Thursday, July 30, 2015

“መድሎተ ጽድቅ” በመድሎተ ጽድቅ ሲመዘን (ክፍል አንድ)

 READ IN PDF

ምንጭ፡- ጮራ http://www.chorra.net



መንደርደሪያ
ታላቁ ሊቅ አለቃ መሠረት ስብሐት ለአብ “ስምዐ ጽድቅ ብሔራዊ” በተባለውና መሠረታውያን የኾኑ የክርስትና ትምህርቶችን በእግዚአብሔር ቃል መሠረትና የጥንት አበውን ምስክርነት በመጥቀስ ባዘጋጁት መጽሐፋቸው መቅድም ላይ፥ መጽሐፉ የተጻፈበትን ምክንያት ካተቱ በኋላ እንዲህ ብለው ነበር፤
… ይህን ሁሉ ማተታችን መምህራኑ የማያውቁት ኾነው እነርሱን ለማስተማር አይደለም። ነገር ግን የዚህን ሐሳብና ምስጢር ቃለ መጻሕፍትን መመገብ የሚያዘወትሩ ሊቃውንት እያወቁት ሳለ፥ ብዛት ያላቸው መሃይምናን አያውቁትም። አያውቁምና መምህራን ለማነጽ ጠቃሚ መኾኑን ተረድተው የሚደግፉትን፥ ‘ለሕዝበ ክርስቲያንም ይረባል’ ሲሉ የሚያቅዱትን ጥልቅ አስተያየት፥ በመጽሐፍ ቅዱስ ትምህርት ያልጸና የመሃይምናኑ አእምሮ እንደማይደርስበት የታወቀ ቢኾንም (፩ቆሮ. ፪፲፩)፥ መሃይምናኑ ራሳቸው ስለ ሃይማኖት ያላቸው ዕውቀት ዝቅተኛ መኾኑን መዝነው ስፍራውን ይለቅቁላቸው ዘንድ ተገቢ በሚኾንበት ፈንታ፥ ሊቃውንቱን በመናፍቃን ስም ቀብተው ‘አብዝኆ መጻሕፍት ያዘነግዕ ልበ።’  የሚል የአረማዊውን የፊስጦስን ቃል እየጠቀሱ (የሐዋ ፳፮፥፳፬) ወዲያውኑ እንደ ተለመደው በሠለስቱ ምእት ሊቃውንት ወንበር ላይ ተቀምጠው ሊፈርዱባቸው እንዳይቸኵሉና በዚሁ አስገራሚ አኳኋን የቤተ ክርስቲያንዋ መሻሻል ዕድል እንዳይሰበር አሥጊ መኾኑን ብቻ ለማሳሰብ ነው። (መሠረት 1951፣ ገጽ 15 አጽንዖት የግል)
በርግጥም አለቃ ያሉት የደረሰ ይመስላል። ዛሬ ትልቁ ችግር መሃይምናኑ የሊቃውንቱን ስፍራ መንጠቃቸውና በእነርሱ ወንበር ላይ ተቀምጠው ሊቃውንቱን “መናፍቅ” የሚል ስም ቀብተው ለመፍረድ መቸኰላቸው ነው። ይህም እርሳቸው እንዳሉት የቤተ ክርስቲያንን መሻሻል ወደ ኋላ የሚጐትት እንዳይኾን ያሠጋል። በዚህ አጋጣሚ ሌላውን ቀድሞ መናፍቅ ማለት አማኝ ለመኾን ማረጋገጫ እንዳልኾነ፥ በዚህ መንገድ መናፍቅ በመባልም መናፍቅ መኾን እንደሌለ መግለጥ እንወዳለን።  

ለዚህ ጽሑፍ መነሻው ያረጋል አበጋዝ የተባለ ዲያቆን “መድሎተ ጽድቅ” በሚል ርእስ የጻፈውና አሳትሞ መጋቢት 2007 ዓ.ም. ለገበያ ያቀረበው መጽሐፍ ነው። መጽሐፉ ተሐድሶኣዊ አገልግሎት ላይ ያተኰሩትን፦ “ስምዐ ጽድቅ ብሔራዊ”ን፥ “ጮራ መንፈሳዊ መጽሔት”ን፥ የተቀበረ መክሊት”ን፥ “የለውጥ ያለህ!!!”ን እና ሌሎችንም የሥነ ጽሑፍ ውጤቶች በመተቸት የተዘጋጀ ነው። ጸሓፊው በእነዚህ ሥራዎች ላይ ትችት ለማቅረብ ሲነሣ፥ ዝም ብሎ እንዳልተነሣና እነዚህ ሥራዎች በሕዝቡ ውስጥ ያሳደሩት ተጽዕኖ ቀላል አለ መኾኑን ስለ ተገነዘበ እንደ ኾነ እንረዳለን። እርሱ ግን፥ የተቻቸው መጽሔትና መጻሕፍት ውጤት እንዳልተገኘባቸው አስመስሎ ቢጽፍም፥ እውነታው እንደዚያ እንዳልኾነና እርሱንም ይህን መጽሐፍ እንዲጽፍ ግድ እንዳለው መካድ አይቻልም። ጽሑፎቻችንን ተችቶ ሲጽፍ፥ በአንድ በኩል እኛ ተሐድሶ ያስፈልጋቸዋል ብለን የገለጥናቸውን ትምህርቶች በመደገፍ፥ በቤተ ክርስቲያን ዐውደ ምሕረትም ኾነ በማኅበሩ ውስጥ ለመናገር የማይደፍራቸውን እውነቶች፥ እነዚህን የጽሑፍ ሥራዎች ተተግኖና ‘ቤተ ክርስቲያን የማትለውን ትላለች ይላሉ’ የሚል ምክንያት በመስጠት በነጻነት ለመግለጥ ሰፊ ዕድል እንዳገኘ ተገንዝበናል።

መጽሐፉን ስንመለከተው በአንድ በኩል ዛሬ አብዛኛው ሰው የማያውቀውንና የማያምነውን፥ ብዙዎች የቤተ ክርስቲያን ልጆችም “መናፍቅ”፥ “ተሐድሶ” እየተባሉ የተወገዙበትንና ዛሬም የሚወገዙበትን እውነት የኾነውን ትምህርት እውነተኛነት አጽድቆ የጻፈበት ኹኔታ ስለሚታይ፥ ይህን ገጽታውን እንደ ተሐድሶኣዊ ዐቋም ወስደንለታል። በአንጻሩ መጽሐፍ ቅዱሳዊ መሠረት የሌላቸውንና ከጊዜ በኋላ የተፈጠሩ የስሕተት ትምህርቶችንና ልምምዶችን በግድ መጽሐፍ ቅዱሳዊ ለማድረግ የታገለበት ኹኔታም ስለሚስተዋል፥ ያን ዐቋሙን ፀረ ተሐድሶኣዊና ኢመጽሐፍ ቅዱሳዊ መኾኑን ተረድተናል። በዚህ ምላሻዊ ጽሑፍ እነዚህን የተለያዩ ዐቋሞች በየፈርጁ ለማቅረብና ተገቢውን ምላሽ ለመስጠት እንሞክራለን። 
ስለ መጽሐፉ ርእስ
የመጽሐፉ ርእስ “መድሎተ ጽድቅ” ነው። መልአከ ብርሃን አድማሱ ጀንበሬ “መድሎተ አሚን” የሚል፥ ካቶሊካዊውን ጽሑፍ በመተቸት ለጻፉት መጽሐፍ የሰጡትን ርእስ ያስታውሳል። ፖለቲከኛው አቶ ልደቱ አያሌው “መድሎት” በሚል ርእስ የእርሳቸውንም የሌሎችንም ጥንካሬና ድክመት ያሳዩበትን ፖለቲካዊ መጽሐፍ ጽፈዋል። ዲ/ን ያረጋልም ለመጽሐፉ የሰጠው ከእነዚህ መጻሕፍት ጋር ተቀራራቢ የኾነ “መድሎተ ጽድቅ” የሚል ርእስ ነው። ርእሱ “መድሎተ ጽድቅ” ይባል እንጂ ይዘቱ ሲታይ ግን እንደ ስሙ ኾኖ አይገኝም፤ ራስን ትክክለኛ ሌላውን የተሳሳተ፥ ራስን ጻድቅ ሌላውን ኃጥእ፥ ራስን አማኝ ሌላውን መናፍቅ፥ ወዘተ. አድርጎ የሚያቀርብና ሚዛናዊነት የጐደለው ሥራ በመኾኑ፥ በእኛ እይታ ጽሑፉ “መድሎተ ጽድቅ” ለመባል የሚበቃ አይደለም።
ዲ/ን ያረጋል ለመተቸት ከደፈራቸው መጻሕፍት መካከል “ስምዐ ጽድቅ ብሔራዊ” የተባለውን መጽሐፍ አለቃ መሠረት ያሳተሙት በ1951 ዓ.ም. ነው። ጸሓፊው አባል የኾነበት ማኅበር ከጳጉሜን 5/1985 ጀምሮ የሚያሳትመውን ጋዜጣ “ስምዐ ጽድቅ” ብሎ ነው የሰየመው። “ስምዐ ጽድቅ” በመባል ግን ስምዐ ጽድቅ መኾን አይቻል ይኾናል። ከዚህ ቀደም አቶ ብርሃኑ ደቦጭ የተባሉ ምሁር በአራተኛው የኢትዮጵያ ቤተ ክርስቲያን ጥናት ጉባኤ ላይ ባቀረቡት የጥናት ወረቀት ስለ ጋዜጣዋ (ስምዐ ጽድቅ) በሰጡት አስተያየት፡- “ስም ጽድቅ ጋዜጣ እንደ ስሟ እውነትን በመናገር ረገድ ብዙም የተዋጣላት አይደለችም።” ካሉ በኋላ፥ የማኅበረ ቅዱሳን ኅትመት ውጤቶች፡- “የቤተ ክርስቲያን ዋና ተልእኮ የኾነው ወንጌልን ገሸሽ ያደረጉና የወንጌሉ ዐቢይ መልእክት እውነት፥ መንገድ እና ሕይወት የሆነውን ኢየሱስ ክርስቶስን በሚገባ የማይገልጽ ነው” በሚል አስተያየታቸውን ማጠናከራቸውን ፍቅር ለይኩን የተባሉ ጸሓፊ ጥናቱን በዳሰሱበት ጽሑፋቸው ላይ ገልጠዋል (abaselama.org)። በዚህ የምሁሩ መለኪያ እንኳ “ስምዐ ጽድቅ” መባል የሚገባው የአለቃ መሠረት መጽሐፍ መኾኑን ማስተባበል አይቻልም።
የስያሜዎቹ መቀራረብ እንዳለ ይኹንና “መድሎተ ጽድቅ” የተባለው መጽሐፍ በርግጥ የጽድቅ ሚዛን ለመኾን ብቁ ነወይ? ስሙስ አይበዛበትም ወይ? የሚሉትና የመሳሰሉት ጥያቄዎች መነሣታቸው አይቀርም። ወደ ፊት መኾን አለ መኾኑን ግን የዲያቆኑን “መድሎተ ጽድቅ”፥ መድሎተ ጽድቅ በኾነው መጽሐፍ ቅዱስ ስንፈትሸውና ስንመረምረው የምናውቀው ይኾናል።
ሚዛኑ ምንድን ነው?
በ“መድሎተ ጽድቅ” መጽሐፍ በሽፋኑ የፊት ገጽ ላይ የሚታየው ሥዕልና በውስጥ ገጽ ስለ ሽፋኑ ሥዕል የተሰጠው መግለጫ እንደሚያሳየው፥ ጸሓፊው የተቻቸውን መጻሕፍት ለመመዘን የሞከረው ማንኛውም ክርስቲያናዊ ትምህርት ሊመዘንበት በሚገባው በመጽሐፍ ቅዱስ አለ መኾኑ፥ መጻሕፍቱን ያለ ሚዛን ለመመዘን የሚሞክር መዛኝ ያሰኘዋል። ርግጥ፥ “ቅድስት ቤተ ክርስቲያን ከማንኛውም መጽሐፍ በላይ ምንም ሊነጻጸርና ሊወዳደር በማይችል መልኩ አክብራና አልቃ የምታምነው መጽሐፍ ቅዱስን ነው” (2007፣ ገጽ 38) በማለት፥ ለመጽሐፍ ቅዱስ የሰጠውን ታላቅ ቦታ ለማሳየት ሞክሯል። በመጽሐፉ ውስጥም በቅድሚያ መጽሐፍ ቅዱስን እየጠቀሰ ጽፏል። ይኹን እንጂ እንታደስ የሚል መልእክት ያዘሉ ጽሑፎችን በመጽሐፍ ቅዱስ ሳይኾን በዮሐንስ አፈ ወርቅ መጽሐፍ ለመመዘን መሞከሩ፥ ለመጽሐፍ ቅዱስ የሰጠውን ቦታ ትልቅነት ከልብ ያልሰጠ አስመስሎታል።
በሽፋኑ ሥዕል ላይ የሚመዛዘኑ ተሐድሶኣውያን መጽሔትና መጻሕፍት እና የዮሐንስ አፈ ወርቅ የተባለ መጽሐፍ በሚዛን ላይ ተቀምጠዋል። ሚዛኑ ምን እንደ ኾነ ግን አልነገረንም። በሌላ በኩል ግን የኦርቶዶክስ ቤተ ክርስቲያን የምታስተምረውንና በእኛ ጽሑፎች የተገለጠውን ትምህርት፥ “በመጀመሪያ በመጽሐፍ ቅዱስ ትምህርት መሠረት … በመቀጠልም በቀደምት አበው ትምህርት እንዲመዘኑ” እንደሚያደርግ ጽፏልና፥ ኹለት ሚዛኖች እንዳሉት ግልጥ አድርጓል (ዝኒ ከማሁ፣ ገጽ 17)። በክርስትና ትምህርት ግን ኹለት ሚዛን የለም፤ ሚዛኑ ሊኾን የሚገባው አንድ፥ እርሱም የእግዚአብሔር ቃል የኾነው መጽሐፍ ቅዱስ ብቻ ነው። በሌላ ዐላማ ካልኾነ በቀርም ተሐድሶኣውያኑ ጽሑፎችም ኾኑ የዮሐንስ አፈ ወርቅ መጽሐፍ በመጽሐፍ ቅዱስ የሚመዘኑ እንጂ፥ እርስ በርሳቸው የሚመዛዘኑ አይደሉም።
ዲ/ን ያረጋል አንዱና ብቸኛው የክርስትና ሚዛን መጽሐፍ ቅዱስ አልበቃው ብሎ፥ የቀደምት አበውን ትምህርት ተጨማሪ ሚዛን ያደረገው ለምን ይኾን? መልሱ ቀላል ነው፤ መጽሐፍ ቅዱስ የማያውቃቸውንና ከጊዜ በኋላ የገቡትን እንግዳ ትምህርቶች ከመጽሐፍ ቅዱስ ይልቅ የሚደግፉልኝ እነርሱ ናቸው ብሎ ስለሚያምን ነው። በዚህም አዋልድ መጻሕፍት የሚሉትን ኹሉ መጽሐፍ ቅዱስን በመጠምዘዝና የማይደግፈውን በግድ እንዲደግፍ በማስጨነቅ መጽሐፍ ቅዱሳዊ ለማስመሰል ነው። ነገር ግን በየትኛው የመጽሐፍ ቅዱስ ክፍል ነው ስለ ተዝካርና ዝክር የተጻፈው? የትኛውስ የመጽሐፍ ቅዱስ ክፍል ነው ስለ ምንኩስና የሚናገረው? ቅዱሳት መካናትን ስለ መሳለም የተጻፈውስ በየትኛው የመጽሐፍ ቅዱስ ክፍል ነው? እነዚህና የመሳሰሉት ትምህርቶች በአዋልድ መጻሕፍት (የሊቃውንት መጻሕፍትም ቍጥሩ ከአዋልድ መኾኑን ልብ ይሏል) እንጂ በመጽሐፍ ቅዱስ አይታወቁም። እርሱ ግን እነዚህ ለአብነት የተጠቀሱት ልምምዶች በግድ መጽሐፍ ቅዱሳውያን ናቸው እያለ ነው።     
ከመጽሐፍ ቅዱስ በቀር የእግዚአብሔር ቃል የሚባል ሌላ መጽሐፍ ፈጽሞ የለም። ዮሐንስ አፈ ወርቅና ሌሎቹም አበው መጽሐፍ ቅዱስን አብራሩ፤ መጽሐፍ ቅዱስን መሠረት አድርገው ልዩ ልዩ ክርስቲያናውያን ትምህርቶችን ቀረጹ፤ አስተማሩ እንጂ ከመጽሐፍ ቅዱስ ጋር እኩል ሥልጣን ያለው መጽሐፍ አልጻፉም። የእነርሱም ምስክርነት ‘የእኛ ጽሑፎች የእግዚአብሔር ቃላት ናቸው’ የሚል አይደለም። ይልቁንም የእግዚአብሔር ቃል የኾነውን መጽሐፍ ቅዱስን እንድናነብና እርሱ የሚለውን ብቻ እንድንሰማ ነው የመከሩን፤ ለዚህም የሚከተሉትን ምስክሮች እንጠራለን።   
·        “የሚበልጠውም ትእዛዝ በኦሪት፥ በነቢያት፥ በወንጌል በሐዋርያት ቃል እናምን ዘንድ ነው። ንጉሥ ሆይ! … ለነፍስህ መድኀኒት ይኾኑህ ዘንድ እግዚአብሔር ሊገልጽልህ የወደዳቸው መጻሕፍት እሊህ ናቸው።” (ሃይማኖተ አበው 1986፣ 89፡90)።
·        “ይደልወነ ናፅምዕ ቃላተ መለኮት ከመ ኢይባዕ ቃል ነኪር ውስተ አልባቢነ - ልዩ (ባዕድ) ቃል ወደ ልባችን እንዳይገባ ቃላተ መለኮትን (መጽሐፍ ቅዱስን) ማድመጥ ይገባናል።” (ቅዱስ ዮሐንስ አፈ ወርቅ 1987፣ ገጽ 92)።

ዲ/ን ያረጋል ግን ይህን ላይቀበል ይችላል። ለእርሱ መጽሐፍ ቅዱስና ከሐዋርያት ዘመን በኋላ የተነሡ እንደ ዮሐንስ አፈ ወርቅ ያሉ አበው የጻፏቸው መጻሕፍት እኩል ናቸው፤ ከላይ እንደ ጠቀስነው ሚዛን ያደረጋቸው መጽሐፍ ቅዱስንና የቀደምት አበው ጽሑፎችን ነውና።
በቅድሚያ በመጽሐፍ ቅዱስና በሌሎች አበው የተጻፉ መጻሕፍት መካከል ያለውን መሠረታዊ ልዩነት ማወቅ ያስፈልጋል። ደጋግመን እንዳልነው የእግዚአብሔር ቃል መጽሐፍ ቅዱስ ብቻ ነው። መጽሐፍ ቅዱስ የክርስትና ትምህርት ብቸኛ ምንጭ ነው። በእርሱ ላይ መጨመርም ኾነ ከእርሱ ላይ መቀነስ፥ መልእክቱን ማዛባት፥ ተገቢ ባልኾነና ለራስ ሐሳብ ደጋፊ አድርጎ መተርጐም፥ ወዘተ. ፈጽሞ የተከለከለ ነው። ከመጽሐፍ ቅዱስ በኋላ የተነሡ አበው የጻፉትም ኾነ ያስተማሩት መጽሐፍ ቅዱስን መሠረት አድርገው ነው እንጂ ከመጽሐፍ ቅዱስ ውጪ የኾነ ዐዲስ መገለጥ አላመጡም። ቢያመጡም ማንም እንደማይቀበላቸው ስለሚያውቁ፥ የትኛውንም ዐይነት ክርስቲያናዊ ትምህርት ያስተምሩ፥ ትምህርታቸውንም ያስደግፉ የነበረው በመጽሐፍ ቅዱስ ላይ ነው። ይህም ለመጽሐፍ ቅዱስ የሰጡትን ሥልጣናዊ ስፍራና የእነርሱ ጽሑፎችም ቦታ የት እንደ ኾነ በግልጥ ለይቶ የሚያሳይ ነው። በተጨማሪ ማንኛውም ክርስቲያናዊ ትምህርት ሊመዘን የሚገባው በመጽሐፍ ቅዱስ ብቻ መኾኑን ያስገነዝባል።
እነዚህ አበው ለመጀመሪያው ምእት ዓመት ክርስትና ቅርቦች በመኾናቸው፥ መጽሐፍ ቅዱስን እየጠቀሱ ስለ ጻፉና ስላስተማሩ ብቻ፥ ትምህርታቸው ምንም ስሕተት የሌለበትና እንደ መጽሐፍ ቅዱስ የሚታይ ነው ማለት ግን ፈጽሞ ስሕተት ነው። ጽሑፎቻቸው በመጽሐፍ ቅዱስ ተመዝነው እንጂ “እነርሱ አይሳሳቱም” ተብለው በደፈናው እንደ መጽሐፍ ቅዱስ ያለ ሥልጣን የምንሰጣቸው አይደለም። ስለዚህ ትምህርታቸው በመጽሐፍ ቅዱስ ቃል ሊመዘንና መጽሐፍ ቅዱሳዊ መኾን አለ መኾኑ ሊረጋገጥ የሚችል፥ የሚገባውም ነው። ጕዳዩን በዚህ መንገድ መረዳት ካልቻልን ለእነርሱ የመጽሐፍ ቅዱስን ያኽል ሥልጣን መስጠት ይኾናል። ይህም ፈጽሞ ሊኾን የማይገባ፥ እነርሱም ያላሉትና እኛ በፈቃዳችን ለእነርሱ የምንሰጣቸው የተሳሳተ ቦታ ነው የሚኾነው። በእኛና በዲ/ን ያረጋል መካከል የልዩነታችን መሠረት ይህ ነው።
በጽሑፎቻችን ውስጥ ከቀደምት አበው ጽሑፎች ስንጠቅስ፥ ከመጽሐፍ ቅዱስ እኩል ባለ ሥልጣን ናቸው ብለን፥ ወይም ሰዎችን የማማለያ ስልት አድርገን አለ መኾኑ ግን በቅድሚያ ሊታወቅ ይገባል። ደግሞም ብዙዎች በመጽሐፍ ቅዱስ የተገለጠውንና ሲመሰክሩት እየተወገዙበት ያለውን እውነት ከየትም አላመጡትም፥ ከመጽሐፍ ቅዱስ ነው፤ እነዚህም አበው ይህን እውነት ይጋሩታል ለማለት ነው። በተጨማሪም፥ በመጽሐፍ ቅዱስ መመዘናቸው እንደ ተጠበቀ ኾኖ፥ በብዙ ኹኔታ ዛሬ ለቆምንበት ክርስቲያናዊ ትምህርትና ሕይወት ብዙ አስተዋፅኦ ማበርከታቸውን በመቀበል ነው። ይኹን እንጂ በምንም መንገድ መጽሐፍ ቅዱስ ያለውን ዐይነት ሥልጣን አላቸው ማለት ግን ፈጽሞ አይደለም። ስለዚህ መጽሐፍ ቅዱስ ብቻ እንጂ የዮሐንስ አፈ ወርቅም ኾነ የሌሎቹ አበው ጽሑፎች፥ ለክርስትና ትምህርት አስተዋፅኦ ቢኖራቸውም እንደ መጽሐፍ ቅዱስ የክርስትና ትምህርት ሚዛን ግን አይደሉም።
የምላሹ አቀራረብ
ለ“መድሎተ ጽድቅ” ምላሽ ስንሰጥ መጽሐፉ የአንድ ግለሰብ ሥራ እንጂ የኢትዮጵያ ኦርቶዶክስ ተዋሕዶ ቤተ ክርስቲያንን የሚወክል ነው በሚል እንዳልኾነ በቅድሚያ መግለጥ ያስፈልጋል። በዋናነት የምናተኵረውም በእኛ ጽሑፎች፥ ማለትም በ“ስምዐ ጽድቅ ብሔራዊ”፥ በ”ጮራ መንፈሳዊ መጽሔት”፥ በ “የተቀበረ መክሊት” እና በ “የለውጥ ያለህ!!!” ላይ የቀረበውን ትችት መሠረት በማድረግ ይኾናል። ይህም ሲኾን፥ በየርእሱና ንኡስ ርእሱ ላይ በተነሣው ጭብጥ ላይና ተዛብተው በተጠቀሱ የጽሑፎቹ ጥቅሶች ላይ እናተኵራለን። የተተቹት ጽሑፎቻችን በሚዛናዊ መንገድ መተቸት አለመተቸታቸውን እንመረምራለን። በየርእሱ የተነሡትን ጭብጦች በመጽሐፍ ቅዱስ ትምህርት እየፈተሽን እርሱ ያቀረበው ከመጽሐፍ ቅዱስ ትምህርት አንጻር ትክክል መኾን አለ መኾኑን እንገመግማለን። በግምገማችን ጸሓፊው እውነትን ለመሸፋፈን የተጠቀመበትን ስልቱን በማስረጃ አስደግፈን ወደ ብርሃን እናወጣለን። በየአርእስቱ የእኛን ጽሑፎች ተተግኖ የገለጣቸውንና ከእኛ ጋር የተጋራቸውን መጽሐፍ ቅዱሳውያን እውነቶችም እንጠቍማለን። እንደ አስፈላጊነቱ በሌሎቹ ጽሑፎች ላይ ባቀረበው ሒስ ውስጥ ማብራሪያ መስጠት ካስፈለገ ልንሰጥ እንችላለን።         
በዚህ የመጀመሪያው ክፍል ምላሻችን፥ በ“መድሎተ ጽድቅ” መቅድም ላይና “‘ጮራ’ መጽሔት እና ‘ስምዓ ጽድቅ ብሔራዊ’ መጽሐፍ” በሚለው ንኡስ ርእስ ሥር ያነሣቸውን ዋና ዋና ጕዳዮች እንመለከታለን።

ጥቂት ስለ አለቃ መሠረት
ዲ/ን ያረጋል ከመጽሐፉ መቅድም አንሥቶ አለቃ መሠረትን “እርሱ” እያለ በመጥራት፥ በኢትዮጵያ ፕሮቴስታንቲዝምን ለማስፋፋት ከሚስዮናውያን ተምረው “ስምዓ ጽድቅ ብሔራዊ” በተሰኘው መጽሐፋቸው ፕሮቴስታንቲዝምን በፈሊጥ ለዘብ አድርገው ለማሳየት ሞክረዋል በማለት ይከሳል (2007፣ 13)። ቤተ ክርስቲያን ያሉባትን ስሕተቶች አስተካክላ እንድትታደስ ከመጽሐፍ ቅዱስና ከቀደምት አበው ትምህርቶች በመጠቃቀስ ያቀረቡበትን መንገድም፥ “መሠረት ስብሐት ለአብ ይህን አስመሳይ ተንኰሉን ‘ስምዓ ጽድቅ ብሔራዊ’ በተባለው መጽሐፉ ላይ እንዲህ ሲል ገልጿል” በማለት ቃላተ ፅርፈትን በመጠቀም ጭምር ይተቻል (2007፣ 14)።  
በመቀጠልም፥ “‘ጮራ’ መጽሔት እና ‘ስምዓ ጽድቅ ብሔራዊ’ መጽሐፍ” በሚለው ንኡስ ርእስ ሥር፥ የሚከተለውን ጽፏል፤ “መሠረት … ለትምህርት በተለያየ ቦታ በተዘዋወረበት ወቅት የኢትዮጵያን የክርስትና ትምህርት በፕሮቴስታንታዊ ትምህርት ለመለወጥ ዐልመው ወደ ሀገራችን ከመጡት የአውሮፓ የፕሮቴስታንት ሚስዮናውያን ከነ ዳቪድ ስቶክስ (የሠራዊተ ክርስቶስ ማኅበር መሥራች) እና ከመሳሰሉት ሚስዮናውያን ጋር ‘የስብከት ዘዴ ለመማር’ በሚል ሰበብ ተወዳጀ። ቀስ በቀስም የሚስዮናውያኑን ፍልስፍናና አስተምህሮ ተቀብሎ የቤተ ክርስቲያንን ትምህርት ለመለወጥ ብዙ ደክሟል። - ባይሳካለትም።
“… የስሕተት (የተሐድሶ) ትምህርቱን በ1950ዎቹ ጀምሮ በተለያዩ ቦታዎች (በሸዋ፣ በጎንደር፣ በጐጃም) ለማስፋፋት ሞክሮ የተለየ እምነትና አስተምህሮ ያለው መኾኑ እየታወቀበት ከኹሉም የተባረረ ሲኾን፥ በኋላም በእነ ሚስተር ዳቪድ እስቶክስ ጠቋሚነትና ስለ ‘ዘመናዊ አስተሳሰቡ’ በሰጡት ምስክርነት የሰዋስወ ብርሃን ቅዱስ ጳውሎስ ሴሚነሪ ሲጀመር እንዲገባ ተፈልጎ ከፍተኛ ትምህርት ቤቱ ከተከፈተ ከኹለት ዓመታት በኋላ ለስብከት ከሄደበት ቦታ ወደ ዐዲስ አበባ ተመልሶ ወደ ሴሚነሪ ገብቶ ነበር። ኾኖም ግን በዚህ ትምህርት ቤትም ያው የተለመደውን ፕሮቴስታንታዊ የኾነውን የሚስዮናውያኑን ትምህርት ማስፋፋት ሲሞክር ተደርሶበት፥ ከዚያም በቅዱስ ፓትርያርኩ ትእዛዝ ተባርሮ ወጥቷል። በመቀጠልም ወዳስተማሩትና በእምነት ወደሚመስሉት ወደ ሚስዮናውያን ዘንድ በመጠጋት በመካነ ኢየሱስ ቤተ ክርስቲያን የተለያዩ ቦታዎች፤ በተለይም እነርሱ በኋላ በአዲስ አበባ ባቋቋሙት ሴሚነሪ እስከ ኅልፈተ ሕይወቱ ሲያገለግል ቈይቷል።” (2007፣ 23)        
አለቃ መሠረት በብዙዎች ዘንድ በዕውቀታቸው፥ በሥራዎቻቸውና በኑሯቸውም የታወቁና የተመሰከረላቸው ኢትዮጵያዊ ሊቅ ናቸው። ሊቁ በዲያቆኑ “አንተ” ቢባሉም፥ በሊቃውንቱ ዘንድ ግን እጅግ የተከበሩና “አንቱ” የተባሉ ሰው ነበሩ። ይህ የያረጋል ክብርን ማዋረድ የእርሳቸውን ታላቅ ሰብእና ለማቃለልና ለማራከስ ኾን ተብሎ የተሰነዘረ ቢኾንም፥ በዚህ ራሱን ያስገምታል እንጂ ተቀባይነትን አያገኝም፤ የእርሳቸውንም ማንነት ሊለውጠው አይችልም። ድርጊቱ ኢትያጵያዊ ባህላችን የማይፈቅደው ሲኾን፥ በእግዚአብሔር ቃልም የተከለከለ ነው። መጽሐፍ ቅዱስ፥ “… ወአክብር ገጸ አረጋዊ ወፍራህ እግዚአብሔርሃ አምላክከ፥ እስመ አነ እግዚአብሔር አምላክክሙ። - … ሽማግሌውንም አክብር፥ አምላክህንም ፍራ እኔ እግዚአብሔር ነኝ።” (ዘሌ. 19፥32) ይላል።
ይህ የዲ/ኑ ድርጊት፥ ከዚህ ቀደም ስምዐ ጽድቅ ጋዜጣና ሐመር መጽሔት 10ኛ ዓመት በዓላቸውን የካቲት 20/1996 ዓ.ም. ባከበሩበት ወቅት፥ ዜና ቤተ ክርስቲያን ጋዜጣን፥ “ደካማና ፈሪ ብለው ስለ ኰነኑትና ስለ ዘለፉት”፥ እንዲሁም በወቅቱ የነበረው ዐዲሱ የማኅበረ ቅዱሳን ጸሓፊ፥ “በቤተ ክርስቲያኒቱ እየታተሙ ከሚወጡት ዕትሞች በማኅበረ ቅዱሳን እየታተሙ የሚወጡት ዕትሞች የተሻሉ መኾናቸውን ደፍረው ስለ መሰከሩ” አንጋፋውና በጊዜው ፷ ዓመት የሞላው ዜና ቤተ ክርስቲያን ጋዜጣ፥ በማኅበረ ቅዱሳን ስምዐ ጽድቅ ጋዜጣ ላይ “የ፷ ዓመቱ አዛውንት በ፲ ዓመቱ ሕፃን ተዘለፈ” በሚል የጻፈበትን ርእሰ ጽሑፍ ያስታውሰናል (1996፣ ገጽ 1፡5)።
ዲ/ን ያረጋል የአለቃ መሠረትን ሰብእና ለማራከስ የሞከረው በተለይ “ስምዐ ጽድቅ ብሔራዊ”ን  በመጥቀስ ነው። ሌሎች  የታወቁ ሥራዎቻቸውን ግን ለመጥቅሰም ኾነ መኖራቸውን እንኳ ለማስታወቅ አልሞከረም፤ አለቃ መሠረት ስብሐት ለአብ ግን የሚከተሉትን መጻሕፍት ጽፈው አሳትመዋል፤ ለኅትመት አዘጋጅተዋል፤ በማዘጋጀትም ላይ ነበሩ።
ያሳተሟቸው፡-
·        “ሥላሴ በተዋሕዶ”፥
·        “ትውፊታዊ ሐሳበ ዘመንና ታሪኩ - በኢትዮጵያ ቤተ ክርስቲያን ዐቋም”፥
·        “ሥረ ብዙ”፥
·        “ቃለ እግዚአብሔር ነበረ”
·        “አርዮሳውያን”
ለኅትመት ተዘጋጅተው የነበሩት፡-  
·        “ተፈንዎ በኢቡዓዴ (ተልእኮ ባለ መለየት)”
·        “ማእከላይ በተዋሕዶ”
·        “ሕይወተ ክርስትና በተዋሕዶ”
·        “ኀሠሣ ተመርሖ ልቡናዊ (የመጽሐፍና የልቡና መስማማት)
·        “ጽጌ ደንጐላ (የሱፍ አበባ (ጥንታዊት ቤተ ክርስቲያን))”
በመዘጋጀት ላይ የነበሩ መጻሕፍት፡-
·        “ከግእዝ መጽሐፍ ቅዱስና ከአበው ሊቃውንት መጻሕፍት የተገኙ አንድ መቶ ሠላሳ ኹለት የቅኔ መንገዶች (ጐዳናዎች) ዐመልና ስልት”
·        “ሥነ ጽሑፋችንና አወራረዱ”
·        “የቤተ ክርስቲያን ታሪክ በአስተዋፅኦ”
·        “የኢትዮጵያ ቤተ ክርስቲያን ባህልና የሥነ ሥርዐት አፈጻጸም”
·        “ፊደል ይገድላል መንፈስ ግን ያድናል”

እርሱ ግን “ስምዐ ጽድቅ ብሔራዊ”ን ብቻ ሲተች፥ በእነዚህ ታላላቅ መጻሕፍቶቻቸው ላይ ግን አስተያየት አልሰጠም፤ መኖራቸውንም እንኳ አልጠቈመም። ይኹን እንጂ ብዙዎች “ስምዐ ጽድቅ ብሔራዊ”ን ጨምሮ በእነዚህ መጻሕፍት የሚደመሙና በየ ጽሑፍ ሥራዎቻቸው በዋቢነት የሚጠቅሷቸው፥ ትልቅ ምስክርነትም የሚሰጧቸው ናቸው። ለምሳሌ፦ አለቃ መሠረት በትውፊታዊ ሐሰበ ዘመንና ታሪኩ መጽሐፋቸው ላይ መጽሐፉን አንብበው ላበረታቷቸው የቤተ ክርስቲያን ሊቃውንት የወሮታ ምስጋና ያቀረቡላቸው ሲኾን፥ እነርሱም ብፁዕ አቡነ ጢሞቴዎስ ሊቀ ጳጳስ ዘከፋ ሀገረ ስብከት፥ ሊቀ ሥልጣናት ሀብተ ማርያም ወርቅነህ፥ ንቡረ እድ ድሜጥሮስ ገብረ ማርያም ናቸው። “ትውፊታዊ ሐሳበ ዘመንና ታሪኩ” ከታተመ ከ1981 ዓ.ም. ወዲህ ስለ ኢትዮጵያ የዘመን አቈጣጠር፥ ስለ ርእሰ ዐውደ ዓመት፥ ወዘተ. የጻፉ ሊቃውንተ ቤተ ክርስቲያን ኹሉ ማለት ይቻላል፥ መጽሐፉን በዋቢነት ሳይጠቀሙበትና ሳይጠቅሱት  ጽፈዋል ማለት አይቻልም። ለምሳሌ፦
·        መጋቤ ብሉይ ሰይፈ ሥላሴ እና ሊቀ ሥዩማን አስረስ ራደ (1999፥ ገጽ 17)፥ “ክርስቶስ ዘሀሎ ወይሄሉ” በተሰኘ መጽሔት ላይ “የኢትዮጵያ የዘመን አቈጣጠር” በሚል ርእስ ለጻፉት ጽሑፍ፥
·        ሊቀ ኅሩያን ጌታቸው ጓዴ (1999፣ ገጽ 16) “ቃሉ ይናገር” በሚል ርእስ የኢትዮጵያ መጽሐፍ ቅዱስ ማኅበር ባሳተማቸው መጽሔቶች ቍጥር 1፥ 2 እና 4 ላይ በቅደም ተከተል፥ “የኢትዮጵያ ዘመን አቈጣጠር”፥ “በዘመን አቈጣጠር የጊዜ መስፈርታትና አዕዋዳት” እና “የጌታችን የኢየሱስ ክርስቶስ ልደት በኢትዮጵያ ዘመን አቈጣጠር ያለው ቦታ” በሚሉ አርእስት ለጻፏቸው ጽሑፎች፥
·        መጋቤ ብሉይ ሰይፈ ሥላሴ ዮሐንስ እና ዶ/ር አባ ዳንኤል አሰፋ (2000፣ ገጽ 38ቃሉ ይናገር” በሚል ርእስ የኢትዮጵያ መጽሐፍ ቅዱስ ማኅበር ባሳተመው  መጽሔት ቍጥር 4 ላይ “መጽሐፍ ቅዱስና ሥነ ምግባር” በሚል ርእስ ለጻፉት ጽሑፍ፥
·        ንቡረ እድ ኤልያስ አብርሃ (2003፣ ገጽ 30) “በመስቀሉ ገነትን ከፈተ” በተሰኘውና ለመስቀል ደመራ በዓል በተዘጋጀው ልዩ መጽሔት ላይ ለጻፉት ጽሑፍ፥
·        “የኢትዮጵያ ኦርቶዶክስ ተዋሕዶ ቤተ ክርስቲያን ታሪክ ከልደተ ክርስቶስ እስከ ፳፻ ዓ.ም. (2000)” በተባለው መጽሐፍ ምዕራፍ 4 ክፍል 2 ገጽ 87 ላይ “ትው.ሐ ዘመን ገጽ 147” ተብሎ ተጠቅሷል።
·        አለቃ ያሬድ ፈንታ (2005) “ባሕረ ሐሳብ፥ የቀመርና የሥነ ፈለክ ምስጢር” በተሰኘው መጽሐፋቸው ላይ፥
ተጠቅመዉበታል፤ በዋቢነትም ጠቅሰዉታል።
ከነዚህም በተጨማሪ ስለዚህ መጽሐፍ ፕሮፌሰር ጌታቸው ኀይሌ፥ “ባሕረ ሐሳብ፥ የዘመን ቈጠራ ቅርሳችን ከታሪክ ማስታወሻ ጋራ” በተሰኘ መጽሐፋቸው ላይ የሚከተለውን ምስክርነት ሰጥተዋል። “የግእዝና የአማርኛ የብራና መጻሕፍትን ስመለከት ስለ ባሕረ ሐሳብ የተጻፉት መጻሕፍትም በውስጣቸው ያለው ቋንቋው ሳይቀር ኹሉም ያንኑ መምህራኑ የሚያስተምሩትን ነው። በዚያ ላይ አራት የታተሙ መጻሕፍት አንብቤያለሁ። እነዚህ መጻሕፍትም ካንዱ አቶ መሠረት ስብሐተ ለአብ ካሳተሙት በቀር ሌሎቹ አንዱ ከሌላው በአንዳንድ ጥቃቅን ነገሮች ይለያዩ እንደ ኾነ ነው እንጂ ኹሉም ያቀረቡልን ያንኑ ያልታተሙት መጻሕፍት የያዙትንና መምህራኑ የሚያስተምሩትን ነው፤ ተጨማሪ ማብራሪያ የለባቸውም።” (2006፣ ገጽ 13)። ስለ ኾነም፥ “የባሕረ ሐሳብ ዕውቀቱን ሊያሰፋ የሚፈልግ ከላይ ከጠቀስኳቸው መጻሕፍት በተጨማሪ አቶ መሠረት ስብሐት ለአብ በመካነ ኢየሱስ ሴሚነሪ ድጐማ ትውፊታዊ ኀሳበ ዘመንና ታሪኩ በሚል ርእስ በ1981 ዓ.ም. ሆንግ ኮንግ ያሳተሙትን … ቢያጠና ይጠቀማል።” ብለዋል (ዝኒ ከማሁ፣ ገጽ 17)።    
ዶ/ር ፈቃደ አዘዘም “የሥነ ቃል መምሪያ” በተሰኘው መጽሐፋቸው ላይ፥ አኹን፥ አኹን በአገራችንና በሌሎችም ሀገሮች ቋንቋዎች በፍጥነት እየገባና እየተለመደ የመጣውን “ፎክሎር”ን፥ ቀደም ሲል ትውፊት ብለው ይጠሩት እንደ ነበረና ይህም የኾነው፥ “‘በመሠረት ስብሐት ለአብ ተጽፎ በታተመው ትውፊታዊ ሐሳበ ዘመንና ታሪኩ - በኢትዮጵያ ቤተ ክርስቲያን ዐቋም’ (1981) በተባለ መጽሐፍ ውስጥ የቀረበውን የትውፊትን ፍቺ በመመርኰዝና” የራሳቸውን ሐሳብ በመጨመር በቃሉ ለመገልገል ወስነው የነበረ መኾኑን ጽፈዋል (1991፣ ገጽ 11)።
“ከትውፊታዊ ሐሳበ ዘመንና ታሪኩ” በተጨማሪ ከሌሎች የአለቃ መጻሕፍት ውስጥ የሚጠቅሱ አሉ። ይልቁንም ትንሣኤ የተሰኘው የቤተ ክርስቲያኒቱ መጽሔት በሐምሌ 1972 ዕትሙ ከስምዐ ጽድቅ ብሔራዊ ላይ እና ከቤተ ክርስቲያን ታሪክ በአስተዋፅኦ ላይ “ሰላማ ካሣቴ ብርሃን” በሚል ርእስ ጽሑፍ አውጥቷል (ምንጩን ግን በአኅጽሮት ስ.ጽ.ብ. ብሎ ነው የጠቀሰው ገጽ 8-9፡12)።
ዲ/ን ያረጋል “ስምዐ ጽድቅ ብሔራዊ”ንና ጸሓፊውን አለቃ መሠረትን ለመተቸት መነሣቱን ስናስብ፥ እንዲህ ለማድረግ የሚያስፈልገው ድፍረት እንጂ ዕውቀት አለ መኾኑን ተገንዝበናል። እርሱ “ስምዐ ጽድቅ ብሔራዊ”ን ለምን አጥላልቶ ጠቀሰው? እውን በዚያ መጽሐፍ ላይ ኑፋቄ ስላለ ነውን? ወይስ ሌላ ምክንያት ይኖረው ይኾን? ያን በስፍራው የምናየው ይኾናል። መጽሐፉ በዚያ ዘመን አነጋገር ብሔራዊቷ ቤተ ክርስቲያን የምታምነውንና የምታስተምረውን ትምህርት በሦስት ክፍላትና በአርባ ስድስት አናቅጽ የሚዘረዝር፥ መጽሐፍ ቅዱሳዊ መሠረቱን የሚያስይዝና በጥንት አበው ትምህርትም የሚያጐላምስ፥ ቤተ ክርስቲያን ከልማድ ወጥታ በእግዚአብሔር ቃል እንድትመራ ለማድረግ መሠረተ እምነቷንና ትምህርቷን እንድትፈትሽና በቃሉ ላይ እንድትመሠርት የሚቀስቀስ መጽሐፍ ነው። መጽሐፉም ለብዙ ዓመታት በሊቃውንቱ ዘንድ የሚደነቅና የሚነበብ መጽሐፍ እንደ ነበረና መጽሐፍ ቅዱሳዊ መሠረት ካለው ከኦርቶዶክስ ትምህርት ውጪ እንዳልኾነም ይታወቃል።
ስምዐ ጽድቅ ብሔራዊ የተጻፈበት ዘመን (1951 ዓ.ም.) የኢትዮጵያ ኦርቶዶክስ ተዋሕዶ ቤተ ክርስቲያን በግብጻውያን ጳጳሳት መመራቷ አብቅቶ፥ የራሷን ኢትዮጵያዊ ፓትርያርክ የሾመችበትና ኹኔታውም “የኢትዮጵያ ቤተ ክርስቲያን መታደስ” ተብሎ በአደባባይ በቃልም በመጻፍም የተነገረበት ዘመን ነው። የአለቃ መሠረት ሐሳብ ቤተ ክርስቲያን በዚህ መንገድ በግብጻውያን ከመመራት ወጥታ ራሷን በመቻል ተሐድሶ እንዳደረገች ኹሉ፥ የራሷን ሲኖዶስ ወደ ማቋቋም የምትገባው ቤተ ክርስቲያን መሠረተ እምነቷንና አስተምህሮዋን በመጽሐፍ ቅዱስ እንድትፈትሽና ተሐድሶ ማድረግ ባለባት ጕዳይ ላይ ተሐድሶን እንድታደርግ ለማነሣሣት ነው። አለቃ መሠረት ስምዐ ጽድቅን፥ “ … ለመጻፍ ያነሣሣኝ ምክንያት ... ነጻነት ያገኘችው ቤተ ክርስቲያናችን በብሔራዊ አንድነት ቀዋሚውን ሃይማኖት ሳይሆን፤ ያለ ሐሳብ የገባውን ልማድ እንድታሻሽልና ጥንታዊውን የሃይማኖት መሠረት ግልጽ አድረጋ በማስተማር እንድትታደስ ነው። … ግን ደግም ስለ ቤተ ክርስቲያን መታደስ ስንናገር በአኹኑ ጊዜ በብዙዎች ዘንድ መታደስ የተባለው ኀይለ ቃል በሃይማኖት ላይ ዐዲስ ነገር ወይም ዐዲስ ሐሳብ እንደ ማምጣት ስለሚገመት፥ አንዳንዶቹም በቅርታ መንፈስ እየ ተመለከቱት ስለሚታይ፤ ይህን ለማወቅ አስቸጋሪ ያልነበረውን ነገር እስቲ እንነጋገርበት!” በሚል ነው (መሠረት 1951፣ ገጽ 9፡11)። የተሐድሶን ምንነት በቅጡ ያልተረዳውና በየገጹ ሁሉ ተሐድሶን “ዐዲስ ሃይማኖት” አድርጎ ለማቅረብ የሚጥረው የ“መድሎተ ጽድቅ” ፀሓፊ ግን በዚህ ደስ አልተሰኘም። ስለዚህ አለ ስማቸው ስም ሰጥቶ፥ ሥራቸውን አክፍቶ ጻፈ። 
አለቃ መሠረት በሥራዎቻቸው ኹሉ ቤተ ክርስቲያን መጽሐፍ ቅዱስን መመሪያዋ እንድታደርግ፥ ከመጽሐፍ ቅዱስ ጋር የማይቃረኑ ትምህርቶቿን፥ ሥርዐቷን፥ ትውፊቷንና ባህሏን ጠብቃ እንድትጓዝ ከልብ የሚሹ፥ ቤተ ክርስቲያኗን የሚወዱና ተሐድሶዋን የሚናፍቁ አባት እንደ ነበሩ ከማንም በላይ ሥራዎቻቸው ይመሰክራሉ። ዲ/ን ያረጋል እንዳለው ዐላማቸው ቀስ በቀስ ኦርቶዶክስን ፕሮቴስታንት ማድረግ ግን ፈጽሞ አልነበረም፤ እንዲህ ቢኾን ኖሮ፥ “ሥላሴ በተዋሕዶ”ን ባልጻፉ ነበር፤ “ትውፊታዊ ሐሳበ ዘመንና ታሪኩ” ን ባላዘጋጁም ነበር። ያልታተመውን “የቤተ ክርስቲያን ታሪክ በአስተዋፅኦ” ንና ሌሎችንም መጻሕፍት በማዘጋጀት ባልደከሙ ነበር። ከላይ የተዘረዘሩትን፥ የታተሙትንና በዝግጅት ላይ የነበሩትን የአለቃ መሠረትን መጻሕፍት ስሞች ስንመለከት እንኳ፥ ዲያቆኑ ከልቡ አንቅቶ እንደ ጻፈው አንድም ፕሮቴስታንቲዝምን ለማስፋፋትና ኦርቶዶክስን ለማዳከም የተጻፈ መጽሐፍ እንደሌለ መገንዘብ እንችላለን። ምክንያቱም ፕሮቴስታንቲዝምን የሚያቀነቅን ሰው በእነዚህ ርእሰ ጕዳዮች የተጻፉትን መጻሕፍት ኹሉ ቀድሞም አለ መጻፍ እንጂ በትጋት አዘጋጅቶ ማሳተምና ለሕዝብ ማሠራጨት አያስፈልገውም። ስለዚህ የያረጋል ትችትና ነቀፋ መሠረተ ቢስ መኾኑን ከአለቃ ማንነትና ከሥራዎቻቸው መገንዘብ ይቻላል።
ያረጋል የአለቃ መሠረትን ታሪክ በተሳሳተ መንገድ ማቅረብ ብቻ ሳይኾን፥ የጊዜ ቅደም ተከተሉን በማዛባት ጭምር ነው የጻፈው። እርሳቸው በሰዋስው ብርሃን ቅዱስ ጳውሎስ መንፈሳዊ ትምህርት ቤት ሊማሩ ገብተው የነበረ ቢኾንም፥ ብዙም ሳይቈዩ “መጽሐፍ ቅዱስን ለተማሪዎች ታስተምራለህ” በሚል ክስ ተወንጅለው ከዚያ መባረራቸውን መስክረዋል። ይኸውም “እዚያው ገብተው እየተማሩ ሳለ ክርክር ተነሣ፥ በትምህርት ቤቱ ዲያሬክተር በአባ ቀለመ ወርቅም ተቃውሞ ደረሰባቸውና ከትምህርት ቤቱ ወጡ።” በጊዜው አባ ቀለመ ወርቅ በተመሳሳይ ምክንያት ብዙ ተማሪዎችን ማባረራቸውንና በዚሁ ምክንያት ብዙም ሳይቈዩ ከሥራቸው ላይ መነሣታቸውም ታውቋል (ጮራ ቍጥር 14፣ ገጽ 15፣ ሥላሴ በተዋሕዶ የአቶ መሠረት ስብሐት ለአብ ዐጭር የሕይወት ታሪክ)። ልብ እንበል! አለቃ የተባረሩት፥ “መጽሐፍ ቅዱስን ለተማሪዎች ታስተምራለህ” ተብለው ነው። ያረጋል ግን፥ “በዚህ ትምህርት ቤትም ያው የተለመደውን ፕሮቴስታንታዊ የኾነውን የሚስዮናውያኑን ትምህርት ማስፋፋት ሲሞክር ተደርሶበት” ነው ይላል (ያረጋል/ዲ/ን 2007፣ ገጽ 23)። መጽሐፍ ቅዱስን ማስተማር ለያረጋል “የስሕተት (የተሐድሶ)” ወይም “ፕሮቴስታንታዊ” ትምህርት ነው ማለት ነው።
አለቃ ከ1950ዎቹ በኋላ ሳይኾን ከዚያ በፊት ነው በተለያዩ ቦታዎች ተዘዋውረው ሲማሩ፥ ሲመራመሩና ወንጌልን ሲሰብኩ ያሳለፉት። ወደ ሰዋስወ ብርሃን ቅዱስ ጰውሎስ መንፈሳዊ ትምህርት ቤት ገብተው የወጡትም ከ1950 ዓ.ም. በፊት ነው እንጂ ያረጋል ዘመኑን አዛብቶ እንዳቀረበው በኋላ አይደለም። ከዚያ እንደ ወጡ፥ “ቄስ ጊዳዳ፥ የሚማሩ ሰዎች ከእኛ ዘንድ ስላሉ መጥተህ አስተምርልን በማለት፥ ወደ ቤቴል ማኅበረ ምእመናን ጠሯቸው። በቤቴልና በአሜሪካን ሚሽን የልጃገረዶች ትምህርት ቤት ሲያስተምሩ ለ7 ዓመታት ያኽል ቈዩ።” (ሥላሴ በተዋሕዶ፣ የአቶ መሠረት ስብሐት ለአብ ዐጭር የሕይወት ታሪክ)። በ1965 ዓ.ም. በመካነ ኢየሱስ ሴሚነሪ የማስተማር ተግባራቸውን ትተው፥ ራሳቸውን ችለው፥ “እያረስኩ ወንጌልን እስብካለሁ፤ የድርሰቱንም ሥራ በአንጽንዖት አካሂዳለሁ” ብለው ወደዚያ ያቀኑ ቢኾንም፥ በጊዜው የነበሩ የመካነ ኢየሱስ ወንጌላዊት ቤተ ክርስቲያን አስተዳዳሪዎች፥ “አንተ እንደ አንድ የወንጌል አስተማሪ ኾነህ ከምትሰማራ ይልቅ፥ ለዚህ ሥራ ሊሰማሩ የሚሠለጥኑ ብዙ ቀሳውስትንና ወንጌላውያንን በማሠልጠን ሥራ የምታደርገው ተሳትፎ የበለጠ ጠቃሚነት አለው በሚል ምክር ወደ ማስተማር ሥራዬ መለሱኝ” ሲሉ፥ ከጮራ መጽሔት ጋር ባደረጉት ቃለ ምልልስ ገልጠዋል (ጮራ ቍጥር 14፣ ገጽ 13)።  
በመካነ ኢየሱስ ሰሚነሪየም በመምህርነት በቈዩባቸው ከ30 ዓመታት በላይ ጊዜ ተማሪዎች፥ “የሕዝባቸውን መሠረት እንዲያውቁ፥ የኢትዮጵያ ቤተ ክርስቲያን አስተዋፅኦ፥ የኢትዮጵያ ቤተ ክርስቲያን ታሪክ፥ የኢትዮጵያ ቤተ ክርስቲያን ባህልና እምነት፥ የዐማርኛ ሰዋስው፥ ግእዝና የመሳሰሉትን ከማስተማራቸው በላይ፥ ከአገር ውስጥና ከአገር ውጭ ለሚመጡ የኢትዮጵያ ጥናት ሊቃውንት ከሰፊ ዕውቀታቸው ሲያካፍሉ ቈይተዋል። ከዕውቀታቸው ሰፊነትና ጥልቅነት የተነሣ አንዳንዶች አቶ መሠረት ‘የቁም መዝገበ ቃላት ናቸው’ እያሉ ይናገሩ ነበር።” (መሠረት 1988፣ የአቶ መሠረት ስብሐት ለአብ ዐጭር የሕይወት ታሪክ)። ይህም የሚያሳየው አለቃ መሠረት ለኢትዮጵያ ኦርቶዶክስ ተዋሕዶ ቤተ ክርስቲያን የነበራቸውን ጥልቅ ፍቅርና ተሐድሶዋን የሚመኙ መኾናቸውን እንጂ፥ ቤተ ክርስቲያኒቱን ወደ ሌላ ማንነት ወይም ወደ ፕሮቴስታንትነት የመለወጥ አጀንዳ ያልነበራቸው መኾኑን ነው። እንግዲህ ለሰው ከሥራው በቀር ማን ይመሰክራል?
ዲ/ን ያረጋል በአንድ ወገን ሚስዮናውያኑን እነ ዳዊት እስቶክስን፥ “የኢትዮጵያን የክርስትና ትምህርት በፕሮቴስታንታዊ ትምህርት ለመለወጥ ዐልመው ወደ ሀገራችን” የመጡ የፕሮቴስታንት ሚስዮናውያን አድርጎ ያቀርባቸዋል። በሌላ ወገን ደግሞ አለቃ መሠረት ወደ ሰዋስወ ብርሃን ቅዱስ ጳውሎስ መንፈሳዊ ትምህርት ቤት እንዲገቡ የተደረገው በዳዊት እስቶክስ “ጠቋሚነትና ስለ ‘ዘመናዊ አስተሳሰቡ’ በሰጡት ምስክርነት” ነው ይላል። እርሱ እንደሚለው ሚስዮናውያኑ ዐላማቸው የኢትዮጵያን የክርስትና ትምህርት ወደ ፕሮቴስታንትነት መለወጥ ከኾነ፥ ትምህርት ቤቱ እነርሱንም ኾነ ምስክርነታቸውን እንዴት ተቀበለ? እንዴትስ የሰዋስወ ብርሃን ቅዱስ ጳውሎስ ሴሚነሪ ከእነርሱ ጋር በስምምነት ሊሠራ ቻለ? የሚሉት ጥያቄዎች ይነሣሉ። በርግጥ ያረጋል አለቃ መሠረት ወደ ሰዋስወ ብርሃን ቅዱስ ጳውሎስ ሴሚነሪ እንዲገቡ፥ ዳዊት እስቶክስ ምስክርነት መስጠታቸውን አልካደም። ኾኖም ምስክርነቱ የተሰጠው በሰዋስወ ብርሃን ቅዱስ ጳውሎስ መንፈሳዊ ትምህርት ቤትና በሠራዊተ ክርስቶስ ማኅበር መካከል በነበረው ስምምነት መሠረት መኾኑን መግለጥ ግን አልፈለገም። እርሱ መግለጥ ባይፈልግም፥ “በሠራዊተ ክርስቶስ ማኅበርና በሰዋስወ ብርሃን ቅዱስ ጳውሎስ መንፈሳዊ ትምህርት ቤት መካከል በተደረገ ስምምነት መሠረት ትምህርት ቤቱ የሚስተር እስቶክስን ተማሪዎች ይቀበል ነበር።” (መሠረት 1988፣ የአቶ መሠረት ስብሐት ለአብ ዐጭር የሕይወት ታሪክ)። ወደ ፊት በስፍራው እንደምንመለከተው የሠራዊተ ክርስቶስ ማኅበር ከቤተ ክርስቲያኗ ጋር በነበረው ስምምነት መሠረት ቤተ ክርስቲያኒቱን በመደገፍና በመርዳት ዐብሮ ሲሠራ ቈይቷል። ከዚህ አንጻር የአለቃ መሠረት “የስብከት ዘዴ” ለመማር በሚል ከዳዊት እስቶክስ ጋር መወዳጀት የሚያስደነቅ አይደለም።          
 ይቀጥላል……


ዋቢ ጽሑፎች
ሃይማኖተ አበው (1986) ዐዲስ አበባ፣ ትንሣኤ ዘጉባኤ ማተሚያ ቤት።
መሠረት ስብሐት ለአብ (1951) ስምዓ ጽድቅ ብሔራዊ። ዐዲስ አበባ፣ አርቲስቲክ ማተሚያ ቤት።
                 (1988) ሥላሴ በተዋሕዶ። ዐዲስ አበባ፣ ብርሃንና ሰላም ማተሚያ ድርጅት።
ማኅበረ ቅዱሳን (2003) የተሐድሶ መናፍቃን ዘመቻ በኢትዮጵያ ቤተ ክርስቲያን ላይ፡፡ አዲስ አበባ፣ ማተሚያ ቤቱ ያተገለጸ፡፡
ማንሰል፣ ኮ. (2003) ትምህርተ መንፈስ ቅዱስ። ዐዲስ አበባ፣ ንግድ ማተሚያ ድርጅት።
ምስክረ ብርሃን (ነሐሴ) 1964። 
                 (ጥቅምት) 1964።
ስምዐ ጽድቅ (መጋቢት) 1995 ዓ.ም.።
ቃሉ ይናገር (ቍጥር 1፣ 2፣ 3፣ 4) (1999) ወሩ እና ቀኑ ያልተጠቀሰ።
በመስቀሉ ገነትን ከፈተ (2003) መስከረም 16።
ተግሣጽ ዘቅዱስ ዮሐንስ አፈ ወርቅ። (1987) ዐዲስ አበባ፣ ተስፋ ገብረ ሥላሴ ማተሚያ ቤት።
ትንሣኤ (ሐምሌ) 1972።
ክርስቶስ ዘሀሎ ወይሄሉ (1999) ሚያዝያ (ቀኑ ያልተጠቀሰ)።
ዜና ቤተ ክርስቲያን (1996) መጋቢትና ሚያዝያ (ቀኑ ያልተጠቀሰ)።
የኢትዮጵያ ኦርቶዶክስ ተዋሕዶ ቤተ ክርስቲያን ታሪክ ከልደተ ክርስቶስ እስከ ፳፻ ዓ.ም.። (2000)፣ አዲስ አበባ፣ ሜጋ ማተሚያ ኀላፊነቱ የተወሰነ የግል ማኅበር።
ያሬድ ካሳ (ሊቀ ሊቃውንት) (1993) ሕያው ስም። (ማተሚያ ቤቱና ቦታው ያልተጠቀሰ)።
ያሬድ ፈንታ (አለቃ)(2005) ባሕረ ሐሳብ፥ የቀመርና የሥነ ፈለክ ምስጢር። ዐዲስ አበባ፣ ፋር ኢስት ትሬዲንግ ኃላ. የተ. የግ. ማኅበር። 
ገብረ ሕይወት ባይከዳኝ (ነጋድራስ) (2002) ነጋድራስ ገብረ ሕይወት ሥራዎች። ዐዲስ አበባ፣ አአዩ ማተሚያ ቤት።
ጌታቸው ኀይሌ (ጌታቸው ኀይሌ)፥ “ባሕረ ሐሳብ፥ የዘመን ቈጠራ ቅርሳችን ከታሪክ ማስታወሻ ጋራ”
ግርማዊ ቀዳማዊ ዐፄ ኀይለ ሥላሴና የኢትዮጵያ ቤተ ክርስቲያን (1993) ጥቅምት፡፡
ጮራ (አልቦ ወርኅ ወዓመተ ምሕረት)።
ፈቃደ አዘዘ (ዶ/ር) (1991) የሥነ ቃል መምሪያ። ዐዲስ አበባ፣ ቦሌ ማተሚያ ድርጅት።
Benson, Doris. The Most Valuable Thing: The Word at work in Ethiopia. n.d.
www.abaselama.org. 18 September 2012. Document. 14 may 2015.
www.tehadeso.com. 12 January 2012. Document. 14 may 2015.

22 comments:

  1. እኔ ይህ ‹‹መድሎተ ጽድቅ›› የተሰኘው መጽሐፉ በተመረቀ ሰሞን አንድ ወዳጄ ‹‹እባክህን ይሄን መጽሐፍ አንብበህ›› ትዝብትህን አካፍለኝ ሲል አበረከቶልኝ ነው ያነበብኩት፡፡ ለመጀመርያ ጊዜ ‹‹በዓይን እንደሚታይ ሁሉ ብቻውን ጽሑፍ አንብቤ›› ሰው በፍርሃት ተወርሶ በአንዳች መሸማቅ ተሸማቆ ሲጮኽና የምንተፍረቱን ሽንፈት ለመቋቋም ሲጣጣር የተረዳሁት በዚህ መጽሐፍ ነው፡፡ ሰው ሕሊና ከሌለው ጸሐይ የሞቀውን ሐገር ያወቀውን ታሪክና ሁነት እንደሚክድ የታዘብኩት በዚህ መጽሐፍ ነው፡፡ ጸሐፊው ዲ/ን ያረጋል በእኔ እይታ ‹‹ከጤነኛ ሰው ይልቅ አንዳች አዕምሮ እንደጎደለው›› ሰው የዳካከሙ ምስኪን ሰው ለመሆናቸው ሥራቸው ይመሰክራል ባይ ነኝ፡፡ እውነትን በውሸት፣ ሽንፈት በወሬ፣ ሐቅን በሐሰት ለመለወጥ ሲጥሩና ሲማስኑ ከመታዘቤ ባሻገር አሁን ላይ ቤተክርስቲናችንን እየወረሰና እየሸፈነ ባለው የወንጌል እውነት የተደናበሩትን የመደናበር ልክ መድሎተ ጽድቅ የተሰኘው መጽሀፋቸው አጉልቶ አሳይቶኛል፡፡
    የጮራ መጽሄት አዘጋጆች እግዚአብሔር አምላክ ይባርካችሁ!!

    ReplyDelete
    Replies
    1. ለanonymous july 31,2015 at 12:44 am ውሻ በበላበት… ነው የሚባለው። አሁን የአንተ በእግዚአብሔር ቃል ማደግ ማለት ይህ ተሳዳቢነት ነውን። መጽሐፍ የሚነበበውስ ለመታዘብ ነውን? ይህን መጽሐፍ አንብበህ ትዝብትህን አካፍለኝ ብሎ መጽሐፍ መሥጠትና ትዝብትን መጠበቅስ የትኛውንም የመጽሐፍ አይነት ቢሆን የሚነበበው ትዝብትን ለመካፈል ነውን? አንብቦ እውቀትን ማዳበራችሁም ሆነ የተፃፈውን መረዳታችሁ ትዝብትን መሰለቅ ነውን?
      "እውነትን በውሸት፣ ሽንፈትን በወሬ፣ ሐቅን በሐሰት ለመለወጥ ሲጥሩ" እያልክ በከንቱ ማስመሰል ሞክረሀል። ግን ደግሞ የትኛው ውሸት፣ ሐሰትና ወሬ እንደሆነ ለማሳያ እንሿን አልገለፅህም። የአንተው እንክርዳድ ከተለያዩ መጣጥፎቻችሁ ተወሥደው በመጽሐፉ መልሥ የተሰጠባቸው ትክክል ናቸው ካልክ ለምን ትክክለኛነታቸውን አታሳይም።
      ደግሞ ቤተክርስቲያናችንን እየወረሰ ተባለልኝ። ሥለ አንተው አዳራሽህ ነው የምታወራው ወይሥ ሥለማን? ሥለ ሌሎች ቤተ እምነት የውሸት ወሬና በማሥመሠል መዘላበድ ነው እንዴ የናንተ ወንጌል። እውነትና የእግዚአብሔር ቃል በእናንተ ዘን መቸ አሉና? የክርስቶስ ወንጌል ማለት ያልሆኑትን በመምሰል ማወናበድ አይደለም። በክርስትና ማመን ማለት ማስመሰልና ባለመኑበት ቤተ እምነት ላይ አመፅንና ዘለፋን ማራመድ አይደለም። ለመታዘብ ከምታነብ ባታነብ ይሻልሀል። የእግዚአብሔርን ቃል ሥጋ የለበሰ ፍጡር አሥመሥላችሁ "በማሥጨነቅ በማሥገደድ " ሥትሉ የማታፍሩ ጉደኛ ፍጡሮች ናችሁ። አሁን ቃላት ይገደዳሉ ይጨነቃሉን? በመድፍ ነው ወይስ በሚሳየል? ነው በሰይፍ በጎራዴ ነው የሚገደዱት የሚጨነቁት? እረ እየተስተዋለ እናንት መናፍቃን!

      Delete
  2. Go ahead I am reading both.

    ReplyDelete
  3. እንዲህ ነው እንጂ መልስ

    ReplyDelete
  4. ከተጣልሁ ላይቀር
    ምንጭ ጮራ ተብሎ ይህ የተዘበዘበ መልሥ ተብየ ዝብዘባ ከተጣልሁ ላይቀርና ማንነቴ ተጋልጦ እርቃኔን ከቀረሁ ጨምሬ ወደ ቁልቁል ወደ ጥልቁ ፤ ጨምሬ እኔ እራሴ እርቃንነቴን ልግለጠው ይመሥላል።
    ዲያቆን ያረጋል በመጽሐፉ የገለጠው የእናንተን የውሸት አሥመሳይነታችሁን፤ ሐሰተኛ ትምህርታችሁን፤ በኦርቶዶክስ ተዋህዶ ቤተክርስቲያን ያልተባለውን በውሸት በቤተክርስቲያን እንዲህ ተብሏል ማለታችሁን፤ የቀደሙት አባቶችን ትምህርት ሳይሆን የምዕራባዊያኑን የፈጠራ ትምህርትንና አሥተሳሰብን የምታራምዱ መሆኑን፤ አንደኛውን ስተታችሁን በሌላኛው ስተታቸሁ የምትቃረኑና ከእውነተኛው የክርስቶስ ወንጌል የወጣችሁ መሆኑን፣ መዳንና የመዳን ትምህርት በኦርቶዶክስ ተዋህዶ ምን ማለትና እንዴት እንደሆነ መጽሐፍ ቅዱስን በመጥቀስ የገለፀበት፤ ኦርቶዶክስ ተዋህዶ የመዳን ትምህርትን በመጽሐፍ ቅዱስ እያመሳከረና በኦርቶዶክስ ተዋህዶ የቀደሙት አባቶች አሥተምሮ እያነፃፀረ በአጠቃላይ ክርስትናን ከምንፍቅና በመጽሐፍ ቅዱስ አስረጅነት በአባቶች ትምህርትም አነፃፃሪነት የለየበት ነው።
    አሁን እናንተ ይህን የውሸት ዝባዝንኬ ትችት አይሉት ክሥ መዘብዘባችሁ በእግዚአብሔር ቃል መነፀርነት በቀደሙት ኦርቶዶክሳዊ አባቶች አሥተምሮ ምስክርነት ለምን ማንነታችን ተገለጠ ነው። ዲያቆን ያረጋል ትችት ሳይሆን እውነትንና ሐሰትን የሚያሳይ የእግዚአብሔርን ቃል መሪ በማድረግና የአባቶችን አሥተምሮ መሰረት በማድረግ መጽሐፍ ነው የፃፈው።
    ዲያቆን ያረጋል መጽሐፍ ቅዱስንና የቀደሙት የኦርቶዶክስ አባቶችን አሥተምሮ እየጠቀሰ እውነትን በመግለጥ ሐሰትንና እንክርዳድን እርቃኑን አሳየ እንጂ መጽሐፍ ቅዱስንና የቀደሙት የኦርቶዶክስ ተዋህዶ አባቶችን አሥተምሮ አላወዳደረም ወይም መጽሐፍ ቅዱስን በትምህርታቸው አልቀየረም። አባቶቻችን ትምህርታቸው መጽሐፍ ቅዱስ፣ አስተምሮታቸውም መጽሐፍ ቅዱሳዊ ነው።እናንተ የሐሰተኛው ልጆች ናችሁና ዲያቆን ያረጋል ያልፃፈውንና ያላለውን በውሸት ፃፈና አለ ለማለት ደፍራችኋል።
    ሰውያችሁንም ከኮሌጅ የተባረረው መጽሐፍ ቅዱስ ስላስተማረ ነው የሚል ማስመሰልን ተናግራችኋል። መጽሐፍ ቅዱስን እኮ ቅዱስ መጽሐፍ ያሰኘው በውስጡ የያዘው የእግዚአብሔርን ቃል ነው። መጽሐፍ ቅዱስን በመጠቀም ደግሞ ሥንዴ የሚዘሩና እውነተኛውን የክርስቶስን የቃሉን መልክት ፍሬ የሚያፈሩ እንዳሉ ሁሉ፣ መጽሐፍ ቅዱስን በመያዝ ከውስጡ ጥቅስ በመጥቀስ ለክፉ ተግባራቸው የሚያዉሉና እንክርዳድ የተባለውን ሐሰተኛ ትምህርት የሚዘሩና እንክርዳድ የሚያበቅሉ አሉ። እናም ሰውያችሁም መጽሐፍ ቅዱስን ይዞ ሐሰተኛ ትምህርትን በመዝራት እንክርዳድን ለማብቀል ተደርሶበት እንጂ እውነተኛውን የኦርቶዶክስን ትምህርት በማስተማሩ አይደለም።አባታችሁ ሰይጣንም መጽሐፍ ቅዱስን (እሱም የእግዚአብሔር ቃል ነው) በመጥቀስ ለማሥተማርና እውነት ሥለ ክርስቶስ ለመመስከር ሳይሆን ለክፋቱና ለመፈታተን አምላካችንን ፈትኖታል። ክርስቶስ ግን የጠቀሰው የኔን ቃል ነው ብሎ አላለውም። ሂድ ወግድ አንተሰይጣን ብሎ አባረረው እንጂ። ታዲያ ክርስቶስ ኢየሱስንም ለመን ሰይጣንን ተቃወምከው አባረርከው የጠቀሰው የተናገረው እኮ የእግዚአብሔርን ቃል ያንተውን ነው ትሉት ይሆንን? የእናንተ ጉድ አያልቅ ትሉ ይሆናል እኮ!
    የኢትዮጵያ ኦርቶዶክስ ተዋህዶ ቤተክርስቲያን በኢትዮጵያዊ አባት መመራት የጀመረችበትን ዘመን ተሐድሶ ነው የሚል የማይመለከታችሁን የማታውቁትን ቀባጥራችኋል። በኢትዮጵያዊ አባት መተዳደር ተሐድሶ አይደለም። ትምህርቷም ሆነ ሥርዓት ህግጋቷ እንዲሁም አምልኮቷ አንድና አንድ የሆነ ምንም የተለወጠና የተወገደ የሌለበት ነው። እናንተ ሉተራዊያን ሆናችሁ ሳለ ይህ ሁሉ ማስመሰል ሐሰተኛውን ክስቶስን ለማወጅና ሰይጣንን ለማንገስ መሆኑ የታወቀ ነው። ሥለዚህ ጠላት ሆይ አትድከም ኦርቶዶክስ ተዋህዶ ቤተክርስቲያን የክርስቶስ ናትና።
    አቶ መሠረትን አክሊል ተሸለመ ብላችሁ ልትሰግዱለት ምንም አልቀራችሁም። ለእናንተ አለቃችሁ ለኦርቶዶክስ ደግሞ ቀንደኛ ጠላቷ በጎቿን ሊውጥ አሥቦ በእግዚአብሔር ሐይል መርዙን ሳይረጭ የበነቀለ መናፍቅ ነው።
    መጽሐፎቹ እያላችሁ የታተሙ ያልታተሙ በመዘጋጀት ላይ የነበሩ እያላችሁ የዘከዘካችኋቸው ኖሩም አልኖሩም የተለሰኑ መቃብሮች እንጂ ሌላ አይሆኑም። ምክንያቱም እንክርዳድ እንክርዳድ እንጅ ስንዴ አይሆንም። ላያቸውን በመደለያና ማደናጋሪያ ሥም የተሸፈኑ በውስጣቸው ምንፍቅና እንክርዳድ የምላበት የሐሰት ትምህርቶች ናቸው። ከመናፍቅ ክህደትና ውሸት እንጅ እውነትና በክርስትና የሆነ እምነት የለም።
    ብዙ ብትዘበዝቡም አሉባልታ እንጂ ሌላ የለውምና ተከታዮቻችሁ ሌላ ማከም አልቻላችሁም። የክርስቶስ ወንጌልና እናንተ በጭራሽ አትተዋወቁም( ሆድና ጀርባ)።

    ReplyDelete
    Replies
    1. ዳሞት እኔን የሚገርመኝ በዚህ ሁሉ ድንቁርናህ ለመጻፍ የሚታዘዝ እጅ ያለህ መሆኑ ብቻ ነው

      Delete
    2. እኔን ደግሞ የገረመኝ ያንተ ድንቁርና ነው- ዳሞት ምን እንዳለ መረዳት ማቃቱ። እንክርዳድ እንክርዳድ እንጅ ስንዴ አይሆንም። ነው ያለው-- አንተነትህን በያረጋል መጽሐፍ ተመልከትና ማን እንደሆንክ ንገረን

      Delete
    3. @ AnonymousAugust 1, 2015 at 9:37 AM
      ደንቆሮ ደንቆሮ የሚባለው እኮ ደንቆሮ ስለሆነ ነው፣ ልክ እንደ አንተ! የአንተ ደግሞ የመሚገርመው ደንቆሮ ብቻ ሳትሆን አወቀህ የደነቆርክ መሆንህ ነው‼! ሀሳብን በሃሳብ ከመሞገት የልቅ አፍህ የሰውን ክበር በስድብ ለማንኳሰስ መከፈቱ - ከዚህ በላይ ድንቁርና የት አለ፡፡ የአንተ ስድብ የዳግምን ፁህፍ ደጋግሜ እንዳንብ ባያድርገኝ ኑሮ የዳግምን መልካም ምላሽ ባለገኙህት ነበር፡፡ ዳግም እግዚአብሔር የስጥልኝ ብያለሁ‼

      Delete
  5. "ያረጋል" በዚህ እብድ በሚያክል መጽሐፉ የተነሳ ያሰከረው የውዳሴ ምኞት ዳግማይ መልዐከ ብርሃን አድማሱ ጀንበሬን ለመባል ይመስለኛል። ነገር ግን እየሰለቸኝም ቢሆን መጽሐፉን አንብቤ የተረዳሁለት ጥሬ ሀቅ በሁለት ረድፍ ይጠቃለላል።

    1/ ያረጋል የፈለገውን ለማጥቃት ሸምቆ የመውጋት ችሎታ አለው። ጅብን ለመውጋት በአህያ እንደመከለል ማለት ነው። ራሱን ችሎ፣ እውቀተወ ኖሮት፣ አብራርቶና ተንትኖ የማሳመን ችሎታ የለውም። የለውም ብቻ ሳይሆን ሊኖረው እንደማይችል አድርጎ ልቡን የዘጋ ላለማወቅ የጨከነ ሰው ነው።

    2/ የሚያሳዝነው ደግሞ ላለማወቅ ያለውን ጭከና ሳይረዳ አዋቂ መስሎ ለመታየት የሚያደርገው ትግል ነው። ያንን የሚያክል ትልቅ መጽሐፍ (በመጠኑ)ለመፃፍ የፈጀውን ጊዜ፣ ያወጣውን ገንዘብ፣ የጠየቀውን ሃሳብ ስገነዘብ እጅግ አሳዛኝ ሰው ነው።
    ፓብሎ ፒካሶ የተባለው እውቅ ሰዐሊ በአንድ ወቅት ተማሪው የሳለውን ስዕል ተመልክቶ ስዕሉ፣ ስዕል ለመባል የሚያበቃውን ችሎታ ቢያጣበት " በስዕልህ ምትክ ግድግዳው ላይ አንተ ተሰቅለህ ማየት ይሻል ነበር" ማለቱ ይነገራል።
    እናስ?
    ከያረጋል መጽሐፍ ይልቅ የያረጋልን ማንነት ማየት በራሱ ኃጢአትና ጽድቅ ምን እንደሆነ ለማወቅ በተሻለ ያግዛል።

    ReplyDelete
    Replies
    1. እኔ ምለው እነዚህ መጨከን፣ ማስጨነቅና ማሥገደድ የሚባለት ቃላት በመናፍቃኑ መጽሐፍ የት ቦታ ይሆን የተመዘገቡት። ቀላል እየተባሉ የተፈበረኩት በእግዚአብሔር ቃል የሚያላግጡበት መጽሐፍቶቻቸው ውሥጥ ይሆኑን? ደግሞ ሥለማወቅና አለማወቅስ ፈላስፋ የሆንከው እንዲሁ በመደናበር ነውን? ዲያቆን ያረጋልማ ሀይማኖቱን የሚያውቅ በማወቁም እውነቱን እየገለጠ የናንት ስህተትና ውሸት ያጋለጠ ነው።
      ሌላው ጅል እውቀትህ ሰዓሊ እንዲህ አለ በማለት የሔድክበት የአይሁድነትህ አካሔድ ነው። ሐጢያትና ጽድቅ በሰው ቁመና አይደለም የሚለካው ሰው በሚሰራው ሥራና በእምነቱ እንጂ። ባንተ ቤት ዘለፋ ስድብ አሳመርኩ ብለህ ነው አፍህን የከፈትኸው። አንተ ዲያቆን ማንነት ያመነበት እምነቱን የሚተገብር እንጂ እንዳንተ በማስመሰል ያልከውን ነኝ በማለት አይደለም።

      Delete
    2. ዳሞት፤ ስምህ ነው? ሙሉ እንዲሆን «ራ» ጨምርበት!
      የያረጋል ማንነት በጽሁፉ ታይቷል። ጭካኔውም እውነትን ለመጨፍለቅ ባደረገው ትግል ተረጋግጧል። የሆኖ ሆኖ ያመነውን ነገር መልሶ የሚያይበት በቂ ምላሽ ይሰጠዋል። አንተም ከዳሞትራ አስተሳሰብህ ነጻ የምትወጣበት ስለሆነ ተከታተለው። «ዋሾና የአተር ገለባ» አንድ ናቸው። ይህ ምን ማለት እንደሆነ ያረጋልን ጠይቀው። ለዚች ለዚች እንኳን እውቀቱ ትበቃለች። በተረፈ ጊዜው የማንበብ፤ የማወቅ፤ የመጠየቅና የማገናዘብ ስለሆነ እንደቀደመው ዘመን ዝም ብሎ የሚነዳ ዛሬ የለም። ንሥሐ የመታደስ መንገድ ነው። መታደስ የግድ ይላል። ብትጠላውም፤ ብትወደውም አይቀርም።

      Delete
    3. Yemejemeriyaw Anony,
      Comment adirgeh motehal. He gave you a job. Find yourslef through it.

      Delete
  6. Now i see how important is this book , it is hurting you a lot ,it has exposed all your lies,protestant teaching and satanic intentions to destroy the orthodox church.i have exactly understood now ,what ever the Tehadiso movement says the exact opposite is true. you are against the will of GOD and his words in the holy Bible Please repent and ask for forgiveness. May the mercy of Jesus be up on you.

    ReplyDelete
  7. እውነት መናገር አለቃ መሠረትን እንደ ያረጋል በድንቁርና መተቸት ነውርም ብልግናም ነው፡፡

    ReplyDelete
    Replies
    1. እውነት ለመናገር መሠረትን እንደ ያራጋል በእወቀትና በወንጌል መነፅር መተቸትና መሞገት ብሎም ውሸትን ማገለጥ ጽድቅ ነው፡፡

      Delete
  8. መቼም ዲ/ን ያረጋል ይህንን መጽሐፍ ለመጻፍ ሲነሳ ሲያደርገውም እናንተን ቀልባችሁን እንደሚገፍፋችሁና እንደሚያንጫጫችሁ፤ለኦርቶዶክሳውያንም የእናንተን ሰይጣናዊ ተንኮልና ቤተክርስቲያናችንን የማጥፋት ምኞት እንደሚገልጽልን አያውቅም ብዬ አላስብምና ይኸው ዛሬ መንጫጫት ጀመራችሁ፡፡ ይብላኝላችሁ ለእናንተ እንጂ እሱማ ገና ብዙ ይጽፋል፤ያሳትማል፡፡ መልስ እንስጥ ብላችሁ የሞት መንገዳችሁን ከምታጸኑ ይልቅ ወደልባችሁ ተመልሳችሁ ለነፍሳችሁ የሚበጃችሁን ብታደርጉ መልካም ነበር፡፡ ግን ምን ይሆናል አንድ ጊዜ ጥፋትን መርጣችኋልና አትሰሙም፡፡ ራሳችሁን በአዋቂነት ኮፍሳችኋልና ልቦናችሁን ለትህትና አትከፍቱም፡፡ እንግዲህ እግዚአብሔር ልናችሁን ወደመልካም እንዲያስመለክታችሁ ከመጸለይ ያለፈ ምን ማድረግ እንችላለን፤ልብ ይስጣችሁ የጨለመባችሁን ያብራላችሁ እንላለን፡፡
    በተረፈ ኦርቶዶክሳውያን ወንድሞቼና እህቶቼ እነርሱስ የበሉት የሥጋ ጥቅም ይዟቸው አውቀው እምቢ ብለው ጥፋትን መርጠዋል፤ምናልባት በስህተት ትምህርታቸው ተታልላችሁ የእነርሱ ተከታይ የሆናችሁ ብትኖሩ ልቦናችሁን መርምሩ፤ በማስተዋል የቤተክርስቲያናችንን አስተምህሮ ለመረዳት ጥረት አድርጉ ይህን ብታደርጉ ኋላ ከሚመጣባችሁ ከንቱ ጸጸት ትድናላችሁና፡፡ ዛሬ ዘመርን እያሉ እየዘፈኑ፤ ወንጌል ሰበክን እያሉ ከሰማያዊ ርስት የሚያስወጣ ወንጀል እየወሸከቱ በግ መስለው በጎች በተባሉ በኦርቶዶክሳውያን ውስጥ ለምድ ለብሰው እኛን ለመንጠቅ ከሚያደቡ ክፉ የሰው አውሬዎች ራሳችንን መጠበቅ ይገባናል፡፡ በጥቂቱ አውራቸው አድርገው ከሚመኩበት “ደ/ን” አሸናፊ ከሚባለው የሞት አርበኛቸው መማር እንችላለን፡፡ ዛሬ የቤተክርስቲያንን ምክርና ተግሳጽ አቃልሎ ሊያጠፋት ሲታገል የነበረው ይህ ሰው ግብረሰዶማዊ ሆኖ ከመናፍቃኑና ከተሀድሶዎች ተባርሮ ከጥፋት ወደ ጥፋት እንደወረደ ይህ አባ ሰላማ የተባለው የራሳቸው ብሎግ እንደነገረን ይታወቃል፡፡ ታዲያ ሞተው የሚገድል መርዛቸውን በውስጣችን ረጭተው ሊገድሉን ከሚያስቡ በቀር እንዲህ ካሉት የጥፋት አርበኞች ምን መልካም ነገር ይገኛል ብላችሁ ትጠብቃላችሁ፡፡ ራሳቸው “ከአንድ የተዓምረ ማርያም መጽሐፍ አንድ የአሸናፊ የኑሮ መድኅን መጽሐፍ ዐረፍተ ነገር ይበልጣል” እያሉ ሲወሸክቱ የነበሩ አሸናፊን ከሞት እናድነው ከማለት ይልቅ ራሳቸውን ነጻ ለማድረግ አሸናፊ ግብረሰዶማዊ ሆነ ብለው የሚጽፉ ጠፍተው አጥፊዎች በጎ ነገር ይገኝባቸዋል ማለት ሞኝነት ነውና ድኅነት ከምናገኝባት ቤተክርስቲያናችን በከንቱ መለየት የለብንም፡፡ ያመንነውን እምነት አጽንተን ብንይዝ የክብሩ ተካፋዮች ሆነናል ተብሏልና፡፡
    ይህንን ክፉ የጥፋት ዘመን ታግሰን የምናልፍበትን ማስተዋልና ጽናት ቸሩ መድኃኔአለም ያድለን፡፡
    መቼም ዲ/ን ያረጋል ይህንን መጽሐፍ ለመጻፍ ሲነሳ ሲያደርገውም እናንተን ቀልባችሁን እንደሚገፍፋችሁና እንደሚያንጫጫችሁ፤ለኦርቶዶክሳውያንም የእናንተን ሰይጣናዊ ተንኮልና ቤተክርስቲያናችንን የማጥፋት ምኞት እንደሚገልጽልን አያውቅም ብዬ አላስብምና ይኸው ዛሬ መንጫጫት ጀመራችሁ፡፡ ይብላኝላችሁ ለእናንተ እንጂ እሱማ ገና ብዙ ይጽፋል፤ያሳትማል፡፡ መልስ እንስጥ ብላችሁ የሞት መንገዳችሁን ከምታጸኑ ይልቅ ወደልባችሁ ተመልሳችሁ ለነፍሳችሁ የሚበጃችሁን ብታደርጉ መልካም ነበር፡፡ ግን ምን ይሆናል አንድ ጊዜ ጥፋትን መርጣችኋልና አትሰሙም፡፡ ራሳችሁን በአዋቂነት ኮፍሳችኋልና ልቦናችሁን ለትህትና አትከፍቱም፡፡ እንግዲህ እግዚአብሔር ልናችሁን ወደመልካም እንዲያስመለክታችሁ ከመጸለይ ያለፈ ምን ማድረግ እንችላለን፤ልብ ይስጣችሁ የጨለመባችሁን ያብራላችሁ እንላለን፡፡
    በተረፈ ኦርቶዶክሳውያን ወንድሞቼና እህቶቼ እነርሱስ የበሉት የሥጋ ጥቅም ይዟቸው አውቀው እምቢ ብለው ጥፋትን መርጠዋል፤ምናልባት በስህተት ትምህርታቸው ተታልላችሁ የእነርሱ ተከታይ የሆናችሁ ብትኖሩ ልቦናችሁን መርምሩ፤ በማስተዋል የቤተክርስቲያናችንን አስተምህሮ ለመረዳት ጥረት አድርጉ ይህን ብታደርጉ ኋላ ከሚመጣባችሁ ከንቱ ጸጸት ትድናላችሁና፡፡ ዛሬ ዘመርን እያሉ እየዘፈኑ፤ ወንጌል ሰበክን እያሉ ከሰማያዊ ርስት የሚያስወጣ ወንጀል እየወሸከቱ በግ መስለው በጎች በተባሉ በኦርቶዶክሳውያን ውስጥ ለምድ ለብሰው እኛን ለመንጠቅ ከሚያደቡ ክፉ የሰው አውሬዎች ራሳችንን መጠበቅ ይገባናል፡፡ በጥቂቱ አውራቸው አድርገው ከሚመኩበት “ደ/ን” አሸናፊ ከሚባለው የሞት አርበኛቸው መማር እንችላለን፡፡ ዛሬ የቤተክርስቲያንን ምክርና ተግሳጽ አቃልሎ ሊያጠፋት ሲታገል የነበረው ይህ ሰው ግብረሰዶማዊ ሆኖ ከመናፍቃኑና ከተሀድሶዎች ተባርሮ ከጥፋት ወደ ጥፋት እንደወረደ ይህ አባ ሰላማ የተባለው የራሳቸው ብሎግ እንደነገረን ይታወቃል፡፡ ታዲያ ሞተው የሚገድል መርዛቸውን በውስጣችን ረጭተው ሊገድሉን ከሚያስቡ በቀር እንዲህ ካሉት የጥፋት አርበኞች ምን መልካም ነገር ይገኛል ብላችሁ ትጠብቃላችሁ፡፡ ራሳቸው “ከአንድ የተዓምረ ማርያም መጽሐፍ አንድ የአሸናፊ የኑሮ መድኅን መጽሐፍ ዐረፍተ ነገር ይበልጣል” እያሉ ሲወሸክቱ የነበሩ አሸናፊን ከሞት እናድነው ከማለት ይልቅ ራሳቸውን ነጻ ለማድረግ አሸናፊ ግብረሰዶማዊ ሆነ ብለው የሚጽፉ ጠፍተው አጥፊዎች በጎ ነገር ይገኝባቸዋል ማለት ሞኝነት ነውና ድኅነት ከምናገኝባት ቤተክርስቲያናችን በከንቱ መለየት የለብንም፡፡ ያመንነውን እምነት አጽንተን ብንይዝ የክብሩ ተካፋዮች ሆነናል ተብሏልና፡፡
    ይህንን ክፉ የጥፋት ዘመን ታግሰን የምናልፍበትን ማስተዋልና ጽናት ቸሩ መድኃኔአለም ያድለን፡፡

    ReplyDelete
  9. በእውነት ምላሹ አያረካ! ይህ መጽሐፍ /መድሎተ ጽድቅ/ ገና የ25 አመት የቤት ስራችሁ እንደሚሆን አም
    ናለሁ! ከዛስ ካላችሁ እንዲሁ የዛሬ 25 አመት ደግሞ ኑፋቄአቸሁን ጠቅለል አድርጎ ምላሽ የሚሰጥ ሰው አግዚአብሄር ያስነሳል:: እስከዛው ዝም አትበ! ተፍጨርጨሩ!

    ReplyDelete
  10. OVIVA Dn.Yaregal U win 100%.All ''TEHADESO" group strictly assume that their is no a person that have KNOWLEDGE in the church.Dn.yaregal is
    a typical example that falsify the assumption .He has also a very good knowledge about Religion & Science & in Orthodox teaching.That is why
    u become angry in publication of the book.It is clear that from his works
    Mr.Mesret teaches based on protestant perspective.therefore,He is a protestant with Ethiopian orthodox church ''LEMED''. U are also following his way that is using the church Tradition(Kene,kedase,Mahelet...Naming e.t.c).But when u compare Mr.Mesret Bible Teaching with other orthodox church in the world(INDIAN,SERYAN) even with Russia e.t.c it is clearly seen that his teaching is too stand in the opposite & Similar to That of the protestant churches teaching.MR. Meseret WAS PRTESTANT IN BOLD-HOW?Its Teaching Clearly show this.

    ReplyDelete
  11. I have tried to read Yaregal's book. I could not stand it. It is full of garbage. Ewneten newu. I know that Damot will assassinate me! But, it is true. God bless you Damot, ye nidet menfes yitaserilih.

    ReplyDelete
  12. በእውነት ምላሹ አያረካ! ይህ መጽሐፍ /መድሎተ ጽድቅ/ ገና የ25 አመት የቤት ስራችሁ እንደሚሆን አም
    ናለሁ! ከዛስ ካላችሁ እንዲሁ የዛሬ 25 አመት ደግሞ ኑፋቄአቸሁን ጠቅለል አድርጎ ምላሽ የሚሰጥ ሰው አግዚአብሄር ያስነሳል:: እስከዛው ዝም አትበ! ተፍጨርጨሩ!

    ReplyDelete
  13. እኔ የምለው ይህ ጽሑፍ ስለመጽሐፉ ዋና ዓላማና አስተምህሮ እኮ አንድም ነገር አልመለሰም፤ ምን ማለት ነው? የቅዱስ ዮሐንስ አፈወርቅን መጽሐፍ መመርመር አለበት ብሎ አጽንዖት ከሰጠ በኋላ የስብሐት ለአብን ጻድቅነት ማውራት ምን የሚሉት ጽሑፍ ነው? "ጽሑፎቻቸው በመጽሐፍ ቅዱስ ተመዝነው እንጂ “እነርሱ አይሳሳቱም” ተብለው በደፈናው እንደ መጽሐፍ ቅዱስ ያለ ሥልጣን የምንሰጣቸው አይደለም። ስለዚህ ትምህርታቸው በመጽሐፍ ቅዱስ ቃል ሊመዘንና መጽሐፍ ቅዱሳዊ መኾን አለ መኾኑ ሊረጋገጥ የሚችል፥ የሚገባውም ነው።"
    የቅዱስ ዮሐንስ አፈወርቅ መጻሕፍት እኮ በመጽሐፍ ቅዱስ ላይ ተመሥርተው ስለ ተጻፉ በዘመኑ በነበሩት ቅዱሳን አባቶች ተመርምረው የአርዮሳውያን ትምህርት መዶሻ ተብለው እስከ አሁን ላላችሁት መናፍቃን መልስ እየሰጡ ያሉ መጻሕፍት ናቸው። የእኝህን ሰው አዋቂነት ለማሳመን ይህን ያህል መዳከር ምን አመጣው? አዋቂ፣ ሊቅ ይሁኑ፤ ነገር ግን ስለ እምነታቸው እኮ አንድ ነገርም አይናገርም። ይቅርታ አይናገርም ያልኩት ተሳስቼ ነው፤ ለካስ ነግርኸናል፤ ከመካነ ኢየሱስ ወንጌላዊት ቤተ ክርስቲያን ጋር አብረው በፍቅር፣ በመተሳሰብ፣ ያለ አንዳች ተቃውሞ ይሠሩ እንደነበር። እኔ ያልገባኝ ነገር መካነ ኢየሱስ ወንጌላዊት ቤተ ክርስቲያን ማለት የኢትዮጵያ ኦርቶዶክስ ተዋሕዶ ቤተ ክርስቲያን ማለት ነው እንዴ? "መካነ ኢየሱስ ወንጌላዊት ቤተ ክርስቲያን አስተዳዳሪዎች፥ “አንተ እንደ አንድ የወንጌል አስተማሪ ኾነህ ከምትሰማራ ይልቅ፥ ለዚህ ሥራ ሊሰማሩ የሚሠለጥኑ ብዙ ቀሳውስትንና ወንጌላውያንን በማሠልጠን ሥራ የምታደርገው ተሳትፎ የበለጠ ጠቃሚነት አለው በሚል ምክር ወደ ማስተማር ሥራዬ መለሱኝ” ሲሉ፥ ከጮራ መጽሔት ጋር ባደረጉት ቃለ ምልልስ ገልጠዋል (ጮራ ቍጥር 14፣ ገጽ 13)።"
    ሌላው ነገር ደግሞ አዋቂነታቸው ከአርዮስ የሚበልጥ አይመስለኝም፤ ከዲያብሎስ ጋር እንኳን አይቀራረብም። ነገር ግን ሁለቱም ተወግዘዋል፤ አርዮስ በቅዱሳን አባቶች፣ ዲያብሎስ ደግሞ በአምላካችን በእግዚአብሔር፤ እናም በእውቀት እምነትን መለካት አይቻልም።
    የሰውየውን የእውቀት ባለቤትነትና ለብዙ ጽሑፎች መነሻና ምንጭ ናቸው ስትል በጻፍከው ማስረጃ ላይ "ንቡረ እድ ኤልያስ አብርሃ (2003፣ ገጽ 30) “በመስቀሉ ገነትን ከፈተ” በተሰኘውና ለመስቀል ደመራ በዓል በተዘጋጀው ልዩ መጽሔት ላይ ለጻፉት ጽሑፍ" ብለህ ያስቀመጥከው በጣም አስገርሞኛል። ንቡረ እድ ኤልያስ አብርሃ እኮ በቤተ ክህነት ውስጥ ሆነው ስንት ጉድ የሚያስብል ነገር እየሠሩ ያሉ በአሁኑ ሰዓት ብዙ ክስ እየቀረበባቸው ያሉ ሰው ናቸው። ለእናንተም ጥሩ ጥቅም እየሰጡ ያሉ ሰው ናቸው። ሌሎቹን የጠቀስካቸውን እኮ ታድያ ማን ያምንሃል? ወይ ጉድ!
    የግብጽ ኦርቶዶክስ ቤተ ክርስቲያን እኮ ያመጣችብን የሃይማኖ ሕጸጽ የለም፤ የእምነት ተሐድሶም አላስፈለጋትም። "የአለቃ መሠረት ሐሳብ ቤተ ክርስቲያን በዚህ መንገድ በግብጻውያን ከመመራት ወጥታ ራሷን በመቻል ተሐድሶ እንዳደረገች ኹሉ፥ የራሷን ሲኖዶስ ወደ ማቋቋም የምትገባው ቤተ ክርስቲያን መሠረተ እምነቷንና አስተምህሮዋን በመጽሐፍ ቅዱስ እንድትፈትሽና ተሐድሶ ማድረግ ባለባት ጕዳይ ላይ ተሐድሶን እንድታደርግ ለማነሣሣት ነው።" ይህ አካሄዳቸው እንደውም ምን ያህል ቤተ ክርስቲያንን ለማፈራረስ ቆርጠው እንደተነሱ የሚያሳይ ነው፤ ምክንያቱም ይህችን የሽግግር ወቅት በመጠቀም ቤተ ክርስቲያኗን ወደ መናፍቃን ማኅበር እንድትቀላቀል የማድረግ እንቅስቃሴ እንዳደረጉ አሳይቶኛል።
    ለማንኛውም ባልሆነ አካሄድ እየሄዳችሁ ነውና ይቅርባችሁ ተመለሱ፤ ይህ አካሄድ በፍጹም አይጠቅምም። ራሳችሁን መርምሩ፤ መጽሐፍ ቅዱስን አታነቡም እያላችሁ አታውኩ። መጽሐፍ ቅዱስን ማንበቤ ጌታችን መድኃኒታችን ኢየሱስ ክርስቶስን አምላክ ነው እንድል ካላደረገኝ ምኑን ንባብ ነው፤ ብዙ ፈላስፎች እኮ ሳያምኑ አንብበውት እውቀት አግኝተውበት ጌታችንን አምላክ አድርገው እንዲቀበሉ አላደረገም። ስለዚህ ይህ አካሄድ ይቅርባችሁ፤ አያዋጣም፤ መቅሰፍትንም ያመጣል።

    ReplyDelete
  14. መድሎተ ጽድቅ በይዘትም ሆነ በአቀራረብ እንከን ስላላገኛችሁለት የምትተቹበት ትችት ራሱ የተውተፈተፈ(ውል አልባ) ሆኖ ነው ያየሁት፡፡ ተሐድሶ ፕሮቴስታንቶች አትድከሙ ከምታስተምሩት ኑፋቄ በላይ መልስ ተሰጥቶበታል፡፡

    ReplyDelete