Saturday, September 9, 2017

በአዲስ ዓመት አዲስ ማንነት

“በአረጀ ልብስ አዲስ እራፊ የሚያኖር የለም፤ መጣፊያው ልብሱን ይቦጭቀዋልና፥ መቀደዱም የባሰ ይሆናል። በአረጀ አቁማዳ አዲስ የወይን ጠጅ የሚያኖር የለም፤ ቢደረግ ግን፥ አቁማዳው ይፈነዳል፥ የወይን ጠጁም ይፈሳል አቁማዳውም ይጠፋል፤ ነገር ግን አዲሱን የወይን ጠጅ በአዲስ አቁማዳ ያኖረዋል፥ ሁለቱም ይጠባበቃሉ።” (ማቴዎስ 9፡16-17)

ስንጀምር አዲስ ያልነውን ዓመት የጊዜ ዑደቱን ሲጨርስ አሮጌ እንለዋለን፡፡ ስንጀምረው አዲስ ብለን የጠራነውን 2009 ዓ.ም.ን አሮጌ እያልን መጥራት ከጀመርን ቀናት ተቆጥረዋል፡፡ አዲስ ለተባለው 2010 ዓ.ም. ዓ.ም. ስፍራውን ሊለቅም የሰዓታት ጊዜ ቀርተውታል፡፡ እግዚአብሔር ቢፈቅድና ብንኖር 2010 ዓ.ም. እንደዚሁ አሮጌ የምንልበት ጊዜ ይመጣል፡፡ አሁን ግን አዲስ ዓመት ነው፡፡ ይህ የዘመን አቆጣጠር ሂደት ይቀጥላል፡፡ እኛም አዲስና አሮጌ ማለታችን ይቀጥላል፡፡ ትልቁ ነገር እኛ ሳንለወጥና በክርስቶስ የአዲስ ሕይወት ባለቤቶች ሳንሆን በአሮጌው ማንነታችን አዲስ ዓመት ብንል በአሮጌው ማንነት ላለነው ትርጉም የሌለው መሆኑ ነው፣ እንደውም አሮጌነታችንን ያባብሰዋል፡፡

ጌታ እንደ ተናገረው “በአረጀ ልብስ አዲስ እራፊ የሚያኖር የለም፤ መጣፊያው ልብሱን ይቦጭቀዋልና፥ መቀደዱም የባሰ ይሆናል። በአረጀ አቁማዳ አዲስ የወይን ጠጅ የሚያኖር የለም፤ ቢደረግ ግን፥ አቁማዳው ይፈነዳል፥ የወይን ጠጁም ይፈሳል አቁማዳውም ይጠፋል፤ ነገር ግን አዲሱን የወይን ጠጅ በአዲስ አቁማዳ ያኖረዋል፥ ሁለቱም ይጠባበቃሉ።” (ማቴዎስ 9፡16-17) ስለዚህ በእኛ ዘንድ ወደ አዲሱ ዓመት የሚሸጋገር አሮጌ ማንነት እንዳይኖር ልናስብብት ይገባል፡፡ ከጭፍን ሃይማኖተኛነት በወንጌል ቃል የተለወጠ ማንነትን ገንዘብ ልናደርግ ይገባናል፡፡ መጽሐፍ “ስለዚህ ማንም በክርስቶስ ቢሆን አዲስ ፍጥረት ነው፤ አሮጌው ነገር አልፎአል፤ እነሆ፥ ሁሉም አዲስ ሆኖአል።” (2ኛ ቆሮንቶስ 5፡17) ብሎ የሚናገረው ሰው ከአሮጌው ማንነት ወደ አዲሱ ማንነት የሚሸጋገረው በክርስቶስ በመሆን በክርስቶስ በማመንና በእግዚአብሔር ቃል ከማይጠፋው ዘር በመወለድ ነው፡፡ እንዲህም ተብሎ ተጽፏልና “ዳግመኛ የተወለዳችሁት ከሚጠፋ ዘር አይደለም፥ በሕያውና ለዘላለም በሚኖር በእግዚአብሔር ቃል ከማይጠፋ ዘር ነው እንጂ።” (1ኛጴጥሮስ 1፡23)፡፡ እኛ አዲስ ስንሆን እውነተኛ አዲስ ዓመት የሚሆንልን ያን ጊዜ ነው፡፡ ጌታ በምሳሌ “አዲሱን የወይን ጠጅ በአዲስ አቁማዳ ያኖረዋል፥ ሁለቱም ይጠባበቃሉ።” ያለው ያን ጊዜ በእኛ ሕይወት ተፈጻሚ ይሆናል፡፡
ስለዚህ ውድ የአባ ሰላማ ብሎግ ተከታታዮች “ፊተኛ ኑሮአችሁን እያሰባችሁ እንደሚያታልል ምኞት የሚጠፋውን አሮጌውን ሰው አስወግዱ፥ በአእምሮአችሁም መንፈስ ታደሱ፥ ለእውነትም በሚሆኑ ጽድቅና ቅድስና እንደ እግዚአብሔር ምሳሌ የተፈጠረውን አዲሱን ሰው ልበሱ።” (ኤፌሶን 4፥21-24)
አሮጌውን ሰው አስወግደን አዲሱን ሰው ክርስቶስን ለብሰን በአዲስ ሕይወት የምንመላለስበት መልካም አዲስ ዓመት ይሁንልን

No comments:

Post a Comment