? ይላሉ፡፡ ዐልፎ ዐልፎ የእውነት ጊዜ ብልጭ ይልና ብዙ ሳያጣጥሙት ቶሎ ድርግም ይልባቸዋል፡፡ የሐሰት ዘመን ሲረዝምባቸውም በሐዘን ድምፅ እስከ መቼ? ይላሉ፡፡
ሰው ስለ እውነት ከእግዚአብሔር ካልተማረ÷ ኑሮው የሚያስተምረው ጥቂቱን ነው፡፡ የእድሜ ርዝማኔም በራሱ የእውነትን ዕውቀት ለመግለጽ የሚያደርገው አስተዋፅኦ ብዙ አይደለም፡፡ የታሪክ ክምርም ወደ እውነት አያደርስም፡፡ ወደ እውነት ለመድረስ እግዚአብሔር የዘመን ደወል ያደረጋቸውን እውነተኞቹን መምህራን ማድመጥ ይጠይቃል፡፡
ዕውቀት ክብር ባላገኝበት አገር ሊቃውንት ተጨንቀውና ፈርተው ይኖራሉ፡፡ ጆሮ ጠገቦች ደግሞ ይፋንናሉ፡፡ ዕውቀታቸውን ለሥጋ ማደሪያ የሸጡ ሰዎች ደግሞ የነፍሰ ገዳዮች አዝማች ይሆናሉ፡፡ አለማወቅ እንደ ሃይማኖተኛ፥ ማወቅ እንደ መናፍቅ የሚቈጠርበት አገር ይልታደለ አገር ነው፡፡ የሃይማኖት ማእከል የሆነው መጽሐፍ ቅዱስ ተከድኖ ወግና ልማድ መጽሐፉን ተክቶ የሚመራበት አገር ትውልድን ለዘላለማዊ ሞት ይወልዳል፡፡ ባለፈው ታሪክ እየተዝናኑ የሚኖሩ መምህራን ባሉበት አገር “ጉረኛ” እንጂ እውነተኛ ትውልድ አይፈጠርም፡፡

Tuesday, August 12, 2014

እንክርዳዱን ማን ዘራው?

Read in PDF

ምንጭ፡-ተሐድሶ ዘኦርቶዶክስ ተዋህዶ ብሎግ

ቤተ ክርስቲያንን ታሪክ ስናጠና ክርስቶስ ቤተ ክርስቲያንን የሠራበት እውነት “ኢየሱስ እርሱ የሕያው እግዘአብሔር ልጅ ክርስቶስ ነው” (ማቴ.16፥16) የሚለው በእግዚአብሔር አብ የተገለጠ እውነት ነው፤ ማንም ሰው ወደ ቤተ ክርስቲያን ሲጨመር ይህን እውነት በልቡ አምኖ በአፉ ሊመሰክር ይገባዋል (ሮሜ 10፥9-10)፡፡
በክርስቶስ መሠረትነት የተመሠረተችው ቅድስት ቤተ ክርስቲያን እግዚአብሔር የዘለዓለም ሕይወትን የሚሰጥባት የሕይወት እርሻ ናት፡፡ ሐዋርያው ቅዱስ ጳውሎስ “የእግዚአብሔር እርሻ ናችሁ፤ የእግዚአብሔር ሕንጻ ናችሁ፤ ከእርሱ ጋር አብረን የምንሠራ ነንና” (1ቆሮ.3፥9) ሲል የገለጣት ቤተ ክርስቲያንን ነው፡፡ ክርስቶስ በማቴዎስ ወንጌል ምዕራፍ 13 በተለያዩ ምሳሌዎች ቤተ ክርስቲያንን ገልጧታል፤ ከእነዚህ ምሳሌዎች አንዱ እርሻ ነው፡፡ የእርሻው ባለቤት ራሱ እግዚአብሔር (ክርስቶስ) ነው፡፡ ይህ ጽሑፍ በተለይ በማቴዎስ ወንጌል 13፥24-30 የተመዘገበውን ምሳሌና በዚሁ ምዕራፍ ከቍጥር 36-43 ያለውን ትርጓሜ መሠረት ያደረገ ነው፡፡



ማቴዎስ 13፥24-30 “ሌላ ምሳሌ አቀረበላቸው እንዲህም አለ፦ መንግሥተ ሰማያት በእርሻው መልካም ዘርን የዘራን ሰው ትመስላለች። ሰዎቹ ሲተኙ ግን ጠላቱ መጣና በስንዴው መካከል እንክርዳድን ዘርቶ ሄደ። ስንዴውም በበቀለና በአፈራ ጊዜ እንክርዳዱ ደግሞ ያን ጊዜ ታየ። የባለቤቱም ባሮች ቀርበው። ጌታ ሆይ፥ መልካምን ዘር በእርሻህ ዘርተህ አልነበርህምን? እንክርዳዱንስ ከወዴት አገኘ? አሉት። እርሱም፦ ጠላት ይህን አደረገ አላቸው። ባሮቹም። እንግዲህ ሄደን ብንለቅመው ትወዳለህን? አሉት። እርሱ ግን፦ እንክርዳዱን ስትለቅሙ ስንዴውን ከእርሱ ጋር እንዳትነቅሉት አይሆንም። ተዉአቸው፤ እስከ መከር ጊዜ አብረው ይደጉ፤ በመከር ጊዜም አጫጆችን። እንክርዳዱን አስቀድማችሁ ልቀሙ በእሳትም ለማቃጠል በየነዶው እሰሩ፥ ስንዴውን ግን በጎተራዬ ክተቱ እላለሁ አለ።”  

Tuesday, August 5, 2014

ፍልሰታ ለማርያም እውነተኛ ወይስ የፈጠራ ታሪክ?

Read in PDF

“እመቤታችን ቅድስት ድንግል ማርያም ከቅዱሳን ሐዋርያት ሲተላለፍ በመጣው ትውፊት በተገለጠው መሠረት በ64 ዓመት ዕድሜዋ በጥር 21 ቀን ዐርፋለች፡፡ መላእክት ሥጋዋን አሳርገው በገነት ከዕፀ ሕይወት ሥር አኖሩት፡፡ በዚያው ዓመት ሥጋዋ እስከ ነሐሴ 14 ቀን በገነት ከቆየ በኃላ ነሐሴ 14 ቀን መላእክት አምጥተው ለሐዋርያት ሰጡአቸውና በጌቴሴማኒ ቀበሩአት፡፡ በሦስተኛው ቀን ነሐሴ 16 ቀን ተነሥታ በክብር ወደ ሰማይ ዐርጋለች፡፡ የኢትዮጵያ ኦርቶዶክስ ቤተክርስቲያን ስለ ቅድስት ድንግል ማርያም ዕረፍት ትንሣኤና ዕርገት ይህን ታምናለች፡፡ በየዓመቱም ነሐሴ 16 ቀን የፍልሰትዋን መታሰቢያ በታላቅ ሥነ ሥርዓት ታከብራለች (ስንክሳር ነሐሴ 16 ቀን)፡፡”

እንዲህ የሚለው “የኢትዮጵያ ኦርቶዶክስ ተዋህዶ ቤተክርስቲያን ሥርዓተ አምልኮትና የውጭ ግንኙነት” የተሰኘው መጽሐፍ ነው። ይህ መጽሐፍ በብፁዓን ጳጳሳትና በሊቃውንተ ቤተክርስቲያን በጋራ የተዘጋጀ ሥራ በመሆኑ የቤተክርስቲያኗ ልሳን ነው። ከዚህ አንጻር ተቀባይነቱ ከፍተኛ እንደሆነ ይታመናል። ይሁን እንጂ በአንዳንድ ሁኔታ ለእግዚአብሔር ቃል ታማኝ ሆኖ አይገኝም። በትውፊት ስም ከመጽሐፍ ቅዱስ ትምህርት ጋር የሚጣረሱ ትምህርቶችን በቅዱሳን ሐዋርያት ስም “ከቅዱሳን ሐዋርያት ሲተላለፍ በመጣው ትውፊት” መሠረት እያለ ያቀርባል። መጽሐፉ “ትውፊት ከቅዱሳት መጻሕፍት ምስጢርና ትርጉም ጋር የሚቃረን አይደለም” ቢልም (ገጽ 47) መጽሐፍ ቅዱሳዊ መሠረት የሌላቸውንና ከጊዜ በኋላ የተፈጠሩ ትምህርቶችን በትውፊት ስም ተቀባይነት እንዲኖራቸው ያደርጋል። ትውፊት አስፈላጊ ነገር መሆኑ ባያከራክርም በክርስትና ትምህርትና ሥርዓት ውስጥ ተቀባይነት ያለው ትውፊት ግን ከትውልድ ወደ ትውልድ እየተላለፈ የመጣ ብቻ ሳይሆን ከመጽሐፍ ቅዱስ ጋር የማይቃረን መሆኑ ነው፡፡